2 Cr 14 - A Txꞌan Biblia Yin Kꞌanjobal 1989

Ocnak Asa reyalok Judá

¹ A yet max cam Abiam, a tu' max mukay bay conob David. Lajwi tu', max occan Asa is c'ajol yin reyal is q'uexelok. A yul is tiempoal Asa lajoneb abil ay junc'ulal bay is nación.

² A masanil tzet max yun Asa tu', watx'c'al, tojolc'al satak Jehová is Diosal.

³ Max yiel masanil altar yet comon dios eb tx'ok conobal, yetokc'al juntzan lugar yet ayilal bay can ay ajok. Max mak' poj juntzan ch'en ch'en ya' yili yuj eb, max tzoc'on aj te' yechel Asera.

⁴ Max yalon c'apax bay eb yet Judá, tol chi ya wal oc ba eb yul k'ab Jehová is Diosal eb yetok yichmam, tol chi yikej eb is ley c'al is chekbanil.

⁵ Max yiel bay conoblak yul yet Judá juntzan altar yet incienso bay juntzan lugar can ayajok. Ay junc'ulal yul tiempoal yet ayoc yin reyal.

⁶ A wal yet jun tiempoal tu', caw wal junc'ulalxac'al yayji ec' jun nación tu'. C'amxac'al bay max toj eb yin junok owal, yujtol a Jehová max ak'on junc'ulal bay eb, yuj tu' xan max watx'nej aj cham rey Asa juntzan conob tol ayoc is murallail bay Judá.

⁷ Max yalon cham bay masanil eb anima bay Judá tu' axca ti': Co watx'nejek aj juntzan conob ti', co watx'nejek oc muralla yin, c'al torre, c'al puerta ayoc ch'en hierro yijulok. Ayto ec' jun nación ti' yul co k'ab, yujtol yikem on bay Jehová co Diosal. A' max ak'on junc'ulal ayon yetok masanil eb cajan ec' co cawilal ti', ẍi cham. Yuj tu' watx'xac'al max yun yion ba mulnajil.

⁸ Ay 300,000 is soldado Asa bay Judá; ay is makbal julbalej eb, c'al yetok lanza. Ay c'apax 280,000 eb yin yet Benjamín. A juntzan tu' ay c'apax is makbal julbalej eb, yetok is julbal eb. A masanil juntzan tu', soldado wal tol jelan.

⁹ Max tit Zera is reyal Etiopía yin eb, yetok jun millón soldado, yetokc'al 300 carruaje yet owal, max jayoc eb bay Maresa.

¹⁰ Max eltok cham rey Asa yin chalen ba yetok, axa yoc satak tu' yak'on owal bay jobeal yet Sefata, ay cawilal Maresa.

¹¹ Yuj tu xin, max aj yaw Asa bay Jehová is Diosal, max yaloni: Mamin Jehová, ach ti' lajanc'al chi yun a colwaj bay mac tec'an, c'al bay mac c'am wal is tec'anil. Yuj wal tu xin Mamin, colwajan jetok. Ilab tol asannej ach ayach oc yipok co c'ul, xan a wal yin a bi chon jayoc satak jun miman bulan ejército ti'. Ach ti', co Diosal ach, manchak a cha' tec'ban ba eb anima ti' a satak, ẍi cham rey Asa.

¹² Caytu' max yun yak'on Jehová is colwal bay Asa, yetokc'al bay eb yet Judá; max ayc'ay eb etíope yuj eb, yuj tu xin, max elaj eb tu' bay eb.

¹³ Palta max tzaklojc'al Asa, yetok is soldado yintak eb, masantac'al bay Gerar. Xiwil eb etíope max ayc'ayi, majxac'al je' tec'ban ba eb bay satak Jehová, c'al satak eb soldado. Caytu' max yun yioncan eb soldado cham Asa jantakxa is tzet yetal eb ajc'ul tu'.

¹⁴ Lajwi tu' max yak'on eb owal yin masanil yaliẍ conoblak ay cawilal Gerar tu', max ayc'ay juntzan tu' satak eb, yujtol max oc xiwc'ulalil yin eb satak Jehová. Masanil juntzan conoblak tu', max yuch lajwok eb Judá tu', max yiontek eb mimek beyomal ay bay.

¹⁵ Max oc c'apax eb yin campamento bay ay no jobbejal no', tom jantak calnel, c'al camello max yitek eb yet max meltzojtek eb bay Jerusalén.