Yet Is Cab Libroal Cham Samuel 22 - A Txꞌan Biblia Yin Kꞌanjobal 1989

Bit cham rey David yuj max uj yak'on owal

¹ Max bitnej cham rey David jun bit ti' yet c'ual max col-lay el yuj Jehová bay yul k'ab Saúl c'al yul k'ab juntzanxa yajc'ul.

² Max yalon axca ti' yin is bit bay Jehová: Ach Jehová, axca tol in nach'en ach, axca tol in cuartel ach, in Colomal ach.

³ Ach in Diosal, in mayk'ak'al ach, a en chin col in ba. In taynemal ach, in Colomal ach tol ay epalil. Oj xan c'am chin michchaj yuj eb ajc'ul. Ach in Colomal, ach max in a col bay mac max yochej max in c'ayon elok.

⁴ Ok wal in ba ayach, tol a moj wal a bitnelayi, catawal tu' ok in colchaj yul k'ab eb ajc'ul.

⁵ A is may yet camich max oymoj oc win. Max jay xiwc'ulal win satak eb c'aywajwom xiwil yip.

⁶ A camich axca tol mayal c'aloc lasu win. A yolanil camich axca tol max watx'nej in yalil.

⁷ Max wal in ba bay Jehová yet ayin tok xol in somc'ulal. Max in k'an colwal bay in Diosal. A bay is templo Cham max quin yabej. Max apni waw bay is txiquin Cham.

⁸ Catatu' max ec' jun miman quixcab puch ow. Yelc'ulal max bil xeal-lak satcan. Max cam tziclayi yuj yowal Cham.

⁹ Max eltek mub yul is txam, axa yul is ti' max eltek k'ak'ej tol c'aywajwom. Max eltek jul-lajbok tzak'ak' yul is ti'.

¹⁰ Max eltek jucnaj Cham bay satcan cax max ayolok. Mimek k'ek asun ayoc yalan yakan.

¹¹ Ayaj yiban jun querubín, cax max toj jupupok, max toj batxatxok yiban cak'ek'.

¹² Axca tol c'uan el bay tu', bay xiwil k'ekk'olinakil. Max c'ubaj el ba xol k'ek asun tol nojnak el yuj aej.

¹³ Yuj jopopial sat Cham max chawaj k'ak'al tzak'ak'.

¹⁴ A Jehová, Cham Axac'al Ocok, max el yaw axca wal bil c'u bay satcanlak.

¹⁵ Max yatok is julbal, axa eb ajc'ul max uchchajtok. Max yatok is rayo, max uktelay el eb yuj.

¹⁶ A yich a' mar max txecloji. Axa xeal yulyibank'inal ti' max jakayi, cax max txecloji yuj can yul is nuk' Jehová, tol ay is may. Yuj c'apax jun cak'ek' puch ow max yatok.

¹⁷ Max batxbajtek Dios is k'ab ayin tac'al bay satcan tu', axca tol max in yitek Cham bay a' najab miman yich.

¹⁸ Max in is colcan el Cham bay eb ajc'ul xiwil yip, tol c'am chin is yochej eb, cax yelxac'al tec'an waay eb wintak.

¹⁹ Max oc bulnaj eb win yet ayin oc yin ok'balc'ulal, palta axa Cham Jehová max oc wetok.

²⁰ Max in yican eltek Cham, cax max in yaoncan bay colan. Max in is col Cham, yujtol chin is camc'ulnej.

²¹ A Jehová max yak' in paktzil, atac'ala' in tojolal. Max yak' watx'c'ulal ayin yujtol c'am in mul.

²² Yujtol max wikej is beybal Cham, yel wal maj wak' yobc'ulal wion el in ba bay in Diosal.

²³ A in satak ayic' masanil is cuybej Cham, cax c'amc'al chin el bay is k'anej.

²⁴ Watx'c'al in beybal satak Cham. Max in taynej in ba yet c'am chin ayc'ay yin yobtakil.

²⁵ Tix wal yuj tu xin, max yak' Jehová paktzil ayin atac'ala' in tojolal, yujtol c'am in mul yul sat Cham.

²⁶ Mamin, a mac ikem ayach, chi yunc'al a k'anej bay. Axa mac watx' yochwan, watx' c'apax ochwan bay.

²⁷ Watx' a beybal bay mac watx' is beybal, palta cha tx'ox a jelanil yin a tenon ec' nabal eb etnem anima,

²⁸ yujtol ach cha col eb ayilwom, cax cheon ay eb lues.

²⁹ Mamin Jehová, ach ton ok ak' sakk'inal ayin. Ach in Diosal, ach ok ecan el k'ekk'inal win.

³⁰ Yuj a colwal chi wuchcantok eb soldado, cax chin ec'can el yiban murallail conob.

³¹ Yelxac'al tol watx' beybal Jehová Dios. A yalben Cham moj wal tol c'am cabc'ulal yin. Chi colcan el Cham masanil mactxel yipc'ulej yayji Cham yuj.

³² Tokwal ay junokxa Dios yintak Jehová. Tokwal ay junokxa colwajwom yintak co Diosal.

³³ A Dios chi ak'onc'al wip. A Cham chi watx'nen in be.

³⁴ Axca bey tx'ucchej, chi yun in bey yuj Cham. Tec'an in waay yuj bay yelxac'al satlak witz.

³⁵ A Cham chin k'aytzen yin owal cax chi yak'on wip yin in pakon julbalej tol bronce.

³⁶ Ach Mamin chin a c'ubaj, cax chin a coloni. A wal watx'il a c'ul max quin ion aj can.

³⁷ Max quin aoc yul jun be lean, yet watx' c'am chin aj jabnajok.

³⁸ Max wuktej ec' eb ajc'ul oc win, max ton michchaj eb wuj, cax maj in oc wanajok masantac'al max cam eb wuj.

³⁹ Coc'xac'al max wutcantok eb yet watx' manchakxa aj wan eb. A xol wakan max ayc'ay eb.

⁴⁰ Ach ton max ak' wip yet max in ak'wi owal. A eb max caktzaj oc win, max acan oc eb yul in k'ab.

⁴¹ Ach max a chekcan el eb ajc'ul oc win in satak, a xan max je' wuj in c'ayon el eb c'am chin ocheni.

⁴² Max k'an eb colwal; c'am mactxel max colon el eb. Max yal ba eb bay Jehová, palta maj tak'wok Cham bay eb.

⁴³ Max coc'axtok eb wuj, axca wal pokok chi ilaytok yuj cak'ek'. Max in tec'can ay eb, axca wal tec'lay ay tz'otz'ew yulak be.

⁴⁴ Max quin a colcan el bay yowal eb conob, max in acan oc yajawilok mimek conoblak. A eb anima man wojtakok, chin ak'on serbil.

⁴⁵ A yet chi yaben eb wabixal, ikem eb ayin. A eb tx'ok conobal, chi yaoc ba eb yul in k'ab.

⁴⁶ Chi xiwcan aj eb cax chi bilaj eb. Chi eltek eb yul is cuartel.

⁴⁷ Iquis ec' Jehová. ¡Al-layokab watx' k'anej bay in Colomal! ¡Ilayokab can Dios Cham in Colomal yayji!

⁴⁸ Chi paktzej Cham bay eb chin etneni, cax chi yiontek eb conoblak yalan wikbej.

⁴⁹ A Cham chin colon el bay yowal c'ul eb ajc'ul oc win, eb max caktzaj oc win. Mamin, ach ton chin a col bay nak yaxc'ayinak c'ul win.

⁵⁰ Yuj wal tu xin, chi wal watx' k'anej en xol mimek conob, xan chach in bitnej.

⁵¹ Oj wali xan chi ayc'ay mimek owal wuj ayin rey in, sic'bil in oj ti'. Yinc'al camc'ulalil chach beytok wetok ayin David in ti' c'al yetok winatil yin tojbalk'inal, ẍi David.