Yet Is Cab Libroal Cham Samuel 12 - A Txꞌan Biblia Yin Kꞌanjobal 1989

Tzubanil cham rey David yuj Natán

¹ Max cheklaytok Natán yuj Jehová bay cham rey David; a yet max apni oc bay satak max yaloni: —A bay yul jun conob ay cawan winak: jun nak caw wal beyom, axa junxa caw wal meba'.

² Xiwil is calnel c'al is wacax jun beyom tu'.

³ Axa pax jun meba' xin, jun wal ch'an c'otan is calnel, tol manbil yuj, cax a' max ilon ch'ibok. A tu' max ch'ib no' bay yul is yatut yetok eb unin. A tzet chi lo' yul yatut, a' chi lo no'; a yul is vaso bay chi yuc'a', a tu' chi yuc' no' ya'. A bay txam is c'ul, a tu' chi way no', caw wal ochebil no' yune' calnel tu' yuj; axca wal is cutz'in yayji oc no'.

⁴ A yet jun c'ual xin, max apni oc jun ec'jabwom yulanen jun beyom tu'. A jun beyom tu' maj wal mitx' junok no' is calnel tu', caw wal tol ya' yel yuj, palta a no' jun ch'an c'otan yet jun meba', a' max bet yak' titok. A' max yak' chi' is yula' tu', ẍi Natán bay.

⁵ Max tit numnaj max yil David, max yalon bay Natán: —Satak wal Jehová Dios chi wala', a jun mac chi uten axca tu', moj wal chi cami.

⁶ Cax yowalil chi yak' canc'onok is q'uexel no yune' calnel tu', yujtol a jun winak tu' c'am wal jabok yabenc'ulal yin yet animail, ẍi.

⁷ Max yalon cham Natán: —A jun tu', ach toni. Axca ti' yalon Jehová co Diosal ayon israel on ti' ayach: Ayin max ach in siq'uil reyalok israel, max ach in colon el bay yul is k'ab Saúl.

⁸ Max wak' yatut c'al yistzil a yajawil tu' ayach, cax max ach waon oc reyalok conob Israel c'al Judá. Ta txennej juntzan tu' chabej, maxto je' wak'on tz'akil ayach.

⁹ ¿Tzet yuj xan max entaknej el in chekbanil, max on tzet yetal tol c'am chi cha' in c'ul? Max a mak' cam nak Urías heteo, yuj is yespada eb amonita, cax max aon oc yistzil nak tu' estzilok.

¹⁰ Yuj tu' xan ayc'al mac ok mak'lay cam xol enatil, yujtol max in entaknej elok, max aon oc yistzil Urías heteo estzilok.

¹¹ Ayin Jehová in chi wala': Ayin ok waoc yatakilal eban. A yatakilal tu' ok eltek xol eb a c'ajol, a satak wali ok wion eltek eb ix estzil cax ok wak'on bay junok a c'ajol, cax a' ok way yetok eb ix yet c'ualil.

¹² Ach ti' ewantak max otej, axa ayin ti' yet wal sakk'inal yet c'ualil ok in tx'oxon el bay satak conob Israel, ẍi Jehová, ẍi cham Natán.

¹³ Max tak'wen oc cham rey David mulok bay satak cham Natán, max yaloni: —Yel wali, max oc in mul bay Jehová, ẍi. Max yalon pax cham: —Manak tu' yel toni, palta ok ak'lay tan a mul yuj Jehová, xan c'am chach camxac'al.

¹⁴ Palta oj wali xan chi al-lay yobal k'anej yin Jehová yuj eb yajc'ul yuj tzet max on tu', xan ok cam jun a c'ajol tolto max alji tu', ẍi cham Natán.

¹⁵ Max lajwi tu' cax max meltzojtok cham Natán bay yatut. Axa max yun xin, max yabi ay jun is c'ajol cham David tu' yuj Jehová, a ton jun is c'ajol yetok ix yistzil camom Urías tu'.

¹⁶ Max lajwi tu', cax max oc ijan rey David k'anon bay Jehová tol chi jay c'ul nak. Max oc yin c'ajbanc'ulal cax tx'okxa max way sat tx'otx'.

¹⁷ A jantak eb yicham winakil conob chi mulnaj yetok, chi oc tean eb yin tol chi aj wanok, palta c'amxa chi yal c'ul, tamwal maxto toj low yetok eb.

¹⁸ Axa yet suk c'ual michchaj nak unin tu', cax max cami. Caw wal max xiw eb mulnajwom tu' yalon bay, yujtol chi na eb: Toltax c'am chi yab tzet chi jal yet iquisto nak unin ti', akxam wal ta chi jal bay tol mayal cam nak unin ti', tx'okxam chi yut ba, ẍi eb.

¹⁹ Max yaben cham rey David yet chi sajlabi eb k'anjabi, max nachaj el yuj tol mayal cam nak unin tu', xan max k'anlej: —¿Tom mayal cam nak unin tu'? ẍi. —Mayal cam nak, mamin, ẍi eb.

²⁰ A yet max yaben axca tu', max aj wan bay sat tx'otx' tu', max achinwi, cax max yaon ajtok yanil xil is jolom, max q'uexon el is pichil, axa yoc yin ayilal bay yul templo Jehová. Max lajwi tu' cax max toj k'anon low ba bay yul yatut.

²¹ Max k'anlen eb is mulnajwom tu' bay: —¿Tzet wal yelapnok jun chon ti', mamin rey? A yet iquisto jun a c'ajol tu' caw wal c'am chi je' a c'ul chach lowi, cax chach ok' oc yin. Axa pax tinani' mayal cam nak, cax chach aj wan a lowi, ẍi eb bay.

²² Max tak'wi cham: —A yet iquisto nak unin tu' chin oc yin c'ajbanc'ulal cax chin ok' yin nak, a in naoni talaj maxto el yin c'ul Jehová colchajcan nak.

²³ Axa pax tinani' ta mayal cam nak, tzetto wal chi oc tol chin oc yin c'ajbanc'ulal ta majxa ta jay c'ul nak, ayinxa ok in tok bay ayic' nak tu', manxanak nak ok tit ayin ti', ẍi cham.

Yaljubal Salomón

²⁴ Max lajwi tu' max betic' cham yilon ix Betsabé yet chi mimanc'ulneni, cax max way yetok, axca tu' max jay junxa is yune', max yak'on eb yik Salomón. Axa Jehová max camc'ulnen jun unin tu',

²⁵ cax max chekontok Jehová cham Natán yalon bay cham rey David tol camc'ulnebil jun unin tu' yuj. Yuj tu' xan Jedidías*fn* max yak' yik nak yaliẍ unin tu'.

Yayc'aybal conob Rabá yuj cham rey David

²⁶ Yak'ban tu' max oc cham Joab yak'on owal yin eb amonita bay Rabá. A yet toxa wal chi ayc'ay jun conob tu' yuj,

²⁷ max yaontek jun k'anej ti' bay cham rey David axca ti': Mayal quin oc yin wak'on owal yin Rabá, mayal oc a' aej chi oc xol conob yul in k'ab.

²⁸ Yuj wal tu xin, mamin rey, wajbaj oc juntzanxa eb soldado, yet watx' ach wal caw ok ach oc ak'on owal yin jun conob ti' cax ok ayc'ay oj, c'am chi wochej tol ayin ti' chin oc yin cax ayinxac'al ok in binajcan yin, ẍitok cham Joab.

²⁹ Cax max wajon oc cham rey David masanil eb is soldado, max toj yak'on owal yin conob Rabá. Max ayc'ay yuj, cax max yion canok.

³⁰ Lajwi tu' max yion el is corona jun rey tu' yin is jolom. Ay juntzan ch'en ch'en caw wal watx' yili ayoc yin. A jun corona tu' caw wal al, axca mi oxebok arroba yalil. Max yaon aj eb ch'en corona tu' yin jolom cham rey David. Ay c'apax xiwilxa tzet yetal tol caw ay is tojol bay jun conob tu' tol max yion eltek cham rey David tu'.

³¹ Axa eb anima maxto cancan bay jun conob tu', max ilay eltek eb yuj, max alay oc eb yin mulnajil, axca yin sierra, yetok ch'en pico, c'al yetok ch'en echej. Max alay c'apax oc eb yin ak'oj tz'a ladrillo bay horno. Ca c'apax tu' max yun yetok masanil eb aj conoblak Amón. Lajwi tu xin, max meltzojtek yetok masanil eb is soldado bay Jerusalén.