Yet Is Cab Libroal Cham Samuel 8 - A Txꞌan Biblia Yin Kꞌanjobal 1989

Ocnakc'al cham rey David yin owal

¹ Max yak' David owal yetok eb filisteo, max yion ec' yikbej eb, axa cancan eb yul k'ab cham tu'.

² Max ay c'apax c'ay eb moabita yuj. Max cheklay ay latz'an masanil eb yuj bay sat tx'otx', axa yechen yetok jun tx'an. A jantak mac chi cancan bay yul cab tx'anil chi cami, axa mac chi cancan yul yet is yox tx'anil xin, c'am chi cami. Caytu' max yun cancan eb moabita yalan is yikbej cham rey David. Max occan eb yin tojlabal.

³ Max yak' cham rey David owal yetok cham reyal Soba, a ton Hadad-ezer is c'ajol Rehob, yet lanan toj Hadad-ezer tu' yion pax ec' is makbej bay a' miman aej Éufrates.

⁴ Max yitek cham rey David 1,700 eb soldado tu' yin presoal, a ton eb ayoc yiban chej, yetok c'apax 20,000 eb toc'al chi beyi. Max c'upon c'apax tok tx'anil yakan no chej inej oc carruaje yet owal, asanxanej no' tol yowalil chi k'anlay yin 100 carruaje max can yuj.

⁵ Ayman max apni oc eb sirio max tit bay Damasco colwaj yetok Hadad-ezer, palta max ayc'ay eb sirio tu' yuj cham rey David, max cam 22,000 eb yuj.

⁶ Ayman max yaoc cham rey David eb soldado taynemalok is makbej eb tu', caytu' max yun cancan eb sirio yul k'ab cham, max oc eb yak'on tojlabal. Axca ton tu' max yun yak'on Jehová is colwal bay cham, tzanc'al bay max toj yak' owal max ayc'ayc'al eb yuj.

⁷ Max lajwi tu' max yioncan ec' cham rey David makbal julbalej ayoc oro yin yet eb soldado Hadad-ezer, max yiontek bay Jerusalén.

⁸ Caw wal miman ch'en bronce max yi' c'apax bay conob Beta c'al bay Berotai, a ton juntzan conob tu' ay yul is makbej Hadad-ezer.

⁹ A pax Toi, reyal Amat xin, max yabej tol mayal lajwi masanil eb is soldado Hadad-ezer yuj cham rey David.

¹⁰ Xan max chektok is c'ajol chi yik Joram bay cham rey David, yetok plata, oro, c'al bronce, yuj yak'lay cawil c'ul, c'al yuj yilay aj can yujtol max ayc'ay Hadad-ezer yuj, yujtol a Toi tu' max yak'c'al owal yetok.

¹¹ A masanil juntzan ch'en max cha' bay Toi tu' max yak' cham rey David bay Jehová, yetokc'al ch'en oro c'al ch'en plata max tit bay masanil juntzanxa nacionlak max ayc'ay yuj:

¹² a ton bay Edom, bay Moab, bay eb amonita, bay eb filisteo, bay eb amalecita, c'al ch'en max ec'can yet max oc owal yetok Hadad-ezer is c'ajol Rehob, a ton reyal Soba.

¹³ Caw wal miman max yun binaj cham rey David a yet max meltzojtek yin yak'on owal yin eb edomita, 18,000 eb max ayc'ay yuj bay yac'alil yet atz'am.

¹⁴ Ayman max yaoc cham eb soldado taynemalok bay Edom. Masanil eb edomita max cancan eb yul k'ab cham rey David. A Jehová max colwaj yetok tzanc'al bay chi toj yin owal.

Eb is chekbej cham rey David

¹⁵ A cham rey David max yak' reyal yin tojolal c'al yin watx'il bay xol eb israel is yet conob.

¹⁶ A is yajawil eb soldado, a ton cham Joab is yune' xal Sarvia. Axa Josafat, is c'ajol Ahilud, a jun ti' max yak' ajtz'ibal bay cham rey.

¹⁷ Axa pax Sadoc is c'ajol Ahitob, yetok Ahimelec is c'ajol Abiatar, a juntzan eb tu' sacerdote yayji. Axa Seraías xin, max tz'ibej yabixal tzetak max yun cham rey.

¹⁸ Axa pax Benaía is c'ajol Joiada, yajaw yayji yiban eb soldado chi taynen cham rey, a ton eb cereteo c'al eb peleteo, axa eb c'ajol cham rey David, sat yajaw yayji eb.