2 Cr 19 - A Txꞌan Biblia Yin Kꞌanjobal 1989

Tenchebalil Josafat yuj is chekbej Dios

¹ A cham Josafat max meltzojtek yin watx'c'ulalil bay is despacho bay Jerusalén.

² Palta a Jehú, jun is chekbej Dios, a ton is c'ajol Hanani, max eltek chaoni, max yalon bay: ¿Tzet yuj xan max ach colwaj yetok jun yob is nabal tu'? ¿Tzet yuj xan watx'xac'al ak'on yetok jun ajc'ul oc yin Jehová? Yuj wal tu' xan mayal tit yowal Cham en.

³ Palta xin, ayto wal juntzanxa tzet yetal watx'to yoc a watx'ilok, yujtol max ak' lajwok yechel Asera ay bay yul a nación ti', yuj c'apax tol max aoc a nabal yin ak'on serbil Dios, ẍi Jehú bay.

Ocnak eb juez yuj Josafat

⁴ A tu' max cajay ec' cham Josafat bay Jerusalén, palta tol beybalnebil yuj, tol chi bet yilc'al is conob, chi tojtac'al bay Beerseba, masantac'al bay siquilal tx'otx' yul yet Efraín, yet chi ilay meltzoj eb yuj bay Jehová is Diosal eb, yetok yichmam.

⁵ Caytu' max yun yalay oc eb juez yuj bay masanil conoblak ayoc is murallail yul yet Judá.

⁶ Max yalon bay eb juez tu' axca ti': Chi cam wal e yilon tzet yetal ok e yunej, yujtol manak yochwan eb anima ok e yunej, palta tol a wal is yochwan Jehová, tol ok occ'al e yetok yin tzet ok e yunej.

⁷ Yuj tu xin, mimanokab yelapnok Jehová yul e sat, chi cam e yilon tzet ok e yunej, yujtol a Jehová co Diosal man ok techaj yuj yilon oc tzet man watx'ok che yunej, yetok c'apaxok yin tol ay q'uexanil anima yul e sat, c'al yin e chaon tumin yin ewantakil, ẍi bay eb.

⁸ Max yaon c'apax oc cham Josafat juntzan eb yajaw yayji xol conob, yetok juntzan eb levita, c'al eb sacerdote cajan ec' bay Jerusalén yin juezal yin cuybanilej atac'ala' ley Jehová, c'al yin watx'nen el eb owal yin juntzanxa tzet yetal xol eb cajan bay Jerusalén tu'.

⁹ Max yak'on juntzan chekbanilej ti' bay eb: Ayex ti', ok e yil e yopiso ti', ayokab yelapnok Jehová yul e sat, yikem exc'al, watx'c'al che yut e ba.

¹⁰ A yet ok jayoc eb cajan bay Jerusalén ti', ma bay juntzanxa conoblak e satak, yuj junok k'anej, ta mak'oj cam anima, ma juntzanokxa tzet yetal chi yun eb tol man atac'alok ley ma chekbanilej, chi cam wal e yalon bay eb tol c'amokab chi oc is mul eb bay Jehová, yet watx' c'am chi tit yowal Cham e yiban ayex ti', c'al yiban eb. Watx'c'al che yut e ba xin, yet c'am chi titcan e yiban.

¹¹ A Amarías sat sacerdote yayji, asannej chi je' yalon tzet chi uj yin yet Jehová, axa Zebadías c'ajol Ismael, yajaw c'apax yayji oc xol eb tribual Judá, asannej chi je' yalon yin tzet chi uj yin yet gobierno. Ay c'apax oc eb levita yin opiso e yetok. Tec'bajek e ba xin, ak'ek e yip yin e yopiso. A mactxel tol watx'c'al tzet ok yunej, ayokab oc Jehová yetok, ẍi cham bay eb.