2 Ti 1 - A Txꞌan Biblia Yin Kꞌanjobal 1989

Is yichbanil carta Pablo

¹ Ayin ton Pablo in, chekbej in Jesucristo, yujtol axca ti' max el yin c'ul Dios. Yak'nakcan Dios is ti', tol ok yak' co k'inal tol ayc'al yin tojbalk'inal, yujtol junxanej jayji yetok Cristo Jesús.

² Ach Timoteo, ti chi watok jun in carta ti' ayach. Caw ay in camc'ulal en, axca tol in c'ajol ach. Yak'okabc'al co Mam Dios yetok Cham Jajawil Jesucristo is watx'c'ulal ayach. Ok'okab c'ul en. Yak'okabc'al c'apax is junc'ulal ayach bay tu'.

Manchak on q'uixwi jalon el yabixal Cristo

³ Chin txajli c'ualil c'al ak'balil oj. A yet chin txajli junjuntak el, oj wali chi walon yuj diosalil bay Dios. A yin Cham, tojol chi wut in nabal yin wak'on serbil, axca max yun yak'on serbil eb wichmam.

⁴ A yet chin naontek a cusc'ulal, caw chi wochej chi wiloc en junelxa, yet watx' chi ajwal can in tzalojc'ulal.

⁵ Wojtak wali, tol yelc'ulal wal chaoc Cham Jajawil yin a c'ul. A a txutx ixnam Loida, babel yanak oc is c'ul yin, c'al a txutx Eunice. Wojtak tol axca ton max yut yaon oc eb c'ul yin Cham Jajawil tu', caytu' chot aon c'apax oc a c'ul yin Cham ach ti'.

⁶ Xan chi waltok ayach tinani', tol chak' ep elon opiso max yaoc Dios eban yet max in batxban ajtok in k'ab yiban a jolom.

⁷ A Dios, manak xiwc'ulal max yak' ayon. Palta tol a wal caw yipalil max yak'a', yet watx' tec'an co waayi. Max yak' co camc'ulnelej co ba. Max yak' c'apax jak'on cuenta co ba yul jet.

⁸ Yuj tu', manchak ach q'uixwi alon el yabixal Cham Jajawil. Yetok c'apaxok, manchak ach q'uixwi, yujtol preso wayji yuj Cham. Manchak ach xiw elon yail yuj k'anejal yet colbanilej, yujtol lanan yak'on Dios yipalil ayach wetok.

⁹ Colbil on el yuj Dios, cax awtebil on c'apax el yuj, yet watx' watx'c'al chi jut co beybal. Man yujok jabok tzet watx' max el juneni xan max on colchaji, palta yujtol axca ti' max el yin c'ul Dios chi juncan elok, c'al yuj is camc'ulal jin, yujtol junxanej jayji yetok Cristo Jesús. Ayxac'alta' camc'ulal Dios jin yet c'amto chi tz'unchaj yulyibank'inal.

¹⁰ Ato yet max ulic' co Colomal Jesucristo, ato yet tu' max txecloj el is watx'c'ulal Dios jin. A Jesucristo max ak'on lajwok el yipalil camich. A k'anejal yet colbanilej max txeclonen elok tol a Cham chi ak'on co k'inal tol ayc'al yin tojbalk'inal.

¹¹ Max yak' Dios wopiso walon el k'anejal yet colbanilej, cax max quin yaon oc chekbejok Jesucristo, yuj chin ec' cuywajok.

¹² Yuj tu' xan chi wil juntzan yailal chi jay wiban ti'; palta c'am jabok chin q'uixwi, yujtol caw wojtak Cham ayoc yipok in c'ul. Wojtak tol ay yipalil Cham taynen tzet max yak' ayin, masantac'al chi jay c'ual jayubal Cristo.

¹³ Ya'ilnej jun acaw cuybanilej max abcan ayin. Aokab wal ayc'al oc yichbanilok cuybanilej ok ak'a', yujtol ay wal oc Dios yin co c'ul, c'al yuj camc'ulal ak'bil ayon yujtol junxanej jayji yetok Cristo.

¹⁴ Taynej juntzan cuybanilej max alay oc yul a k'ab yuj Dios yetok colwal Cham Espíritu Santo, Cham cajanxa ec' jin junjun on.

¹⁵ Ojtakxa tol bekbil inxa can in tx'oklil yuj masanil eb creyente yul yet Asia. Ajun Figelo yetok Hermógenes yetok eb beknej in can tu'.

¹⁶ Ok'okab c'ul Cham Jajawil yin eb cajan yetok Onesíforo bay yatut, yujtol tx'ial elc'al max ul yak' mimanil in c'ul. Caxc'al preso wayji palta maj q'uixwok quin ul yiloni.

¹⁷ Maxc'al jay bay conob Roma ti', cax max c'oli in saylay ec' yuj, masantac'al max yal wilchaj yuj.

¹⁸ Ok'okab c'ul Cham Jajawil yin Onesíforo tu' yetok eb ayic' yetok bay yatut yet ok jay c'ual jayubal Cristo. Ojtak ach ti' tol caw xiwil is watx'c'ulal Onesíforo tu' jin bay conob Efeso bay ayach ec' tu'.