Yet Is Cab Libroal Cham Samuel 21 - A Txꞌan Biblia Yin Kꞌanjobal 1989

Paktzebal yuj eb gabaonita

¹ A yul is tiempoal cham rey David ay oxeb abil wajil max yak'a', xan max k'anlej cham bay Jehová tzet yayji ocok. Max yalon Jehová bay: A jun wajil ti', a yuj e yaben yail yuj jantak anima max cam yuj Saúl yetokc'al is yinatil, yujtol max mak'lay cam eb gabaonita yuj, ẍi Jehová.

² Yuj tu' max awtelay eb gabaonita yuj cham rey David yet chi k'anjab yetok eb. (A eb gabaonita tu' man israelok eb, palta tol a jun bulan eb amorreo maxto cani, bay maxax yak' eb israel is ti' tol c'am chi c'aylay el eb yuj eb. Axa pax cham Saúl xin, max yak'lej c'ayon el eb yuj is watx'ilok Israel c'al Judá yaloni.)

³ Max k'anlen cham David bay eb: —¿Tzet yetal watx' chi wun e yetok? ¿Tzet wal chi yun in paktzen ayex yuj bay max quex etaxi, yet watx' chi yak' Jehová watx'c'ulalil yiban co conob ti'? ẍi cham.

⁴ Max tak'wi eb gabaonita bay axca ti': —Man tuminok c'anan can juj yetok cham Saúl yetok is yinatil, c'am c'apax chi yochej co c'ul tol ay mac chi cam bay xol conob Israel, ẍi eb. Max yalon pax cham rey David bay eb: —Alek ayin xin, tzet yetal che yochej chi wun e yetok, ẍi.

⁵ Max tak'wi eb bay axca ti': —Chi jochej che yaoc ukwanok is yinatil Saúl yul co k'ab, a ton cham max yochej max on yak' lajwok, max na tzet chi yun co c'ayilok yet watx' c'am chon ayji ec' bay yul e tx'otx'al ayex israel ex ti'.

⁶ A eb ukwan tu' ok co locbaj aj eb satak Jehová bay Gabaa is conobal cham Saúl, a ton cham sic'bil el yuj Jehová, ẍi eb. Xan max tak'wej cham rey yak'on eb tu'.

⁷ Maj ak'lay Mefi-boset yul k'ab eb, yujtol a ton jun tu' is c'ajol Jonatán, yitxiquin cham Saúl, yujc'al is ti' David max yak'lej satak Jehová yetok Jonatán.

⁸ Max mitx'on cham rey eb cawan yune' xal Rizpa is cutz'in Aja, a ton juntzan yune' xal tu' yetok cham Saúl, a ton eb chi yik Armoni c'al Mefi-boset. Max mitx'on c'apax eb owan yune' xal is cutz'in Saúl chi yik Merab a ton yune' xal yetok cham Adriel, a ton cham tu' is c'ajol cham Barzilai, aj Mehola.

⁹ Max alay oc eb yul k'ab eb aj Gabaón. A eb tu' max locban aj eb ukwan tu' satak Jehová bay jolom witz, caytu' max yun cam eb ukwan tu' yet tiempoal wal chalay el yich jolay ixim cebada.

¹⁰ Axa xal Rizpa, is cutz'in Aja, max watx'nej jun is lanchu yetok juntzan axca coẍtal caw wal el bay max ayji ec' bay jolom jun ch'en ch'en bay ayic' is mimanil eb camnak tu'. A bay tu' max cancan xal yet max el yich jolay ixim cebada, masantac'al yet max jay nabil k'inal. C'am chi cha jay xal no ostoc yin juntzan mimanilej tu' yet chi ec' c'u, tamwal no' chiwajwom no' chi cha jay xal yet chi ec' ak'bal.

¹¹ A yet max al-lay bay cham rey David tzet yetal chi yun xal Rizpa is yistzilben Saúl,

¹² max chekon cham toj ilaytek is bakil Saúl yetokc'al yet Jonatán is c'ajol bay conob Jabes yul yet Galaad. A tu' ay bay tu' yujtol a eb aj Jabes tu' maxax bet iontek bay cawilal txonbal yet Bet-sán, bay locan aj yuj eb filisteo, yet max lajwi mak'on cam eb xol owal bay Gilboa.

¹³ Max chekon cham rey yilaytok is bakil Saúl yetok yet Jonatán, cax chi ilay c'apaxtok is bakil eb ukwan max aj locan tu'.

¹⁴ Max muklay is bakil Saúl yetok yet Jonatán bay mukan cham Cis is mam Saúl tu', a ton bay Zela, yul yet Benjamín. Max yun axca yalon cham rey tu'. Lajwi masanil juntzan tu xin, max chaon c'ul Dios tzet max k'an cham rey yuj is watx'ilok conob.

A Abisai max colon cham rey David

¹⁵ Max oc pax eb filisteo yak'on owal yin eb israel, xan max toj pax cham rey David yetok eb is soldado yin owal yin eb, palta a cham rey David tu xin, yelxac'al max c'unbi ajok.

¹⁶ Ay jun winak chi yik Isbi-benob, yinatil eb mimek tel, a jun tu' max yochej max mak'on cam cham. A is lanza ec'ban ukeb libra yalil, axa yin is cinturón ibil oc jun ac' espada yuj.

¹⁷ A pax Abisai is yune' xal Sarvia, a jun tu' max colon el cham rey David, max mak'lay cam jun filisteo tu' yuj, xan max yak' eb is soldado cham rey David is ti' tol c'amxa chi eltok cham yin ak'oj owal yetok eb, yet watx' c'am chi c'ayil mac ayok yipok co c'ul ayon israel on ti', ẍi eb.

Ocnak owal yetok eb mimek winak

¹⁸ Max lajwi tu xin, max oc pax junxa owal yetok eb filisteo bay Gob. A yet jun tiempoal tu', a Sibecai aj Husa max mak'on cam Saf. A jun tu' yinatil eb mimek winak.

¹⁹ Ay c'apax junxa owal yin eb filisteo, ac'ala' bay Gob tu'. A jun Elhanán is c'ajol Jair, aj Belén, a' max mak'on cam Goliat jun aj Gat. A is teal lanza jun tu' lajan yin axca te te' bay chi oc tx'al yin chembal.

²⁰ A bay Gat max oc c'apax junxa owal. Ay jun winak caw wal miman is tel bay tu', yinatil eb mimek winak. A jun tu' ay lajcaweb yiximal is k'ab, ay c'apax lajcaweb yiximal yakan.

²¹ Caw wal max buchwaj nak yin eb soldado Israel, xan a Jonatán is c'ajol Simea is yuẍtak cham rey David max mak'on camok.

²² A canwan eb mimek winak tu' is yinatil Refa eb, a ton jun aj Gat, palta a eb tu' max ayc'ay eb yul k'ab cham rey David yetokc'al yul k'ab eb is soldado.