Yet Is Cab Libroal Cham Samuel 4 - A Txꞌan Biblia Yin Kꞌanjobal 1989

Camichal cham Is-boset

¹ A yet max yaben Is-boset, is c'ajol Saúl, tol mayal cam Abner bay Hebrón, max paxxac'al yip junelnej, yuj xiwilal; caw wal max xiw c'apax aj masanil eb yet israelal yuj.

² Ay cawan is chekbej Is-boset yajaw yayji eb yin jun bulan soldado elk'om. Ay jun chi yik Baana, axa junxa xin, chi yik Recab. A eb tu' is c'ajol Rimón cajan bay Beerot yul is makbej tribual Benjamín. (A yinatil eb anima cajaynak bay Beerot chi al-layi tol yinatil Benjamín eb.

³ Asan tol max elaj eb max tojcan eb bay Gitaim, a ton bay tu' ayic' eb yin ec'jabwomc'al.)

⁴ (A Jonatán is c'ajol Saúl ay jun is c'ajol chi yik Mefi-boset. A jun ti' man watx'ok is yakan cabil. A yet oyebxa abil jun Mefi-boset tu', max tit yabixal bay Jezreel tol a Saúl yetok Jonatán mayal cam eb, xan max ilay aj Mefi-boset yuj jun ix chi ilon ch'ibok, cax max toj eb elaj yaloni. Yujtol max yak' yip yelajok, max bekon ay ix, caytu' max yun yetaxcan el yakan.)

⁵ A Recab c'al Baana tu', max toj eb bay yatut Is-boset. Chuman wal c'u, lanan chi way bay is tx'at yet chi xew janic'ok.

⁶ Axa pax ix taynem ti' puerta xin, c'uxanc'al aytok ix xuoj trigo, axa max yunajok, max wayaj ix bay tu', a wal yet tu' max octok Recab yetok yuẍtak bay chi way Is-boset yin tol c'am junok mac max iloni.

⁷ A yet max octok eb bay yul na tu', max yilon eb tol telan aj Is-boset way bay is tx'at. Caytu' max yun mak'on cam eb, max tzoc'on el eb is jolom, max yiontok eb yetok. Max bey eb masanil ak'bal bay chi toj beal Arabá

⁸ yet chi toj yak'on eb bay cham rey David; a tu' ayic' cham bay Hebrón. Max yalon eb bay axca ti': —Mamin rey, max jitek is jolom Is-boset is c'ajol Saúl, cham ajc'ul oc en tol max yochej max ach mak' camok. Palta a tinani' max el yin c'ul Jehová yak'on ayach yin a pakon a ba yin Saúl c'al yin yinatil, ẍi eb.

⁹ Max tak'wi cham rey David tu' bay eb: —Chi waoc Jehová Cham max in colon el bay masanil in bilc'ulal in testigook tol

¹⁰ a yet max jayoc jun winak bay Siclag yet max yiontek watx' abix ayin yaloni, a ton yuj is camichal Saúl, max in chek mitx'layok, max mak'lay camok. A ton wal paktzebal max wak' bay tu' yuj jun watx' abix max yitek ayin tu'.

¹¹ Yuj tu' xan caywal tu' ok wun c'apax e yetok ayex ti'. Caw wal yob ex ayex ti', max e mak' cam jun winak tol c'am is mul yak'ban chi way bay yatut. Yuj wal tu' ok in paktzej wal is camichal tu' ayex. Junelnej ok wak' c'ayil e binaj bay yulyibank'inal ti', ẍi cham.

¹² Max lajwi tu xin, max chekon cham rey eb is soldado tol chi mak'lay cam eb, max tzoc'lay el k'ab eb c'al yakan eb, cax max aj locan is mimanil eb bay wajan a' aej bay Hebrón. Lajwi tu' max yiontok eb soldado is jolom Is-boset max mukon eb bay mukan Abner, bay Hebrón tu'.