2 Cr 5 - A Txꞌan Biblia Yin Kꞌanjobal 1989

¹ Axa yet max lajwi jantak mulnajil max chek Salomón watx'jok bay templo Jehová, axa yilaytok masanil mitx'k'abej bay c'uanbal yul templo Dios, a ton juntzan mitx'k'abej naba oro, naba plata, c'al juntzanxa tzet yetal tol yet Jehová yayji, tol sabilcan yuj cham rey David is mam.

Yibaniltok te caẍail trato bay templo

² Lajwi tu xin, max wajban oc cham rey Salomón masanil eb yicham winakil conob Israel, yetok masanil eb yajaw yayji yin junjun tribu, c'al yetok eb mimek yayji oc yikbej xol eb ac'al oc yetok eb. Max wajnaj oc eb tu' yet chi ilay eltek te caẍail trato Jehová bay Sión bay conob David.

³ Axa yet c'ual k'in tol miman yelapnok, a ton yet is suk xajaw yul abil, a yet tu' max wajbaj ba eb conob masanil yetok cham rey Salomón.

⁴ A yet wajanxa masanil eb yicham winakil conob Israel tu', max yiontek eb levita te caẍa tu' bay templo.

⁵ Max yion c'apaxtek eb sacerdote, c'al eb levita mantiado bay chi co chalej co ba yetok Dios bay templo, yetok masanil mitx'k'abil.

⁶ Ajun cham rey Salomón yetok masanil eb yet israelal maxax waj ba yetok tu'. Ayoc eb satak te caẍail is trato Dios, cax chi yak'on tz'a eb xajanbal, a ton no calnel yetok no wacax; tom jantakxa no' max yak' eb, xan c'amxa chi bischaji.

⁷ Lajwi tu' max yion octok eb sacerdote te caẍail trato Jehová bay yul templo masantac'al bay jun lugar tol asannej Jehová ay yet, bay yalan is xic' juntzan yechel querubín.

⁸ Jenantok xic' juntzan tu' yiban jun lugar bay chi ayji te caẍa tu', c'al yiban is batxbanil te'.

⁹ Palta mimek tel te batxbalej tu', xan chitac'al txecloj te' bay jun lugar tol yet Dios yayji, bay satak jun lugar tol asanxanej Dios ay yet, caxc'al man wal txequelok bay yina. Axca tu' max yun canc'al canok, masantac'al tinani'.

¹⁰ A bay yul te caẍa tu' asan ch'en cab jenan ch'en max yacan aytok cham Moisés bay Horeb ayaytok yul, a ton ch'en bay ayoc is trato Jehová yetok conob Israel yettax max el eb bay Egipto.

¹¹ Max eltek eb sacerdote bay yul jun lugar tol yet Dios yayji tu'. A masanil eb sacerdote ayic' bay tu', maxax sakbanej ba eb, caxc'al c'am oc eb yin is turno.

¹² Masanil eb levita ayoc yiban yin bitni, axca Asaf, Hemán, c'al Jedutún, yetokc'al eb c'ajolej, c'al eb icanejal, lecan oc eb cawilal altar bay yetc'ulal bay chi ajol c'u. A lino ayoc pichilok eb, ibil oc platillo, salterio c'al arpa yuj eb. Ay c'apax 120 eb sacerdote chi xuon trompeta yetok eb.

¹³ Junej max yun xuon eb trompeta tu', cax jun lajanxac'al yoc nuk' eb bitni, c'al yalon eb watx' k'anej yuj yalon eb yuj diosalil bay Jehová. Max xulay trompeta, c'al yalay oc platillo, yetokc'al juntzanxa mitx'k'abej yin música, yak'ban lanan bitni eb c'apaxok. Max yalon eb axca ti': Jalek watx' k'anej bay Jehová, yujtol yelxac'al watx' Cham, tol ayc'al is camc'ulal yin tojbalk'inal, ẍi eb yin is bit. A yet jun bek tu' max nojil yul templo yuj mub.

¹⁴ A yuj mub tu', majxa je' yoc eb sacerdote yilon yopiso, yujtol max nojil yul templo tu' yuj is tzekekial Jehová.