2 Cr 13 - A Txꞌan Biblia Yin Kꞌanjobal 1989

Ocnak Abiam reyalok Judá

¹ A yet 18 abilxa yoc Jeroboam yin reyal bay Israel, max chaon el yich yak'on Abiam reyal bay Judá.

² Oxeb abil max yak' reyal bay Jerusalén. A is txutx chi yik Micaías is cutz'in Uriel aj Gabaa. Max oc owal yuj Abiam yetok Jeroboam.

³ Max oc Abiam yin owal, ibil oc 400,000 soldado sic'bil el yuj. Axa Jeroboam xin, ibil c'apax oc 800,000 soldado sic'bil el yuj.

⁴ A tu' max yak' eb owal bay siquilal tx'otx' yul yet Efraín. Max ajtok Abiam bay jolom witz Zemaraim. A bay tu' max awji: Ach Jeroboam, yetok e masanil ex israel ayex ec' yetok, abek:

⁵ ¿Tom man e yojtakok tol a Jehová co Diosal ayon israel on ti', max yaoc ikbej yiban co conob yul k'ab cham David, c'al bay yinatil yin tojbalk'inal yin jun trato tol c'am chi je' q'uexlayi?

⁶ Axa Jeroboam c'ajol Nabat, chekbej Salomón, max oc ajc'ulal yin is yajawil.

⁷ Max yaoc ba juntzan isaj winak yob is nabal yetok, max oc eb yin yak'on owal yin Roboam c'ajol Salomón. Yujc'al tol unin winakto, cax c'amto wal is nabal, yuj tu' xan maj je' tec'ban ba satak eb.

⁸ A tinani', che na' tol ok je' e yak'on owal yin ikbej ayoc yuj Jehová, a ton ibil oc juj ayon yinatil on David ti', asan mi yujtol xiwil e bisil, cax ibil oc e yuj juntzan oro yechel wacax max watx'nej Jeroboam tu', tol a ton ayoc e diosalok.

⁹ Tokwal maj e yuktej c'apax el ayex ti' eb sacerdote yet Jehová, a ton eb yinatil Aarón, yetokc'al eb levita, axa eb e sacerdote max e yaoc yul e yet, axca chi beybalnej juntzanxa nación. Tzanc'al mactxel chi jay yetok junok no ach'ej wacax, c'al ukc'onok no calnel, a jun tu' chi alay oc sacerdotealok juntzan comon dios. A juntzan tu' man diosok.

¹⁰ A pax ayon ti', a Jehová co Diosal, c'amc'al bay chi co bekcanok. A juntzan eb sacerdote ayoc yak'on serbil, a ton eb yinatil cham Aarón, axa eb chi colwaj yetok eb, a ton eb levita.

¹¹ A ton eb ti' chi ak'onc'al xajanbal, c'al incienso bay Jehová yet junjun k'inibalil, c'al yet junjun yayc'ualil. Atac'ala' ley, chi yaon c'apax ay eb ixim pan caw wal watx' bay meẍa tol asan Cham ay yet, cax chi yaon c'apax oc eb k'ak'al candil naba oro yet junjun yayc'ualil. Ayon ti' chi jikej wal axca tzet chi yal Jehová co Diosal; axa pax ayex ti', mayal e bekcanok.

¹² Ojtaknejek el xin, tol a Dios chon ikbani; axa eb sacerdote Cham, watx' xa yayji eb yet chi xu eb trompeta yet chi oc owal e yetok ayex ti'. Yuj tu xin, a ayex israel ex ti', manchak e yak' owal yin Jehová co Diosal yetok eb jichmam, yujtol man ok ayc'ay Cham e yuj, ẍi cham Abiam bay eb.

¹³ Palta a Jeroboam xin, mayal yal bay eb yet is cab makan soldado, tol chi yoy ba eb bay yintak eb soldado yet Judá, cax palanxa jayoc eb bay yintak tu', axa pax is pimal eb soldado yet Jeroboam max cancan bay satak eb yet Judá tu'.

¹⁴ A yet max yilon eb yet Judá tu' bay yintak, lananxa jayoc eb soldado, c'al bay satak eb c'apaxok. Caywal tu' max yun yaj yaw eb bay Jehová, max xuon c'apax eb sacerdote tu' is trompeta.

¹⁵ A yet max aj yaw eb yet Judá tu' yin owal, a Dios max ak'on ayc'ay eb yet Jeroboam tu', a ton masanil eb yet israelal max ayc'ay satak Abiam yetokc'al eb yet Judá.

¹⁶ Caytu' max yun yelaj eb israel tu' satak eb yet Judá, yujtol a Dios max aon oc eb yul k'ab eb.

¹⁷ Caw wal xiwil anima max mak' cam Abiam yetokc'al is soldado. 500,000 soldado eb israel sic'bil yayji max ayc'ay yuj eb yet tu'.

¹⁸ Caytu' max yun yayc'ay eb israel yet jun tiempoal tu', axa eb yet Judá xin, max uj yuj eb, yujtol max ya wal oc eb c'ul yin Jehová is Diosal eb yetok yichmam.

¹⁹ Max tzakloj Abiam yintak Jeroboam, cax max yioncan ec' Abiam tu' jayeb conob, a ton Betel, Jesana c'al Efraín, yetokc'al is yaldeail juntzan ti'.

²⁰ A Jeroboam tu', majxa yi yip is yikbej yak'ban yet iquisto ec' Abiam. A Jehová max ak'on lajwok Jeroboam tu', xan max cami.

²¹ Caywal tu' max yun yion yip yikbej Abiam. Canlajonwan yistzil cham; ay 22 c'ajol yetok 16 is cutz'in.

²² A janic'okxa is yabixal cham Abiam tu' yin tzet max yunej, c'al tzet max yala', a tu' tz'ibbilcan bay tx'an un max tz'ibejcan Iddo is chekbej Dios.