Biblia Todo Logo
Bìoball air-loidhne

- Sanasan -

Yet Is Cab Libroal Yabixal Eb Rey 6 - A Txꞌan Biblia Yin Kꞌanjobal 1989


Jun milagro yin ch'en echej

1 A yet jun c'ual max yalon eb is chekbej Dios bay cham Eliseo: —Ilab wal jun lugar bay ayon ec' etok ti', caw wal witz'an.

2 Yuj tu' xan ta chi je' a c'ul chon toj bay a' Jordán, cax chi toj jion junjunok co te', chi co watx'nen aj junok na bay chon ayji bay tu', ẍi eb. —Asek xin, ẍi cham Eliseo.

3 —Elokab yin a c'ul chach toj jetok, ẍi jun nak bay. —Inye xin, chin toji, ẍi cham.

4 Xan max toj cham Eliseo yetok eb bay a' Jordán tzoc'oj el te'.

5 A yet lanan tzoc'wi te' eb tu', cax max el c'otnaj yechej jun nak, max toj yul a' aej tu', xan max el yaw nak: —¡Ay meẍtol, a jun ch'en echej ti' tol majanbil ch'en! ẍi nak.

6 —¿Baytal max toj ch'en? ẍi cham Eliseo. Max tx'oxon nak bay max toj ch'en. Max tzoc'on el cham jun te te' cax max yaon aytok cham yul a', axa ajol batxatxok ch'en yiban a'. A jun echej tu' hierro.

7 —Iajtek ch'en, ẍi cham bay nak. Max yaon aytok nak is k'ab max yion ajtek ch'en.


Cham Eliseo yetok eb aj Siria

8 A yet ayoc owal yuj eb sirio yin Israel, cax max lajtinen ba cham reyal Siria yetok eb yajawil is soldado tu' masanil yuj baytal chi watx'nej aj eb is campamento.

9 Max yalontok cham Eliseo bay reyal Israel baytakc'al ayic' eb aj Siria yet watx' c'am chi toj eb bay tu'.

10 Axca tu' max yun chekontok reyal Israel yilomal bay lugarlak bay chi yal cham chekbej Dios tu', xan xiwil el max col ba eb.

11 Yuj tu' caw wal max c'ayaj c'ul cham reyal Siria, xan max yawtej eb yajawil soldado, max yaloni: —¡Alek ayin mactxel ayoc yetok reyal Israel co xol ti! ẍi bay eb.

12 Cax max tak'wi jun nak yetbi eb tu': —C'am mactxel mamin, palta a cham Eliseo is chekbej Dios ayic' bay Israel tu', a' chi alon bay cham rey masanil tzet chal ach ti' caxc'al yin ewantakil chala', ẍi bay.

13 Xan max yal cham reyal Siria tu': —Asek ila', baytal ay, cax chi waontok jaywanok in soldado yet chi toj c'al-laytek, ẍi cham rey. A yet max yabeni tol a bay Dotán ayic' cham Eliseo,

14 cax max yaontok jun miman bulan eb soldado, yetok chej, c'al yetok carruaje yet owal. Max apni oc eb yet ak'balil bay Dotán, max yoyon ba eb yinlak conob tu'.

15 Axa yet max sakbi, max aj wan is chekbej cham Eliseo; a yet max eltek max yiloni, tom jantakxa soldado oyan ec' yinlak conob, ay no chej c'al carruaje yet owal. Yuj tu' xan max toj yal bay cham Eliseo: —Ay mamin, ¿tzet wal ok junej? ẍi is chekbej tu'.

16 Max tak'wi cham Eliseo: —Manchak ach xiwi, yujtol miman mac ayic' jetok yintak eb nak tu', ẍi cham.

17 Cax max oc ijan cham Eliseo yin txaj bay Jehová: Chin k'an ayach Mamin, tol cha jak sat in chekbej ti', ẍi cham. Max jakon Jehová is sat nak chekbej tu', cax max yiloni tol a bay satlak witz c'al bay jolomlak witz, toxac'al oyantek soldado yiban chej c'al yulak carruaje tol naba k'ak', oyan oc yin cham Eliseo.

18 A wal yapni oc eb sirio yak'on owal, cax max k'anon cham Eliseo bay Jehová: Chin k'an ayach Mamin, tol c'amxaokab chi uj yilwi eb nak ti', ẍi cham. Cax majxa je' yilwi eb yuj Jehová, axca max yun k'anon cham Eliseo.

19 Axa toj cham Eliseo yalon bay eb: —Manak jun be ti' che saya' c'al manak jun conob ti'. Ocanek tzunan wintak cax chex wiontok bay ayic' jun nak che say tu', ẍi cham bay eb. Cax max yiontok cham eb bay Samaria.

20 A yet mayal octok eb yul conob tu', max txajli cham Eliseo axca ti': Mamin Jehová, jak sat eb nak cax chi yilon eb, ẍi cham. Max jakchaj sat eb, max yilon eb tol axa tu' ayic' eb bay yul conob Samaria.

21 A yet max yilon cham reyal Israel eb nak tu', max k'anlen cham rey bay cham Eliseo. —Mamin, ¿chi mi in mak' cam eb nak? ẍi cham.

22 Max yalon cham Eliseo: —C'amak, c'am cha mak' cam eb nak. ¿Tekan tol k'ajan ach a mak'on cam eb chi michchaj oj yin owal? Ak' low eb nak c'al yuc'a' eb cax chak'on meltzoj eb bay is yajawil, ẍi cham.

23 Cax max watx'ji jun miman loj, max low eb c'al yuq'uena' eb. Max lajwi tu' cax max yalon cham reyal Israel tol chi toj eb, axa meltzojtok eb bay ayic' is yajawil. Atax yet tu' max bekon eb soldado sirio yoctek yin yetnen conob Israel c'al yin elk'an.


Max oylay aj Samaria

24 Max lajwi yec'can jun tiempoal tu', a Ben-adad, reyal Siria max wajban oc is soldado, cax max toj yoyon aj Samaria yuj yak'on owal yin.

25 Axca tu' max yun yayc'ay jun wajil bay Samaria. Caw wal max aj can tojol masanil tzetak yetal, yujtol caw wal watx' yoc oyan eb sirio yin conob tu'. A junok no jolom no burro, 80 siclo plata max yun is tojol, axa jun vaso is tza' no paramuch, oyeb siclo plata is tojol.

26 A yet jun c'ual lanan yeq'uel cham rey yiban muralla, cax max awjitok jun ix ix bay: —Mamin, colin, ẍi ix.

27 Max tak'wi cham rey: —Ta c'am chach col-lay yuj Jehová, ¿tom ayinto wal ok ach in colo'? ¿Tom ok je' wak'on a trigo c'al a vino?

28 ¿Tzet chach oni? ẍi. Max tak'wi ix: —A jun ix ti' max yal ix ayin tol chi wak' wune' chilayok, axa yet junxa c'ual, axa ix chi yak' yune' chilayok.

29 Xan max co txic wune' tu', max co chioni. Axa yet junxa c'ual tu' max walon bay ix tol chi yak' ix yune' tu' co chi', palta mayal c'ubaj pax el ix yune', ẍi ix tu'.

30 A yet max yaben cham rey tzet max yal ix ix tu', cax max tzilontok is pichil yuj tx'oxon elok tol ay is cusc'ulal. Yujtol lanan yec'tok yiban muralla, max yilon eb anima ayic' cawilal muralla tu' tol ayoc el pichilej yuj yet cusc'ulal yul is pichil ayoc yuj.

31 Max yalon cham rey tu': Titokabcan yowal c'ul Dios wiban tatol c'am chi wiel is jolom Eliseo is c'ajol Safat yet jun c'ual ti', ẍi cham rey.

32 Chotan ay cham Eliseo bay yul yatut, yetok eb yicham winakil conob. Cax max chekontok cham rey jun winak yin cham. A yet c'amto chi apni oc is chekbej cham rey tu', cax max yalon cham Eliseo bay eb yicham winakil conob tu': —Ilek tonabi, max chektek jun mak'om cam anima tu' jun is chekbej yet chi ul yiel in jolom. Abek wal tzet chi wala': A yet ok jayoc nak tu' cax ok e makchen eltok te puerta cax che tenon eltok te' bay yul ti', tzunan cham rey is yajawil nak yintak, ẍi cham.

33 Lananto wal k'anjab cham cax max jayoc is chekbej cham rey tu', max yaloni: —A jun uchlejbail ti', a Jehová max aontek. ¿Tzetto wal chi oc chi wechbanej on colon Cham tinani'? ẍi jun chekbej tu'.

Kanjobal (Q’anjob’al) © Sociedad Bíblica de Guatemala 1989

Bible Society in Guatemala
Lean sinn:



Sanasan