Yet Is Cab Libroal Cham Samuel 15 - A Txꞌan Biblia Yin Kꞌanjobal 1989

Meltzojnak oc Absalón ajc'ulal yin is mam

¹ A yet max lajwi yec'tok jun tiempoal, max watx'nej Absalón jun carruaje chi tok'lay yuj chej cax max sayon 50 eb winak max oc yetok.

² Junjunc'al c'u chi pet aj wan, chi bet oc lecan bay puertail conob. Junjunc'al mactxel chi octek yuj ul watx'nen is k'anej bay cham rey, chi mitx'lay oc waan eb yuj, cax chi k'anlen bay eb tzet conobal eb. A yet chi yalon eb bay tzet conobal c'al tzet tribual,

³ ayman chi yal Absalón tu' bay eb: Yel toni, watx' tzet chi toj a watx'nej tu', palta c'am mactxel ayoc watx'nen el yuj cham rey, ẍi.

⁴ Cax chi yalon c'apaxok: Tolok wal ayin chin oc reyal bay jun conob ti', cax chex jay ayin ul e k'anon watx'jok el e k'anej, wal yel ayman chin watx'nej el ayex, ẍi bay eb.

⁵ Ay wal junxa chi yut c'apax ba Absalón tu'. A yet chi apni oc eb anima bay, a yet c'amto chi ay nojan eb satak, ayman chi mitx'lay k'ab eb yuj, chi oc lak'an yin eb cax chi tz'ubon el ti' eb.

⁶ Axcac'al tu' chi utlay eb israel yuj, eb chi apni oc bay cham rey watx'nen is k'anej. Axca tu' max yun monchaj eb anima tu' yuj.

⁷ A yet max lajwi caneb abil yunenc'al axca tu', max yalon Absalón bay cham rey David, is mam: —Chin k'an ayach mamin rey, tol chin a chatok bay Hebrón, yet watx' chi wun bay max wak' in ti' bay Jehová.

⁸ A yet ay into ec' bay Gesur yul yet Siria, max walon bay Jehová tatol chinto meltzoj bay Jerusalén, yowalil ok wak' junok in xajanbal bay Cham, ẍi Absalón.

⁹ —Asi' yin masanc'ulal, ẍi cham rey David. Yuj tu' xan max toj Absalón bay Hebrón.

¹⁰ A wal yet tu' max yaontok is chekbej yin ewantakil bay masanil is tribual israel yet chi al-lay bay eb tol a yet ok yaben eb yok' no cacho, cax yalokab eb tol mayal oc Absalón yin reyal bay Hebrón.

¹¹ 200 eb winak aj Jerusalén max yawtej yetok. A eb tu' c'am jabok tzet yojtak eb tzet is nabal Absalón.

¹² A yet ayoc Absalón yak'on xajanbal, max yak'on toj tit Ahitofel aj conob Gilo bay is conob tu'. A jun tu' is yaomal oc nabal cham rey David. Axca tu' max yun yajc'al can is bisil eb anima max oc yetok Absalón.

Elnak aj rey David bay Absalón

¹³ Ay jun chekbej max bet alon bay cham rey David tol ay eb israel ayxa oc yetok Absalón.

¹⁴ Yuj tu' xan, max yal cham bay masanil eb ayoc yin opiso yetok bay Jerusalén: —Tonek, elokonek bay Absalón tu'. Ta c'amak, majxa je' co colon co ba bay. C'olek e yip axc'a yuj ok jayocok cax ok on is mak'on camok, ok yak'on c'ayil masanil anima bay yul conob ti', ẍi cham rey David.

¹⁵ Max tak'wi eb bay: —Bekan co c'ul jiken bay tzet chal tu' mamin rey, ẍi eb.

¹⁶ Axca tu' max yun yelaj cham rey David yetok eb xal yetbi c'al yuninal c'al yetok eb ayoc yin opiso yetok. Asanxanej lajonwan eb xal cab yistzil max cancan taynen yatut.

¹⁷ A yet mayal elaj cham yetok masanil eb max toj yintak, max oc lecan eb bay tilak el conob.

¹⁸ Axac'al is c'atan, lecan oc masanil eb ayoc yin opiso tu' yetok. Axa pax eb soldado chi taynen eb xin, eb cereteo, c'al eb peleteo, max txoloc ba eb is satak, c'al eb 600 soldado aj Gat max tzakloj yintak eb.

¹⁹ A yet jun bek tu' max yalon cham rey David bay cham Itai geteo: —¿Tzet yuj xan max ach tit jetok ach ti'? Watx' mi ta chach meltzoji, cax chach can yetok junxa ac' rey ok ocok, yujtol tx'ok conobal ach.

²⁰ Toltoc'al max ach jayi, man watx'ok ta chi wak' pural a toj jetok, wal yel ayin ti' man wojtakok bay chi ca in toji. Yelxac'al watx' tol chach meltzoji. Itok eb nak et conob ti' etok, axa Jehová ok yak' watx'c'ulal e yiban yin tojbalk'inal, ẍi cham rey tu'.

²¹ Max tak'wi cham Itai: —Chi wak' in ti' satak Dios mamin rey, cax chi waloni, tzanc'al bay chach toji, tac'al watx', ma yob, ma camich, ok inc'al tok etok, ẍi cham Itai.

²² —Yunokab xin, tonek, ẍi David. Xan max tojc'al cham Itai yetok cham rey David yetokc'al eb ajun yetok c'al is yuninal c'al eb xal yistzil.

²³ Masanil anima max ok'i yet max yilon eb toj cham rey yetok is soldado. Max ec'tok eb bay yul a' Cedrón cax max tojcan eb bay yul is beal tz'inan tx'otx'.

²⁴ Tzakan oc Sadoc yetokc'al masanil eb levita. Ibil oc te caẍail trato Dios yuj eb, cax max apni c'apax oc Abiatar. Max yaon ay eb te caẍa tu' masantac'al max yal lajwi eltok eb anima max toj yetok cham rey tu' bay xol conob.

²⁵ Max yalon cham bay Sadoc: —Meltzojanek bay yul conob yetok te caẍail trato Dios ti'. Ta ok oc Cham wetok ok in meltzojok, cax ok wilon apnok te' bay is cajlobal Jehová.

²⁶ Ta c'amxa tzalojc'ulal Jehová wetok xin, yunokab bay chi cha c'ul win, ẍi cham David.

²⁷ Max yalon pax cham rey junelxa bay cham sacerdote Sadoc: —Ach chekbej Dios, meltzojan yetok Abiatar c'al cawan e c'ajol ti' e yetok yin junc'ulalil. Itok a c'ajol Ahimaas, c'al Abiatar chi yi c'apaxtok is c'ajol, a ton Jonatán,

²⁸ yak'ban ayin ti' xin, ok in cancan bay taxbal bay chi tojcan beal tz'inan tx'otx', masantac'al ok jay k'umal e yuj cayti' tzetbil yayji ocok.

²⁹ Max lajwi tu xin, cax max meltzoj cham sacerdote Sadoc yetok Abiatar bay conob Jerusalén yetok te caẍail is trato Jehová, cax max cancan eb bay tu'.

³⁰ Caw wal chi ok' cham rey David yetok masanil eb tzunan oc yintak, cax chi ajtok eb bay witzal Olivo, c'am is xanab cham ayocok, ayaj k'oxil is jolom yetok eb ajun yetok yuj tx'oxon el eb is cusc'ulal.

³¹ Max al-lay bay cham rey tol a Ahitofel ajc'ul oc yin, yetbi ba yetok Absalón, cax max oc ijan cham k'anon bay Jehová yet chi etax el tzet yetal nabil yuj Ahitofel tu'.

³² A yet max ajapnok cham rey David bay jolom witz Olivolak, max oc yin ayilal bay Dios. A bay tu' max elol cham Husai arquita is yamigo, ul chaoni, tzilquiẍtakxac'al is pichil cax ayajtok tx'otx' xol xil is jolom.

³³ Cax max yalon cham rey bay: —Ta chach toj wetok axca tol ok ach oc tz'akilok yalil tzet ayoc wiban.

³⁴ Palta yelxac'al mi watx' tatol chach meltzoj bay Jerusalén cax chalon bay Absalón: Mamin rey, ayin ti' chin cancan a chekbejok axca max yun woc chekbejok a mam, ta cachi. Caytu' ok yun a colwaj ochontok is nabal Ahitofel.

³⁵ A bay tu' max can eb sacerdote Sadoc c'al Abiatar. Tzanc'al tzet chab yal-lay bay yul despacho tu' ayman chal bay eb.

³⁶ A tu' ay c'apax Ahimaas c'al Jonatán is c'ajol eb cawan tu'. Ta ay tzet yetal chabej, al bay eb, axa eb tu' chi je yalontek ayin, ẍi cham rey bay cham Husai.

³⁷ Yuj tu' xan max meltzoj cham Husai bay Jerusalén, a wal yapni oc Absalón bay yul conob tu' yet max apni oc cham Husai.