2 Co 2 - A Txꞌan Biblia Yin Kꞌanjobal 1989

¹ Yuj tu' xan max in na', tol maj inxa tok ayex tu' yin calan cusc'ulalil.

² Yujtol ta chex toj in tx'em cusok, ¿mac pax ok je' yak'on mimanil in c'ul? Yuj tu' xan maj yal in c'ul chex toj in tx'em cusok, yujtol asan ex ok je' e yak'on mimanil in c'ul.

³ Yuj tu' xan axca tu' max wut in tz'ibentok ayex yin jun tx'an in carta, yet watx' a yet chin apni oc ex wiloni, c'amokab chin cusaj e yuj, tol e moj e yak'on tzalojbok in c'ul. Chi waoc yipok in c'ul, tol ta chin tzaloj aj ayin ti', ayex jun chex tzaloj aj wetok.

⁴ A yet max in tz'ibentok jun in carta tu' ayex, caw wal chin oc il e yuj. Caw chi yab yail in c'ul e yuj, toltax chin ok' e yuj bian. Palta man yujok ex in tx'emon cusok xan max in tz'ibejtok ayex. Max in tz'ibejtok ayex, yet watx' che yojtaknej elok, tol chi camil in c'ul e yin sic'libil.

Mimanc'ulal yin jun nak max oc is yobtakil

⁵ Ay ton jun mac max tx'emon cus co c'ul. Man asannejok in max cus in c'ul yuj, palta ayex jun max tx'emlay cus e c'ul janic' yuj. Janic' quin chi, yujtol c'am chi wochej tol chi ajc'al can yiban nak.

⁶ A is yailal nak max e yaoc yiban yet max e wajban oc e ba, k'okbilokabi.

⁷ Axa tinani xin, yel mi watx' che yak' mimanc'ulal yiban nak, cax che mimanc'ulneni, yet watx' c'am chi somchaj el c'ul yuj cusc'ulal.

⁸ Yuj tu' chin tewitok ayex tol che tx'ox e camc'ulal bay nak junelxa.

⁹ Yuj jun tu' xan max in tz'ibejtok jun in carta ayex yet yalantok, yuj ex wak'on porobal, yujtol chi wochej chi wojtaknej elok, ta che yikej masanil tzet chi wala'.

¹⁰ Axa tinani', a mac che yak' mimanc'ulal yin yuj junok tzet yetal yob max el yuneni, ok wak' c'apax mimanc'ulal yin. Caxc'al manak ayin chi oc mul, palta e yujc'al, xan ok wak' mimanc'ulal yin, yul sat Cristo.

¹¹ Caytu' chi wutej, yet watx' c'am chon yak' ayc'ay Satanás, yujtol jojtakxa tzet is nabal nak jin.

Is somc'ulal Pablo bay conob Troas

¹² A yet max quin apni oc bay conob Troas yuj walon el yabixal Cristo, caw bekanc'al in mulnaj yin yet Cham Jajawil bay tu'.

¹³ Palta max oc jabok in somc'ulal, yujtol maj ilchaj juẍtak Tito wuj bay tu'. Yuj tu', max in tak'elejcan in ba yetok eb creyente, max in el bay tu', axa in jay bay Macedonia ti'.

A Cristo chi oc jetok, xan chi uj juj

¹⁴ Palta jalek yuj diosalil bay Dios, yujtol masanil tiempo chic'al je' co tx'oxk'abnen elok, tol caw miman yelapnok Cristo Jesús, yujtol max ujc'al yuj. Chon is k'anbalnej, yet watx' chi pukax el yabixal bay junjun lugar, axca chi yun yel jab junok tzet yetal suk'uk'ixac'al yoc jab.

¹⁵ Axca yoc jab junok incienso chi yak' Cristo bay Dios, caw suk'uk'i jab, cayon tu' yet lanan ec' jalon el yabixal bay eb lanan colchaji, c'al bay eb lananto c'ayic'ok.

¹⁶ A yet chi jalon bay eb chi c'ayic'ok, lajan yoc jabil axca junok tzet yetal chon cam yuj, chi yab eb. Axa yet chi jalon bay eb chi colchaji, lajan yabixal tu' axca junok tzet caw suk'uk'i yoc jab chi yab eb, yujtol lanan chaon eb is k'inal yuj. Yuj tu', ¿mac wal junok ok je' yalon el jun abix ti'?

¹⁷ Ayon ti' chi je' juj, yujtol man yujok jion tumin yin k'anej Dios, xan chi ec' jalilok, axca chi yut ba nanxa eb. Mimanokc'al chi ec' yal eb, palta soman chi yut yalon eb. Palta ayon ti', yin masanil co c'ul chi ec' jalilok, yujtol ak'bil jopiso yuj Dios jalon elok. Satak Dios chi ec' jalilok, yujtol yet onxa Cristo e yetok.