Yet Is Cab Libroal Cham Samuel 14 - A Txꞌan Biblia Yin Kꞌanjobal 1989

Max meltzoj Absalón yuj Joab

¹ Yojtak cham Joab yune' xal Sarvia, tol a cham rey caw wal chi cus c'ul yuj Absalón.

² Yuj tu' xan max chek toj tit jun ix caw wal aj nabal cajan bay Tecoa. Max yalon bay axca ti': Ut a ba tol ayach oc yin cusc'ulal, cha pichon a ba yetok pichilej yet cusc'ulal. C'am chaoc perfume en. Axca wal junok ix tol payxac'al c'oli yoc yin cusc'ulal yuj junok camnak, caytu' chot a ba.

³ Lajwi tu' cax ok ach oc satak cham rey, ok alon axca tzet chi wal ayach ti', ẍi cham. Lajwi tu' max yalon cham Joab bay tzet yetal tol ok yalubtanej tu'.

⁴ Max toj jun ix aj Tecoa tu' satak cham rey, max ay nojan sat tx'otx' yuj tx'oxon el is yaynakilal bay cham, max yaloni: —Colwajan wetok mamin rey, ẍi ix.

⁵ —¿Tzet chach oni? ẍi cham. Max tak'wi ix ix tu' bay: —Mamin rey, ayin ti' camnakxa wichamil.

⁶ Asan cawan wune'. Ay junel max yak'lej eb owal bay xolak te'. Tutun caw wal c'am mac max pojon nan eb, xan a jun nak max mak'xac'al cam yuẍtak tu'.

⁷ Axa tinani' masanil eb wican chi meltzoj oc ajc'ulal win, chi yochej eb chi waoc nak max mak' cam yuẍtak tu' yul k'ab eb yuj yak'on cam eb yuj is camichal nak max cam tu'. Ta axca tu' chi yunej chi elxac'al can junxa nak tu' yin satakej, cax c'amxa mac ok waoc yipok in c'ul, cax mi chi lajwi masanil yinatil wichamil, c'amxa bay ok binajtek, ẍi xal ix tu'.

⁸ Max tak'wi cham rey bay xal ix tu': —Asi' bay atut, ayin ok wila' yuj a watx'ilok, ẍi.

⁹ Max tak'wi xal ix tu' bay axca ti': —Ach mamin rey, a is mul nak wune' ti' ayokab c'ay wiban c'al yiban masanil eb wican, palta manokabnak eban, c'al yetok yiban a makbej chi ayc'ayi, ẍi xal ix tu'.

¹⁰ Max tak'wi pax cham rey tu' bay xal: —A mactxel chi yochej chach etnen tu', itek ayin cayti' yet watx' manxa ok ach yetnejc'al eb, ẍi.

¹¹ Palta max occ'al tean yin cham rey: —Chin tewi ayach mamin rey, tol cha k'an bay Jehová co Diosal, tol a jun icanejal t'inan chi paktzej is camichal nak wune' tu', c'amokab chi ajc'al can yak'wi cam anima yin mak'on cam junxa wune' ti', ẍi xal. Palta max yal cham rey: —Chi wak' in ti' bay Jehová tol c'am jabok tzet ok on nak one' tu', ẍi cham.

¹² Palta max occ'al ijan xal ix tu' yalon axca ti': —Elok yin a c'ul mamin rey, tol cha cha ab junxa belan k'anej ok wal ayach, ẍi xal. —Al xin, ẍi cham rey.

¹³ Catatu' max k'anlen xal ix tu' axca ti': —¿Tzet yuj xan axca tu' chon yin is conob Dios, mamin rey? Atac'ala' max ot alon ach ti', axa eban ok lowcanok, yuj c'am cha cha' meltzoj nak a c'ajol aycantok elaj bay najat.

¹⁴ Yujtol co masanil ok on camc'alta'a. Lajan onc'al axca a' aej chi pul sat tx'otx', tamwal tol chito je' co wajban ajok, palta a Dios c'am chi yiel k'inal eb anima. A ti' yet, chi yochej chi saylay tzet chi yun meltzojtek mac najat aycantok.

¹⁵ A tinani' mamin rey, max in jay ul wal juntzan ti' ayach, yujtol a eb anima chin xibten ajok. Yuj tu' xan max in na' tol chin k'anjab a satak, xan talaj c'uxan cha cha ab tzet chin k'an ti' mamin rey.

¹⁶ Yuj tu' tatol cha cha ab mamin rey, chi je' ton quin a colon el bay mactxel chi yochej chin c'ayon el yetok wune', bay sat tx'otx' tx'otx' max yak' Dios co sataknej ti'.

¹⁷ A ayin tol a chekbej wayji oc ti', ti' ok wechbanej tzet ok yun a paktzen ayin yet watx' c'amxa tzet ok in na', yujtol ach ti' mamin rey, ojtak wal a beyc'ulnen el tzet yetal watx', c'al tzet yetal yob, lajan ach wal axca junok ángel yet Dios. Aokab Jehová co Diosal ayoc etok, mamin rey, ẍi xal ix tu'.

¹⁸ Max tak'wi pax cham rey tu' bay xal: —A tinani' chin tewi ayach tol man ok a c'ubaj el ayin tzet yetal ok in k'anlej el ayach, ẍi cham. —K'anjaban mamin rey, ẍi xal ix tu'.

¹⁹ —Xan max k'anlej cham rey tu' bay xal axca ti': —¿Man mi nak Joab max ak'on al jun ti'? ẍi cham. Max yalon xal ix tu' bay cham rey: —Tutun wal yel chal mamin rey, a ton wal Joab, cham a chekbej yayji ocok, a' max in chekontek ayach, a' max alon c'apax ayin tzet yetal chi ul wal ayach ti'.

²⁰ Max yun juntzan ti' yet chi q'uexchaj a nabal yin a c'ajol Absalón. Palta ach ti' mamin rey, caw wal aj nabal ach, lajan ach wal axca junok yángel Dios, ojtak masanil tzet yetal chi uj bay yul a makbej ti', ẍi xal.

²¹ Catatu' max awtelay Joab yuj cham rey: —Mayal in na', yunokab axca chi yochej a c'ul. Asi', chi toj eon meltzojtek nak ach'ej Absalón, ẍi cham rey bay Joab.

²² Yuj tu' max ay nojan cham Joab satak cham rey sat tx'otx' yuj tx'oxon elok tol miman yelapnok yul sat, max yalon watx' k'anej yin cham rey axca ti': —A wal tinani' mamin rey, mayal nachaj el wuj tol ay welapnok yul a sat, yujtol max a cha ab tzet max yochej in c'ul max wal ayach, ẍi Joab.

²³ Max lajwi tu xin, max toj cham Joab bay conob Gesur yuj toj yilaytek Absalón yuj, cax chi jayoc bay Jerusalén.

²⁴ Palta max yal cham rey tol t'inanc'al tojcan Absalón tu' bay yatut, c'am chi tx'ox ba satak cham. Caytu' max yun tojcan nak bay yatut, majc'al il-lay oc yin cham rey tu' yuj.

²⁵ A xol masanil eb israel c'am junokxa winak watx' yili axca yili Absalón, caw wal binajbil yuj watx'il yili, masanil is mimanil c'am jabok is tacnakil.

²⁶ Junel chi tzuklay el xil is jolom yin junjun abil, yujtol alxa chi yabej, yujtol a is xil tu' ec'ban canebok libra yalil, atac'ala' yechbal eb rey chi k'anbalnej.

²⁷ A Absalón tu' ayxa oxwan is c'ajol, jun is cutz'in. A jun is cutz'in tu' chi yik Tamar, caw wal watx' yili ix.

²⁸ Cabxa abil yapni Absalón bay Jerusalén, palta c'amc'al chi je' toj tx'oxon ba satak cham rey.

²⁹ Yuj tu xin, max awtelay cham Joab yuj Absalón yet chi ilaytok bay satak cham rey yuj, palta maj tit cham Joab. Max yawten pax yet is cayelal, palta majc'al yal c'ul max tita.

³⁰ Axa max yun xin, max chekon Absalón eb is chekbej, max yaloni: —Asek bay is yawoj Joab ay bay cawilal ti' wet, bay awbil ixim cebada yuj, aek oc k'ak'al is yawoj tu', ẍi. Max toj eb is chekbej Absalón, max bet yaon oc eb k'ak'al yawoj cham Joab.

³¹ Axa toj cham Joab bay yatut Absalón tu', max yaloni: —¿Tzet yuj xan max yaoc eb a chekbej k'ak'al wawoj bay in mulnajil? ẍi.

³² Max tak'wi Absalón bay: —Max in chek bet al-lay ayach tol chach tit ayin ti', yet chi toj a k'anlej bay cham rey tzet yuj xan max in bet tit bay conob Gesur. Yelxac'al mi watx' tatol max in canc'al can bay tu'. Ayin ti' chi wochej chi wil yin cham rey. Ta ay in mul, chi je' chin mak'lay camok, ẍi Absalón.

³³ Yuj tu' max toj Joab yilon cham rey, yet chi yal tzet yetal max yal Absalón. Lajwi tu xin, max awtelay Absalón yuj cham rey. A yet max apni, max ay nojan satak sat tx'otx', max chalay yuj cham, max tz'ubon el cham is ti'.