Yet Is Cab Carta San Pedro 3 - A Txꞌan Biblia Yin Kꞌanjobal 1989

Jaybanil Cham Jajawil

¹ Ex in camc'ulnebil, yet-xa is cab jun in carta chi watok ayex ti', tol ac'ala' chin jek e na' juntzan cuybanilej e yojtakxa, yet watx' chi watx'ji oc e nabal sic'libil.

² Yuj tu', yowalil che natek juntzan tzet tz'ibbilcan yuj eb chekbej Dios yet payxa, eb is chekbej sic'bil el yuj. Naek c'apaxtek chekbanil Cham Jajawil co Colomal. A is chekbanil tu', albilxacan ayex juj ayon is chekbej on ti'.

³ A junxa ok waltok ti', caw wal chi wochej che yojtaknej elok. A yet jun lajub tiempoal, ok aj wan mac comonc'al ok buchwaj yin yet Dios. Asan tzet man watx'ok chi yochej oc eb bay ok yaoc is nabal.

⁴ Ok yal eb axca ti'; Yak'nakcan Cristo tu' is ti', tol ok jayok. Palta, ¿baytal ay tinani'? Ilab tol yanak oc eb jichmam yin c'ul, palta camnakxa pax eb. Ilek tonabi, tzetbil yayji masanil tzet yetal, yecheltaxc'al max watx'ji yulyibank'inal ti', ac'ala'c'al yayji masanil tinani', ac'ala' tol c'amc'al mac chi jay c'apaxok, ẍi eb, ok yalon eb.

⁵ Palta a eb chi alon axca tu', c'am chi yochej eb chi natek tzet maxax uj bay yulyibank'inal ti' yet payxa tu'. Asan k'anej Dios max on watx'ji satcan, c'al sat tx'otx' ti', cax max txecloj aj tx'otx' tx'otx' nan a', cax watx' yayji nan a' tu'. tinani'.

⁶ Palta lajwi tu', pilan lajwinak el masanil tzet ay bay yulyibank'inal ti' yuj a', yujtol pilan paxnak ay yich a'. A ton juntzan ti' c'am chi yal c'ul eb chi natek.

⁷ A satcan yetok sat tx'otx' ti', ayc'al ton ec' tinani'. Palta yalnakcan Dios tol watx'okab yayji bel, masantac'al ok beklaytek k'ak' yiban. Yet ok jay jun c'ual beyc'ulal, cax ok c'aycan el eb c'am jabok yelapnok Dios yul sat yin junelnej.

⁸ Ex in camc'ulnebil, chi wochej chi nachaj el e yuj, tol a yul sat Cham Jajawil, a jun c'u, lajan axca yec' junok mil abil. Junok mil abil tu', lajan yec' axca junok c'ual.

⁹ Ay eb chi naoni, tol lanan mayji Cham Jajawil tu', c'am chi yun axca max yut yak'oncan is ti' tu' naon eb, palta man yelok axca chi yut naon eb tu'. C'amto chi jay Cham, yujtol lanantoc'al yak'on mimanc'ulal jin bay yulyibank'inal ti'. Chi yochej tol c'am junok on ok on c'aycan elok, palta tol chi yochej chi co na co ba co masanil.

¹⁰ Palta axca wal jay junok elk'om yet ak'balil, caytu' ok yun jay c'ual jay Cham Jajawil tu'. Ok lajwok ay satcan yet jun c'ual tu', ayxa may nilili yet ok eq'uelok. Axa tzet ay sat tx'otx' ti', pilan ok uljoktok yuj jun miman k'ak'ej. Pilan ok tz'atok sat tx'otx' ti', yetok masanil tzetak yetal ayay sat.

¹¹ Caytu' ok yun lajwok masanil tzet yetal. Yuj tu' xan yowalil tojol chi jut co beybal. Asanokab yin Dios chi jaoc co nabal.

¹² Jechbanejek jay jun c'ual yet Dios tu'. Jak'ek jip co mulnaj yin yet Cham, yet watx' chi jay yin ayman. A yet jun c'ual tu', ok lajwok satcan yuj k'ak'ej, cax pilan ok uljok masanil tzet ayay sat tx'otx' ti' yuj k'ak' tu'.

¹³ Palta ayon ti', lanan jechbanen junxa ac' satcan, c'al jun ac' yulyibank'inal, yujtol axca tu' yaloncan Dios. Asan eb watx'xac'al is nabal ok cajonok.

¹⁴ Ex in camc'ulnebil, lanan jechbanen jay juntzan mayal waltek ti'. Yuj tu' xan jak'ek jip, yet watx' c'amokab jabok co yobtakil c'al jabok co paltail yul sat Cham yet jun c'ual tu'. Tatol axca tu', junc'ulalxac'al ay on yetok Cham.

¹⁵ Nachajokab el e yuj, tol ay is mimanc'ulal Cham Jajawil, xan c'amto chi jay Cham, yet watx' ayto mac ok colchajok. Ilab c'apax juẍtak Pablo camc'ulnebil juj, cay c'apax tu' chi yut tz'ibentok ayex, yujtol caytu' yak'laycan jelanil yuj Dios.

¹⁶ Tz'ibbilc'alcan juntzan ti' yul junjun is carta, palta ay bay caw wal ya' nachaj elok. A mac c'amto wal nabal, mac manto wal tec'anok waay yin is creyenteal, chi q'uexcantok eb is k'anejal. Ac'ala' chi yun eb yin juntzanokxa k'anej Dios tz'ibbilcanok. Yuj tu' xan ok c'aycan el eb.

¹⁷ A pax ayex ti', ex in camc'ulnebil, ayokto max e yabeni tzetak yetal ok jayok. Yuj tu', ilekc'al e ba bay eb yob is nabal max waltek ti', yet watx' c'am chex somchaj el yuj juntzan yob cuybanil eb tu'. Ta c'amak, caw wal ok etax el e nabal, cax ok ex ayc'ay yin tec'anil e waayi.

¹⁸ Jak'ek jip jojtaknen el Cham Jajawil, co Colomal Jesucristo wal sic'libil. Yetok c'apaxok, yelokabc'al tol tz'akan chi co cha is watx'c'ulal junjun c'u. Mimanokab yelapnok Cham Jajawil tu' tinani', c'al yin tojbalk'inal. Yunokabi.