2 Ti 3 - A Txꞌan Biblia Yin Kꞌanjobal 1989

Is beybal eb anima yet lajub tiempoal

¹ Yowalil chi jojtaknej elok, tol a yet manto jay jun lajub c'ual, ay wal jun tiempoal ok jayok tol caw ay is may.

² Ilab tol ay anima ok camc'ulnej ba tx'oklil. Asan yin ch'en tumin ok yaoc eb nabal. Ok luesnej ba eb, ok yi' can ba eb. Comonc'al ok buchwaj eb. Manxa ok yikej eb tzet ok yal is mam c'al is txutx. Manxa ok yal eb yuj diosalil yuj tzet ok cha'. Junelnej wal man watx'ok ok yut eb beybal.

³ C'am jabok camc'ulal eb, c'am bay ok ok' c'ul eb yin junokxa mactxel. Ok wajwok k'anej eb. Maj je' mitx'on tzakay eb is mimanil. Axca wal junok no no' caw ow, caytu' ok yut ba eb. Ok oc eb ajc'ulal yin masanil tzet watx'.

⁴ A yet ok jay jun tiempoal tu', ok naaj eb k'anej yin yamigo. Maj xiw eb yunen tzet man watx'ok. Ok tz'ak yaloc ba eb jelanil. Asan yin tzet ok yochej oc eb yetok is mimanil bay ok yaoc eb is nabal. Axa yin Dios xin, c'am jabok is camc'ulal eb.

⁵ Ok tz'ak yal eb axca ti': A yin Dios chi jaoc co nabal, ẍi eb. Palta a beybal eb ok tx'oxk'abnen elok tol manak Dios ayoc yetok eb. Manchak a junanej a ba yetok eb, a ti et, tol chach el xol eb.

⁶ A xol eb chi wal ti', ay eb ewantakc'al chi oc yulak na, cax chi yetnen eb eb ix ix c'am is nabal, eb ix etaxnakxa el is nabal yuj tzet man watx'ok. A eb ix tu', xiwil tzet man watx'ok chi yochej oc eb.

⁷ Chi tz'ak cuywok ba eb ix masanil tiempo; palta c'am bak'in ok yojtaknej el eb ix jun cuybej acaw yel.

⁸ Axca max yun yak'len Janes yetok Jambres*fn* tenon oc waan Moisés, axca tu' chi yun tenon oc waan eb anima tu' cuybej acaw yel. Toxa ton max etax el is nabal eb. C'amxa chi yaoc eb c'ul yin Dios.

⁹ Palta a eb tu', man ok uj yuj eb, yujtol ok txecloj el eb satak masanil anima, tol c'am nabal eb. Axca max yun txecloj el eb max yak'lej tenon oc wanaj Moisés, cayton tu' ok yun txecloj el eb.

Juntzan lajub chekbanil Timoteo yuj Pablo

¹⁰ Palta ach ti' ojtak ton in cuybanil, c'al in beybal, c'al tzet chi wut in nabal. Max ela' tzetbil chi wut waon oc in c'ul yin Cham Jajawil. Max el c'apax in mimanc'ulal c'al in camc'ulal.

¹¹ Yetok c'apaxok, max el in tec'anil xol tzet chi alay oc wiban, c'al juntzanokxa tzet chi wab yail. Ojtakxa tol caw wal max quin etax yet max quin ec' bay conob Antioquía, yetok bay conob Iconio c'al bay Listra. Xiwil yailal ec' wilnak bay juntzan conob tu'; palta colnak in el Cham Jajawil yul is k'ab masanil.

¹² Tzanc'al mac chi yochej tol watx' chi yut beybal, yujtol chi junanej ba yetok Cristo Jesús, wal yel ay tzet ok alay oc yiban yuj eb yet animail.

¹³ Axa eb man watx'ok beybal xin, c'al eb etnem anima, ok texac'al tojcan eb xol tzet man watx'ok. Etnewom eb, cax etnebil c'apax eb.

¹⁴ Axa ach xin, tec'anc'al chot aon oc a nabal yin juntzan cuybej cuybilxa oj, juntzan ojtak mac cuynej ach can yin.

¹⁵ Yintaxc'al a yaliẍal max c'oli a cuyon tx'an is libro Dios. Tx'an chi ak'on jelanbok co nabal, yet watx' chon colchaji, yet chi jaon oc co c'ul yin Cristo Jesús.

¹⁶ A Dios max ak'on tz'ibelay tx'an Un bay aycan is k'anej. Watx' tx'an yin con is cuyoni c'al yin con is tenchaneni. Chi watx'ji oc co nabal yuj. Chon is cuy tx'an, tzet chi jut co jichlonen oc co beybal.

¹⁷ Axca ton ti' yopiso tx'an, yet watx' tz'akan chi nachaj el juj, c'al jeon juj junen juntzan yochwan Dios ayon tol yet onxa ti'.