2 Cr 26 - A Txꞌan Biblia Yin Kꞌanjobal 1989

Ocnak Uzías yin reyal

¹ Yuj tu xin, a masanil eb conob bay Judá max yaoc eb Uzías yin reyal q'uexelok Amasías is mam. 16 abil is k'inal Uzías yet tu'.

² A yet maxax cam is mam, max yi pax ec' conob Elat junelxa, yet chi oc pax yul makbej Judá, cax max ca watx'nen ajok.

³ A yet 16 abil is k'inal Uzías tu', max chaon el yich yak'on reyal. 52 abil max yak' reyal bay Jerusalén. A is txutx chi yik Jecolías, aj Jerusalén xal.

⁴ A masanil tzet yetal max yun Uzías, watx' satak Jehová, axca max yun Amasías is mam.

⁵ Yak'ban iquisto ec' cham Zacarías, yaomal oc is nabal yin yet Dios, caw wal yikem max yut ba bay Jehová, caw wal max aj can yuj Cham.

⁶ A Uzías tu' max toj yin owal yin eb filisteo, max yuchay is murallail conob Gat, Jabnia c'al Asdod. Max watx'nen aj conoblak yul yet Asdod bay xol eb filisteo.

⁷ Max colwaj Dios yetok yet max yak'on owal yin eb filisteo tu', yetokc'al yin eb árabes cajan bay Gur-baal c'al yin eb meunita.

⁸ Max yak' c'apax eb amonita tojlabal bay Uzías, max apnitac'al oc is k'umal bay mojonal yet Egipto, yujtol max aj wal can is mimanbilal.

⁹ Max watx'nej aj juntzan torre bay yiban murallail Jerusalén, bay yiban is puertail bay txiquin, bay puerta bay jobe, c'al bay juntzanxa txiquinlak; caw wal watx' max yutej.

¹⁰ Max watx'nej c'apax aj juntzan cuartel ay is torreal bay tz'inan tx'otx'. Max jot c'apax xiwil uc'bala', yujtol caw wal xiwilxa is jobbejal no' bay ac'al, c'al bay yichlak witz. Ay c'apax is mulnajwom chi mulnaj yin awoj uva, c'al yin hortaliza bay is satak ay bay siquilal tx'otx', c'al bay ac'al. Caw wal pitz'an c'ul yin awoj.

¹¹ Ayxa jun miman bulan ejército watx'xa yayji yet chi toj yin owal. A listail eb yin makquiltakil, a Jehiel c'al Maasías inej ocok. A mac chi ikban eb tu', a ton Hananías, a' ayoc yin opiso yetok cham rey Uzías.

¹² A eb yajaw yayji yin eb soldado, ay 2,600 eb.

¹³ Ay 307,500 soldado tol watx'xa yayji yet chi toj yin owal, caw wal miman yayji ocok yet chi colwaj bay cham rey yin owal.

¹⁴ Max chek cham rey Uzías watx'nelay makbal julbalej yet masanil eb soldado, lanza, ch'en toctor, makbal txamc'ulej, julbalej c'al jurjubej.

¹⁵ Max say cham eb winak caw jelan yuj watx'nen aj mimek máquina yet owal, cax max watx'nen ajtok bay yibanlak torre, bay yiban muralla bay can ayajok. A bay tu' chi julwaji, c'al k'okon eltok mimek ch'en. Max toj wal is k'umal najat. A Dios max colwaj yetok, xan ayxa is may max yun binaji.

¹⁶ A wal yet max yionxac'al yip yin yikbej, axa maynen aj ba tu', caywal tu' max yun yayc'ayi. Yujtol tenomtak max yut ba bay Jehová Dios, max octok yul templo Cham, yin yak'on tz'a incienso bay altar.

¹⁷ Tzunan yoctok cham sacerdote Azarías yintak, ajun c'apax 80 sacerdote yet Jehová caw wal c'am chi xiwi.

¹⁸ A eb tu' max oc satak cham rey, max yalon eb axca ti' bay: Mamin rey Uzías, ach ti' man opisook ak'on tz'a incienso bay Jehová, palta ayon sacerdote on ti' yinatil on Aarón, sic'bil on oc yin jun opiso ti', xan watx' chach eltok bay jun lugar ti' mamin rey, yujtol mayal oc a yobtakil satak Jehová, xan man ok ach chalay yuj Cham, ẍi eb bay.

¹⁹ A cham rey Uzías, lecan oc bay c'atan altar yet incienso bay yul templo, ibil aj txayib yet incienso yuj. Yak'ban lanan caktzaj oc yin eb cham sacerdote, a wal yet jun bek tu' max txecloj aj lepra yin is nan sat.

²⁰ A yet max yilon cham sat sacerdote, yetokc'al juntzanxa eb tu', tol mayal eltek lepra yin is nan sat cham rey, max yion eltek eb yin aymanil. Max yochej c'apax cham rey tu' chi eltek yin aymanil, yujtol mayal jayoc yailal yiban yuj Jehová.

²¹ Ayc'al lepra yin cham rey Uzías, masantac'al yet max cami, xan tx'oklil max ayji bay junok na, majxa chalay octok yul templo Jehová; axa Jotam is c'ajol max occan is q'uexelok yin yilon despacho, c'al yin yak'on yajawilal bay yul nación tu'.

²² Axa janic'okxa is yabixal cham rey Uzías, yet yichbanil masantac'al is lajubal, max tz'ibej Isaías is chekbej Dios, c'ajol Amoz.

²³ A yet max cam tu', a tu' max mukay bay camposanto yet eb rey, yujtol ay lepra yin, xan maj je' mukon eb bay is panteón eb rey. Lajwi tu' max occan Jotam is c'ajol yin reyal is q'uexelok.