2 Cr 7 - A Txꞌan Biblia Yin Kꞌanjobal 1989

¹ A yet max lajwi masanil juntzan is txaj cham rey Salomón ti', max aytek k'ak' bay satcan, cax max tz'aay masanil xajanbal, max nojil yul templo tu' yuj is tzekekial Jehová.

² Yuj tu' xan a eb sacerdote majxa je' yoctok eb bay yul templo tu'.

³ A wal yet max yilon masanil eb Israel k'ak'ej, c'al tzekekial Jehová max ayol bay yiban jun templo tu', max ay jajan eb masanil, c'al yay nojan eb, masantac'al max ayc'ay sat eb bay sat amak' tu', max txajli eb, c'al yalon eb yuj diosal bay Jehová. Max yalubtanen eb axca ti': Yelxac'al watx' Cham, yujtol ayc'al is camc'ulal yin tojbalk'inal, ẍixac'al eb.

⁴ Max lajwi juntzan tu xin, axa yak'onc'al cham rey Salomón xajanbal yetok eb conob tu' bay Jehová.

⁵ 22,000 no wacax yetok 120,000 no calnel max yak' cham yin xajanbalil. Caytu' max yun yaoncan oc cham yetok eb conob, jun templo tu' yul k'ab Dios.

⁶ Axa eb sacerdote xin, chi ayjic'al ec' eb yin yopiso. Axa eb levita chi bitnic'al eb yetokc'al masanil mitx'k'abej yin música watx'nebilcan yuj cham rey David, tol yet Jehová yayji. Chi yalon eb: A is camc'ulal Jehová, ayc'al yin tojbalk'inal, ẍi eb, axca max yun bitni cham David. Axa eb sacerdote chi xuon trompeta satak eb, lecan c'apax aj masanil eb conob Israel.

⁷ Max yaon oc cham Salomón yopiso nan yul amak' ay bay satak templo Jehová, yet chi ak'lay tz'a xajanbal, c'al yak'lay tz'a seboal no xajanbal yet junc'ulalil bay tu', yujtol a jun altar naba bronce max watx'nej ajok, c'am chi yab bay chi ajtok no xajanbal tu', c'al ofrenda yin ixim trigo, c'al seboal no no' tu'.

⁸ A yet jun tiempoal tu' a cham Salomón yetokc'al eb yet israelal max chaon eb k'inal chinama yin ukeb c'ual. Jun wal miman bulan eb, max tittac'al bay chon octok bay Hamat, bay mojonal yet norte, masantac'al bay a' elom aej yet Egipto bay mojonal yet sur.

⁹ Ukeb c'ual max cha eb k'inal altar, axa yin junxa ukeb c'ual xin, max oc k'inal chinama. Lajwi tu' max oc junxa c'ual miman k'in yin lajubal.

¹⁰ A yet 23 waay yet is suk xajaw, a yet tu' max pojlencan ba cham rey yetok eb conob, axa paxcantok eb bay yatut yin tzalojc'ulal yuj masanil watx'c'ulal max yak' Jehová bay eb axca max yut yalon bay cham David, bay cham Salomón, c'al bay masanil eb.

Is trato Dios yetok Salomón

¹¹ A yet mayal watx'ji el templo Jehová yuj cham rey Salomón, yetok is despacho, c'al yetok masanil tzetak yetal max na tol max watx'nelayi,

¹² max tx'oxon ba Jehová bay yet ak'balil, max yalon bay: Max wab wal a txaj, max in sic'on c'apax el jun lugar ti' in templook bay chi tz'a xajanbal ayin.

¹³ Yuj tu xin, ta ay junok waresma chi watek tol c'amxa chi yak' nab, ma chi wal bay no chapulín tol chi yak' lajwok no' awoj, ma junok ilya' chi watek e yiban ayex in conob ex ti',

¹⁴ ta chi na ba e c'ul ayex tol chi binaji tol in conob e yayji, cax chex txajli ayin, che bekoncan e yob beybalil, ok wab e tewilal tu' bay satcan, ok wak' tanil e mul, axa wion aj can yaxilal ayex tu'.

¹⁵ A tinani' c'al yet ok beyc'altok, ok wabc'al txaj ok oc ayin bay jun lugar ti',

¹⁶ yujtol max in sic'can el jun templo ti' bay ok in ayjokc'al ec'ok. A jun ti' ok in taynej, cax naanc'al wuj.

¹⁷ A tinani' xin, tatol ok a beybalnejc'al masanil tzet chi wala' axca wal max yun a mam, cax ok eken in ley c'al in chekbanil,

¹⁸ ok wak'c'al yun ekbej ti', axca wal in trato max in watx'nej yetok a mam, a ton yet max waloni, tol man ok yak' palta junok yinatil yoc yajawilal e xol ayex conob Israel ex ti'.

¹⁹ Palta ta man ok e yikej in ley, c'al in chekbanil max wak'a', axa ok yunej tol ok e yak' serbil, c'al e yoc yin ayilal bay juntzan comon dios,

²⁰ ok ex wiel bay jun tx'otx' max wak' ayex ti', ok ex in k'okil in satak, axa in bekoncan jun templo max wacan oc wetok ti', cax ok waontok yin buchbejalok masanil nacionlak.

²¹ A jun templo manxa watx'ilok ti', toxac'al ok aycan wekan is pojilal. Tzanc'al mactxel ok ec' bay is cawilal ti', toxac'al ok c'ayaj c'ul eb yuj, cax ok k'anlen ec' eb, ¿Tzet yuj xan caytu' max yun Jehová yin jun templo ti'? ẍi mi eb.

²² Axa ok yun tak'welay eb xin: Max beklaycan Jehová yuj eb, a ton Cham Diosal is yichmam eb, Cham max ion eltek eb bay Egipto, axa juntzan comon dios max yak' serbil eb. A yuj tu xin, xan max tit jun miman yailal ti' yiban eb, ẍi mi eb, ẍi Jehová bay Salomón.