2 Cr 3 - A Txꞌan Biblia Yin Kꞌanjobal 1989

Watx'jubal templo yuj Salomón

¹ Max chail Salomón yich watx'nen aj templo Jehová bay Jerusalén, a ton bay jolom witz Moriah, bay max tx'ox ba Jehová bay cham David, is mam Salomón tu', a ton jun tx'otx' tu' yet templo yayji yuj cham David tu', chi yal elapnok a ton bay is tec'bal trigo cham Ornán aj Jebús.

² Max chail yich mulnajil tu' yet cab c'ual waay yet is cab xajaw, yet canebxa abil yoc yin reyal.

³ A cimiento max chek Salomón alay aytok yichok jun templo tu', tix jantak max yun ti'; ay 27 metro is k'atil, yetok baloneb metro sat.

⁴ A pax is tentail templo tu xin, ay baloneb metro is k'atil, lajanc'al yetok sat templo tu'. Axa is tel max aj can, baloneb metro c'apaxok. A bay yul is tentail tu' max oc oro yin yuj Salomón.

⁵ Max yaon oc bay yul jun templo tu', te chemte' tol taj. Lajwi tu' max yaon oc oro caw wal watx' yin, cax max oc yechel an palma c'al yechel cadena yinlak sat.

⁶ Max oc ch'en ch'en manxa watx'ilok yili yelbubok. A ch'en oro max k'an eb tu', a ton wal oro titnak bay Parvaim.

⁷ Max oc oro yin satlak chemte' bay yul tu' masanil, masanil yin patzabil c'al yin marcoal puerta, yetokc'al puertail. Max oc c'apax yechel querubín bay satlak chemte' tu'.

⁸ Max watx'nen c'apax jun cuarto tol asan Jehová ay yet. Ay baloneb metro is k'atil, lajan yetok sat templo tu', baloneb metro c'apax sat. Lajwi tu' max yaon oc oro caw wal watx' yin. A bay tu' max oc junok 500 quintal ch'en.

⁹ A ch'en lawuẍ oro, ay 20 onza yalil junjun. Max oc c'apax oro yul juntzan cuarto bay can.

¹⁰ A bay yul jun lugar tol asannej Dios ay yet tu', max chek watx'nelay cab te yechel querubín, a juntzan tu' max oc c'apax oro yin.

^11-13 A tel is xic' cab yechel querubín tu', baloneb metro yin canebal; jenan el xic' junjun. Ay cab metro yetok 25 centímetro junjun xic'. Chitac'al apni oc jenan junjun xic' bay satlak pared, axa junjunxa, chi chalej ba bay nan yul. A juntzan querubín ti', lecan ocok, cax t'anancantok bay jun cuarto nan yul.

¹⁴ Max chek c'apax watx'nelay junok cortina lino tol a yax tx'al, tx'al púrpura c'al cak tx'al ayoc yelbubok. Max oc c'apax yechel querubín yin.

Cab mimek oy

¹⁵ Max yak' watx'jok aj cham rey Salomón cab mimek oy bronce, 16 metro mi is tel. A juntzan tu' max oc bay satak templo. Cab metro, yetok 25 centímetro ay aj makil chon oy tu'.

¹⁶ Max watx'nej c'apax cadena axca yili txim, a ton jun tu' max oc yin makil chon oy tu'; cax max watx'nen c'apax 100 yechel granada, max yaon oc yin cadena tu'.

¹⁷ Max yaon oc juntzan mimek oy tu' bay satak templo, jun bay yetc'ulal sur, junxa bay yetc'ulal norte. A jun bay sur tu' max yak' yik Jaquín,*fn* axa jun bay norte tu' max yak' yik Boaz.