2 Cr 9 - A Txꞌan Biblia Yin Kꞌanjobal 1989

Cham rey Salomón c'al xal reinail Sabá

¹ Max yab xal reinail Sabá k'umal is mimanbilal cham rey Salomón, xan max jay xal bay Jerusalén yet chi ul ak'lay porobal cham yetok juntzan k'anlebal tol caw wal yatak nachaj elok. Max jayoc xal yetok xiwil is chekbej, yetok no camello iknej oc perfume, yetok xiwil oro, c'al yetok ch'en ch'en tol can tojol. A yet max jayoc bay satak cham rey Salomón, max k'anlen masanil tzet yetal tol nabil yuj.

² Axa cham rey Salomón xin, max paktzej masanil is k'anlebal tu', c'am wal junok is k'anlebal xal tol maj paktzej cham.

³ A wal yet max yilon xal reina tu' jantak is jelanil cham Salomón tu', toxac'al max c'aycan aj c'ul xal yuj: a ton yuj is despacho max watx'nej ajok,

⁴ c'al loj chi eltek bay meẍa, c'al bay cajan eb ay yopiso yetok, yetokc'al juntzanxa eb is chekbej, c'al pichil eb, tx'okxa yili c'apax is pichil eb chi iontek is copa cham rey, yetokc'al k'ochal bay chon ajtok bay templo Jehová.

⁵ Max yalon xal bay cham rey: A tzet max wab bay in conob, yuj tzetak chonej, c'al yuj a jelanil yel ton wali.

⁶ A yet tu', c'am chi waoc yin in c'ul tzet chi al-layi, axa tinani' xin, ayin caw chi wilocok. Wal yel tokc'al ay nanok a jelanil max al-lay wab bay tu', yelxac'al chach ec' yiban yintak axca jantak max al-lay ayin.

⁷ Tx'okxa tzalojc'ulalil yet eb a chekbej ti', yelxac'al mi watx' yet eb tol ayic' etok, chi yab eb a k'anej yin a jelanilal.

⁸ Al-layokab watx' k'anej yin Jehová a Diosal, a ton Cham chi tzaloj etok, xan max yak' ekbej yin yajawilal is q'uexelok. Yuj is camc'ulal a Diosal bay conob Israel ti', yochwan Cham tol ayc'al ec' yin tojbalk'inal, xan max ach yaoc yin reyal, yet chak'on yajawilal yin watx'il, c'al yin tojolal, ẍi xal.

⁹ Max lajwi tu' max yak'on xal cien quintal ch'en oro bay cham rey Salomón, yetok xiwil perfume c'al ch'en ch'en tol can is tojol. C'am junelok max jayoc miman perfume bay Israel axca max jay yuj xal reinail Sabá bay cham rey Salomón.

¹⁰ Ac'ala' c'apax eb winak chi mulnaj bay cham Hiram, c'al eb munlajwom Salomón max bet yitek eb oro bay Ofir, max yion c'apaxtek eb te sándalo, c'al ch'en ch'en tol can is tojol.

¹¹ A yetok te sándalo tu' max watx'nej cham rey is k'ochal templo yet Jehová c'al yetok is despacho cham rey tu'. A yetok te te' tu' max watx'ji c'apax arpa, c'al salterio yuj eb sonlom. C'amc'al bay max il-lay juntzan te te' tu' axca tu' yul makbej Judá.

¹² Max el wal yin c'ul cham rey Salomón yak'on bay xal reinail Sabá masanil tzet yetal max k'an xal. Tx'ok pax yel tzet yetal mayal yak' cham rey is q'uexelok tzet yetal max yitek xal bay cham. Max lajwi tu xin, axa meltzojtok xal bay is conob tu' yetok masanil eb ajun yetok.

Mimanbilal cham Salomón c'al is beyomal

¹³ 500 quintal ch'en oro chi cha' cham Salomón yet junjun abil,

¹⁴ c'am pax oc masanil is tojlabal eb comerciante tz'akilok. Chi yion c'apaxtek eb reyal Arabia, c'al eb gobernador bay makquiltakil yul yet Israel oro, c'al plata bay cham.

¹⁵ Max chek cham watx'nelay 200 mimek makbal julbalej, ayoc oro yin; ay mi lajcawebok libra oro ayoc yin junjun.

¹⁶ Lajwi tu' max chekon c'apax cham rey Salomón tu' watx'nelay junxa 300 coc'tak makbal julbalej; ay mi wakebok libra oro max oc yin junjun. A bay jun salón chi yik K'akte' yet Líbano max yak'a'.

¹⁷ Max chekon c'apax watx'nelay jun miman trono ayoc oro caw wal watx' yin, ay c'apax oc marfil yelbubok.

¹⁸ A jun trono tu', ay wakeb sat k'ochal chi ajtok. Ay c'apax ay oro bay chi ay batxan yakan, junnejc'al yayji yetok jun trono tu'; ay aj is k'ab jun trono tu' bay junjun is tz'eyil. A bay junjun is tz'eyil tu', a tu' waan oc junjun yechel coj.

¹⁹ Ay c'apax lajcawebxa yechel coj, junjunc'al ayoc bay junjun is tz'eyil sat k'ochal tu'. Tok ay junokxa rey caytu' max yun watx'nen yet axca jun tu'.

²⁰ Yetok c'apaxok a masanil is copa cham rey, oroc'al elok, yetokc'al masanil mitx'k'abej bay salón chi yik K'akte' yet Líbano. C'am junok mitx'k'abej tol plata, yujtol a yul tiempoal cham rey tu', a ch'en plata tu' man mimanok yelapnok ch'en,

²¹ yujtol a eb is chekbej cham chi tojc'al yetok eb is chekbej Hiram yetok barco bay Tarsis yin yiontek eb oro, plata, marfil, no maltin, c'al no pavo real yin oxox abil.

²² Ec'ban is beyomal, c'al is jelanil cham rey Salomón yintak masanil eb rey bay yulyibank'inal ti'.

²³ A masanil eb rey bay yulyibank'inal max jayoc eb bay, yuj ul yiloni c'al yaben eb jantak yayji oc jelanil cham max ak'lay yuj Dios.

²⁴ A masanil eb tu' max yitek eb sabalej bay, yet junjun abil: axca plata, oro, pichilej, arma, perfume, yetok no caballo c'al no mula.

Chi manwi carruaje c'al chej cham Salomón

²⁵ Ay 4,000 caballeriza yet is chej, c'al is carruaje cham rey Salomón, yetok 12,000 chej ikom soldado. Ay carruaje c'al no chej ayic' yetok eb taynemal cham rey bay Jerusalén; axa juntzanxa xin, ata tu' ay bay conoblak tol yet carruaje c'al chej yayji.

²⁶ A cham rey Salomón tu' max yajawbi yiban juntzanxa eb rey chi tojtac'al bay a' miman Éufrates, masantac'al bay yul conobal eb filisteo, chi apnitac'al bay tilak yet Egipto.

²⁷ A bay Jerusalén a ch'en plata axcaxac'al comon ch'en yayji ch'en yuj cham. Axa te c'ute' lajanxac'al max yun te' axca te' yichlakilteal higo bay ac'al.

²⁸ A no chej cham rey Salomón, a tu' max ilaytek no' bay Egipto, c'al bay juntzanxa nacionlak.

Is camichal cham rey Salomón

²⁹ A janic'okxa yabixal Salomón, yet yichbanil c'al yet lajubal, a tu' tz'ibbil bay yul tx'an libro cham Natán is chekbej Dios, c'al yul yet yabixal Ahías is chekbej Dios aj Silo, c'al bay tz'ibbil ilwal max yil jun chekbej Dios chi yik Iddo yin Jeroboam c'ajol Nabat.

³⁰ 40 abil max yak' Salomón reyal bay Jerusalén xol conob Israel,

³¹ axa yet max cam xin, max mukon eb bay conob David is mam. Lajwi tu' axa Roboam is c'ajol max occan yin reyal is q'uexelok.