2 Co 3 - A Txꞌan Biblia Yin Kꞌanjobal 1989

Yabixal jun is trato Dios tolto max oqui

¹ A yet chi jalontok juntzan ti' ayex, ¿chi mi e na' tol lanan jalon oc co ba watx'il ayex? Man yowalilok chi co tx'ox co carta chon abenen oc ayex tamwal yowalil chi co k'an e carta chex abenen oc ayon axca chi yut ba juntzanxa eb.

² Yujtol ayex caw lanan e tx'oxk'abnen elok, tol ay ton jopiso. Lajan ex axca junok carta tz'ibbil oc yin janimail, yujtol chi je' yilon masanil anima tzet e yayji.

³ Axca junok carta tz'ibbilcan yuj Cristo, ayonxa inen ocok, cayex tu'. A jun axca carta ti', man tintaok tz'ibnejcanok, palta tol a Cham Yespíritu Dios iquisc'al tojbalk'inal, a' tz'ibnejcanok. Man yinok ch'en tz'ibbilcanok, palta tol a yin janimail tz'ibbilcan ocok.

⁴ Yuj Cristo xan ay yip co c'ul junjun on satak Dios, tol axca tu' jayji.

⁵ C'am chi co na on tol chi je' juj yul jet co tx'oklil, palta asan yuj ayoc Dios jetok, xan chi je' juj junok tzet yetal.

⁶ A ak'nej jopiso jak'on serbil yin watx'il, c'al jaloncan el yabixal jun is cab trato. A jun is trato ti', man yujok jiken junok tzet yetal tz'ibbilcanok, xan chi yuncan elok, palta asan yuj Cham Yespíritu Dios xan chi je' yunencan elok. A jun ley tz'ibbilcanok, asannej yopiso yaon oc camich jiban, palta a Cham Yespíritu Dios xin, yopiso Cham yak'on co k'inal tol ayc'al yin tojbalk'inal.

⁷ A ley Moisés tz'ibbilcan yin ch'enej patxan yayji. A yet max ak'laycan jun ley tu', max jayoc jopnaj tzekekial Dios yet max ak'laycan tu', xan majxa je' yoc t'anan eb wet israelal yin sat Moisés, yujtol chi tzekeki c'apaxok. Palta c'ojanc'ulal max ay tananok tzekekial jun chi tzekeki tu'.*fn* Caxc'al ay yopiso jun ley tu' con yak'on camok, palta miman yelapnok yet max jayi.

⁸ Ta miman yelapnok jun ley tu' yet max jayi, yelxac'al miman yelapnok jun abix max yi jay Cham Yespíritu Dios ayon.

⁹ A jun ley tu', caxc'al chi yaoc camich yiban anima palta mimanc'alta' yelapnok. Akxam wal jun abix chi aloni tol watx' on satak Dios.

¹⁰ Caxc'al ay yelapnok jun ley tu', palta c'amxa yelapnok yul sat junxa ti', yujtol yelxac'al miman yelapnok jun ti'.

¹¹ Ta miman yelapnok jun tol txennej tiempoal max k'anabax tu', akxam wal jun tol ayc'al ec' yin tojbalk'inal ti'.

¹² Yuj wal tol max jaoc jun ti' yipok co c'ul, yuj tu' xan c'am chon xiw jalon elok.

¹³ Manchak jut co ba axca yutnak ba Moisés. Makchejnak el sat yetok jun k'ap, yet watx' c'amxa chi yil eb wet israelal yet chi lajwi ay k'ak'al jopopial sat, yujtol c'ojanc'ulal max ay tananok jopopial tu'.

¹⁴ Majc'al nachaj el yuj eb tzet max al-lay bay eb yujtol k'ekk'inal ay nabal eb. Ac'ala' tinani', a yet chi awtelay tx'an Un bay tz'ib yayjican jun is babel trato Dios yab eb wet israelal, c'am chi nachaj el yuj eb, yujtol axca wal junok k'ap tu' ayto oc maksatok eb. A jun tzet axca k'ap tu', c'am chi eli, yujtol asan Cristo chi je' yion elok.

¹⁵ Toltax tinani', a yet chi yaben eb yawtelay tx'an libro Moisés, axca tol ayc'al oc makil nabal eb tu'.

¹⁶ Palta a yet chon meltzoj bay Cham Jajawil, chi ilay el jun axca maksatej tu' yin co nabal.

¹⁷ A Cham Jajawil max binaj tu', a ton Cham Espíritu. A mac bay ayoc Cham Yespíritu Cham Jajawil Jesucristo yin, jakanxa sat eb, cax bekanxa yilon eb.

¹⁸ Yuj tu' xan c'amxa oc jun axca maksatej tu' yin co sat co masanil. A tinani', lajan onxa axca jun ch'en espejo, yujtol a jin chi txecloj el watx'il Cham Jajawil. Yuj tu', lananxa tz'aknaj el co watx'il axca is watx'il Cristo yuj Cham Jajawil, a ton Cham Espíritu.