2 Cr 22 - A Txꞌan Biblia Yin Kꞌanjobal 1989

Ocnak Ocozías yin reyal

¹ A masanil eb cajan bay Jerusalén, max yaoc eb Ocozías is lajub c'ajol Joram yin reyal q'uexelok is mam. Max octok jun ti' yin reyal yujtol a eb árabe maxax yak' owal yin Judá, maxax mak' cam eb juntzanxa eb c'ajol Joram, reyal Judá.

² 22 abil is k'inal Ocozías yet max chaon el yich yak'on reyal; junnej abil max yak' reyal bay Jerusalén; Atalía yoc bi is txutx. A xal tu' yitxiquin Omri xal.

^3-4 A rey Ocozías tu', max beybalnej axca beybal Acab yetokc'al yinatil. A is txutx max cuyon yin yobal nabalej, yujtol ay yuj ba yetok Acab tu', xan caw wal yob tzet max yun satak Jehová. A ton eb yican tu' max ak'onc'al c'ul yin yobal, yet toxa max cam is mam tu', yuj tu' xan max tit-xac'al yiban.

⁵ Yujc'al tol max yikej masanil juntzan nabalej tu', xan max junanej Ocozías is nabal yetok Joram, c'ajol Acab reyal Israel, yet max yak'on eb owal yin conob Ramot, yul yet Galaad c'al yin Hazael, reyal Siria. Palta a eb sirio tu' max ak'on yasjok rey Joram.

⁶ A yuj tu' max meltzojtek bay Jezreel yet max ul yantej ba. Tutun tol ya'ay Joram tu', xan max toj rey Ocozías yilon bay Jezreel tu'.

Camichal Ocozías

⁷ Naanxa yuj Dios, tol a yet ok tok Ocozías tu' yilon Joram, a yet tu' ok camok. Ato wal yapni ocok, max eltek yetok Joram yet chi chalej ba yetok cham Jehú, is c'ajol Nimsi. Palta a Jehová, mayal sic'lay el Jehú yuj, yet chi yak'xac'al lajwok el masanil yinatil Acab, yetokc'al masanil yican.

⁸ A yet lanan yunen cham Jehú tu' yochwan Jehová yin yinatil Acab, max ilchajtek eb yajaw yayji bay Judá c'al eb yican Ocozías, a ton eb ajun yetok yet max toj yilon Joram, cax max mak'lay cam eb.

⁹ Max chekon saylay c'apax ec' Ocozías yujtol max c'ubaj el ba bay conob Samaria, max mitx'on eb, axa yiontok eb bay Jehú. A bay tu' max mak'lay camok, palta max muklay yuj eb, yujtol max yal eb tol yinatil Josafat, cham max ak'wi serbil bay Jehová yin masanil is c'ul, ẍi eb. Lajwi tu', c'amxa junokxa xol yican Ocozías maxto je' tec'ban ba yin yoccan yin reyal.

Ocnak Atalía reinailok Judá

¹⁰ A yet max yaben xal Atalía tol mayal cam Ocozías is yune', max yak'on lajwok masanil eb yinatil cham reyal Judá tu'.

¹¹ Palta a xal Josaba, is cutz'in cham rey Joram, a' max ion el Joás nan xol juntzanxa is c'ajol Ocozías, tol toxa ok camok, cax max c'uay el nak bay xal Atalía. A tu' max bet c'uay el nak yetok ix chi ilon ch'ibok bay jun cuarto bay chi way anima bay templo. Caytu' max yunej, xan maj cam nak. A xal Josaba cutz'in rey Joram, yanab Ocozías xal, yistzil cham sacerdote Joiada yayji, a max uten axca tu'.

¹² A bay templo Jehová max c'uay el Joás tu' yetok ix ix max ilon ch'ib yin wakeb abil. Yak'ban tu' a Atalía ayoc yin yajawilal bay nación tu'.