2 Cr 1 - A Txꞌan Biblia Yin Kꞌanjobal 1989

A tzet max k'an Salomón

¹ A Salomón, c'ajol cham David, max yi wal yip yin is yikbej, yujtol a Jehová is Diosal ayoc yetok; yelxac'al max aj can is yikbej.

² Yuj tu xin, max yawtej masanil eb yet israelal: a ton eb yajaw yayji yin eb soldado, eb ayoc yin opiso, yetokc'al eb yajaw yayji xol is yican, a ton eb mimek yikbej bay conob Israel.

³ Max waj ba eb masanil bay lugar can ay ajok bay Gabaón yetok cham, yujtol a bay tu' ay is cajlobal Jehová bay chi co chalej co ba yetok Cham, a ton jun max watx'nej cham Moisés is chekbej Dios bay takin tx'otx'.

⁴ A cham rey David maxax yiel is caẍail trato Jehová bay Quiriat-jearim, mayal yitek bay jun mantiado watx'nebil yuj bay Jerusalén.

⁵ A pax jun altar naba bronce max watx'nej Bezaleel, is c'ajol Uri, is yitxiquin Hur, a tu' ay bay Gabaón, bay satak cajlobal Jehová. Max toj cham rey Salomón yetok masanil conob bay tu' yet chi toj eb k'anlej yab bay Dios.

⁶ Max ajapnok Salomón bay ayic' jun altar bronce satak Jehová, a ton bay satak jun mantiado bay chi co chalej co ba yetok Cham. Max yak'on tz'a 1,000 no xajanbal bay Cham yiban jun altar tu'.

⁷ A yet jun ak'bal tu' max tx'ox ba Jehová bay Salomón, max yalon bay: K'an ayin tzet yetal chi yochej a c'ul, cax ok wak'on ayach, ẍi Cham bay.

⁸ Max tak'wi Salomón bay Dios: Ach ti' Mamin, yelxac'al max a camc'ulnej David in mam. Ayinxa max in aoc yin reyal q'uexelok.

⁹ A tinani' ach Jehová in Diosal, yunokab tzet yetal max al bay in mam tu', yak'ban tol max quin aoc yin reyal yin jun miman conob tol lajanxac'al is bisil axca pokokal tx'otx' tx'otx'.

¹⁰ Yuj wal tu' xan chi wochej, tol a in jelanil c'al in nabal chak'a', yet chi je' wikban jun conob ti'. Tok ay junok mactxel chi je' yak'on yajawil yin jun a miman conob ti' yul yet, ẍi Salomón.

¹¹ Max tak'wi pax Dios bay Salomón: Yujtol a jun ti' max yochej a c'ul, cax manak a beyomal, tamwal a mimanbilal, tamwal is camichal eb ajc'ul oc en max a k'ana'. Yetok c'apaxok, manak a cawil max a k'ana'; palta max a k'an a jelanil, c'al a nabal yet ok je' ak'on yajawilal yiban in conob bay max ach waoc yin reyal,

¹² ti' wal ok wak' a jelanil, c'al a nabal, cax ok wak'on c'apax a beyomal, c'al a mimanbilal. C'am junokxa rey lajan axca ach ach ti' yet yalantok, tamwal ayto junokxa axca ach ti' yet ok beyc'altok ti', ẍi Jehová.

¹³ Lajwi tu' max meltzojtek Salomón bay ay cajlobal Dios bay jun lugar can ayaj bay Gabaón, max jayoc bay Jerusalén, axa yocxac'al yin reyal bay conob Israel tu'.

Is beyomal cham rey Salomón

¹⁴ Max wajbaj ec' cham rey Salomón tu' xiwil carruaje yet owal c'al no chej. Ay 1,400 carruaje yetok 12,000 no chej ikom soldado. Ay carruaje c'al no chej ayic' bay juntzan conoblak tol yetc'alta' juntzan tu' yayji ocok. Ay c'apax juntzan tu' yetok eb soldado chi taynen cham rey bay Jerusalén.

¹⁵ Manxa jantakok plata c'al oro max waj cham rey bay Jerusalén, axcaxa comon ch'en yayji, manxa jantakok c'apax te c'ute' axcaxac'al te yichlakil teal higo bay pananil yichlak witz, cayxac'al tu' yayji te'.

¹⁶ A no chej cham rey Salomón tu', a tu' max manlaytek no' bay Egipto, c'al bay Cilicia; a eb is txonjom cham rey max manon bay tu'.

¹⁷ A is tojol junok carruaje titnak bay Egipto, 600 siclo plata, axa tojol junok no chej, 150 siclo plata. Axa masanil eb reyal eb hitita c'al eb sirio max manon el bay eb txonjom cham Salomón.