Yet Is Cab Libroal Yabixal Eb Rey 5 - A Txꞌan Biblia Yin Kꞌanjobal 1989

Max watx'ji lepra ayoc yin Naamán

¹ Ay jun winak chi yik Naamán, is yajawil eb soldado cham reyal Siria. Caw wal xajan yuj cham rey tu', tol miman yelapnok, yujtol a Dios max ak'on ayc'ay eb ajc'ul yul is k'ab Naamán tu'. Caw wal jelan yin owal, palta ayoc jun ilya' chi yik lepra yin cham.

² Max cheklaytok jun bulan eb soldado aj Siria yet chi toj eb elk'an bay yul yet Israel. Max michchajtok jun ix k'opoj ix yuj eb, cax max oc ix is chekbejok xal yistzil cham Naamán.

³ Max yalon ix k'opoj bay xal is yajawil tu': —Watx' mi wali ta chi toj cham in patrón ti' bay jun cham is chekbej Dios ayic' bay Samaria; chi mi watx'ji jun yailal cham ti', ẍi ix.

⁴ Cax max toj Naamán yalon bay cham reyal Siria tzet max yal ix k'opoj tu'.

⁵ Max yalon cham rey tu' bay: —Watx' ta chach toji, chi watok junok carta bay reyal Israel tu', ẍi cham. Axca tu' max yun toj Naamán, max yiontok nan is waxak quintal ch'en plata, wakeb arroba ch'en oro, yetok lajoneb mojan pichilej.

⁶ Cax max yiontok tx'an carta bay reyal Israel, tol chi yal axca ti': A yuj ojtaknen in capitán Naamán ti' xan chi watok in carta ti' ayach. Chi wochej tol chantej, yujtol ya'ay yuj lepra, ẍi yul tx'an.

⁷ A yet max lajwi yilon cham reyal Israel tx'an carta tu', cax max tzilontok is pichil yuj tx'oxon elok tol ay is bilc'ulal, max yaloni: —¿Tokwal Dios in, xan ok je' wak'on camichal anima c'al wak'on cawil, yuj tu' xan chi yatek jun winak ti' ayin yet chi wiel lepra yin? Tekan ay tzet yetal yob chi na' eb win, ẍi cham rey.

⁸ A yet max yaben cham Eliseo tol max tziltok cham rey is pichil, max yalontok cham: —¿Tzet yuj xan max a tziltok a pichil? Titokab jun winak tu' ayin, catatu' ok yiloni tol ay chekbej Dios bay Israel ti', ẍitok cham.

⁹ Max toj Naamán yetok is carruaje, yetok is chej, c'al eb ajun yetok, cax max apni oc waan eb bay ti' is na cham Eliseo.

¹⁰ Cax max chekontok cham Eliseo is chekbej tol chi al-lay bay: Asi' tx'aj a ba ukelok bay a' Jordán, cax ok watx'jok a mimanil ayoc lepra yin tu', ẍi cham.

¹¹ Max tit yowal Naamán, max toji, axa yalon tu': —A waloni tol ok elol cham quin ul chaoni, ok oc wal lecan txajlok bay Jehová is Diosal in satak, cax ok yaon oc cham is k'ab bay ayoc lepra win, axa yelcan tu' waloni.

¹² ¿Tom jantak watx'il a' aej bay Damasco, a' Abana c'al a' Farfar yintak a' aej ay bay Israel ti'? ¿Tom c'am chi je' in toj achin bay yul a' tu' cax chin watx'ji? ẍi Naamán. Caw wal aytek yowal, max meltzojtok.

¹³ Axa wal eb is chekbej ajun yetok, max yalonc'al eb bay: —Mamin, ta ay junokxa tzet yetal caw wal yatak yoc max yal cham chekbej Dios ti' ayach, ¿tom man ok ekej paxok? Akxa xin, asan max yala' tol cha tx'aj a ba cax chach watx'ji elok, ẍi eb bay.

¹⁴ Catatu' max toj Naamán cax max jekon aytok ba yin ukel bay yul a' Jordán, axca max yun yalon cham Eliseo is chekbej Dios. Max watx'jican el is mimanil axcaxac'al is mimanil junok ach'ej unin, caw wal watx' max yuncanok.

¹⁵ Yuj tu xin, max toj yetok eb ajun yetok tu' yilon cham Eliseo. A yet max apni oc eb bay satak cham, max yalon Naamán: —A wal tinani' max nachaj wal el wuj tol c'am junokxa Dios bay yulyibank'inal ti', palta asan wal e Diosal ayex israel ex ti'; yuj tu xin, elok yin a c'ul a chaon in sabal chi wak' ayach ti', ẍi Naamán.

¹⁶ Chi wak' in ti' bay Jehová bay ayin oc chekbejok ti' tol c'am chin cha' tzet yetal chak' tu', ẍi cham Eliseo. Caxc'al max occ'al tean yin, palta majc'alta' cha' cham.

¹⁷ Cax max yalon Naamán: —Ta axca tu xin, elok wal yin a c'ul a chaon witok cabok ikatzil tx'otx' yet Israel ti',*fn* cac'on mulail chi witok, yujtol ayin a chekbej in ti', c'amxa junokxa dios bay ok wak' in xajanbal, palta tol asan bay Jehová.

¹⁸ Asan wal jun chin k'an bay Jehová, tol chin yak' mimanc'ulal, yujtol a yet ok tok in reyal yin ayilal bay templo is diosal chi yik Rimón, ok oc nic'an yin in k'ab, cax yowalil ok in ay jajan yetok bay templo tu'; yak'okab Jehová mimanc'ulal win yuj jun ti', ẍi Naamán.

¹⁹ Max tak'wi cham Eliseo: —C'amc'al tzet cha na', asi', ẍi cham. Cax max toj Naamán. Palta txennej iẍto bay chi toji,

²⁰ cax max naon Giezi is chekbej cham Eliseo: ¿Tzet wal yuj xan toc'al max chatok cham in yajawil ti' Naamán aj Siria yin tol c'am jabok tzet max cha'can bay? Chi wak' in ti' bay Jehová tol chin tzakloj yintak, yalc'al tzet ok wiec' bay, ẍi.

²¹ Cax max tzakloj Giezi yintak. A yet max yilontok Naamán tol chi tita, max aytek yul is carruaje cax max tit chalay Giezi yuj, max k'anleni: —¿Ma ay tzet yob max uji? ẍi bay.

²² —C'amak, c'am tzet, palta a cham wajawil max in chekontek ul wal ayach tol lananto wal yapni oc cawan eb ach'ej chekbej Dios petoj eb bay siquilal tx'otx' yet Efraín. Yuj tu' xan chi k'an cham ayach ta chak' oxeb arroba ch'en plata yetok cabok mojan an pichilej, ẍi bay.

²³ Max tak'wi Naamán: —Elokab yin a c'ul cha cha' wal wakebok arroba ch'en plata ti', ẍi bay. Yak'ban chi occ'al tean yin, max yaon aytok ch'en yetok ca mojan an pichilej tu' yul cab coẍtal, max yaontek cawan is chekbej yetok Giezi tu'.

²⁴ A yet max apni oc eb bay tzalan bay ayic' cham Eliseo, cax max yion ec' Giezi tzet yetal ibil oc yuj eb is chekbej Naamán, cax max c'uban el yul yatut, axa cheklay pax eb yuj tu'.

²⁵ Ayman max jayoc bay is yajawil tu', cax max k'anlen cham Eliseo bay: —¿Baytal max ach betic' Giezi? ẍi cham. —C'amc'al bay chin betic' mamin, ẍi Giezi.

²⁶ Yelc'ulalxac'al max yal cham Eliseo axca ti': —A yet max aytek jun nak winak bay yul is carruaje cax max tit ach ul chaoni ¿tok wal maj yil wanimail jun tu' cha na'? A tinani' man mojok co chaon tumin c'al pichilej, tamwal co manon te awoj olivo, c'al uva, calnel ma no buey, ma eb nak chekbej c'al eb ix chekbej.

²⁷ Yuj tzet max on ti', xan a tinani' chi occan lepra Naamán tu' en c'al yin enatil yin tojbalk'inal, ẍi cham. Axa yet max pojon ba Giezi yetok cham Eliseo, ayxa oc lepra yin, sakxac'al yili is mimanil axca ch'en chew.