Yet Is Cab Libroal Yabixal Eb Rey 22 - A Txꞌan Biblia Yin Kꞌanjobal 1989

Ocnak Josías reyalok Judá

¹ Waxakeb abil is k'inal Josías yet max oc yin reyal. 31 abil max yak' reyal bay Jerusalén. Jedida yoc bi is txutx, is cutz'in cham Adaía aj Boscat.

² Caw wal watx' max yut ba satak Jehová axca wal is beybal David is yichmam, c'am wal janic'ok max yiel ba yin is beybal yichmam tu'.

Max ilchaj tx'an libroal ley

³ 18 abilxa yoc Josías yin reyal, cax max yaontok is yajtz'ib chi yik Safán, a ton is c'ajol Azalías yitxiquin Mesulam, max yalon cham rey tu' bay:

⁴ —Asi' bay Hilcías sat sacerdote yayji, cax chalon bay tol chi wajbaj ch'en tumin chi jayoc bay is templo Jehová, ch'en chi cha' eb taynem puertail templo bay eb anima,

⁵ cax chi yak'on bay eb yajawil yayji yilon nipelay templo tu' yet chi tojlanelay eb chi mulnaj oc yin,

⁶ axca eb carpintero, c'al eb albañil, c'al yuj manlay te te', c'al ch'en ch'en tol josbil, yuj nipelay templo tu'.

⁷ C'am chi k'anlay yunal ch'en tumin tu', yujtol caw wal watx' is nabal eb, ẍi cham rey Josías.

⁸ A yet tu' max yalon Hilcías, bay Safán tol max ilchaj tx'an libroal ley bay yul templo Jehová, cax max yak'on tx'an bay Safán tu', axa yawten aj Safán tu' tx'an.

⁹ Max lajwi tu xin, max toj Safán yalon jun ti' bay cham rey: —Mayal wajaj eb a chekbej ch'en tumin ay bay yul templo, cax max yak'on eb ch'en bay eb ayoc yajawilal yilon watx'ji templo Jehová tu', ẍi bay.

¹⁰ Max yalon c'apax Safán tol a cham sacerdote Hilcías max yak' jun libro bay, xan max yawtej aj tx'an bay satak cham rey.

¹¹ A yet max yaben cham rey tzet chi yal yul tx'an yunal ley tu', max tzilontok is pichil,

¹² cax max chekon yawtelay Hilcías, Ahicam is c'ajol Safán, Acbor is c'ajol Micaías, Safán cham chi tz'iben abix, c'al Asaías is chekbej cham rey. Max yalon cham bay eb axca ti':

¹³ —Asi' k'anlejek bay Jehová tzet ok jun yuj Cham, tzet ok wun ayin ti', tzet ok yun conob yetokc'al masanil Judá, tzet wal yelapnok yul tx'an ley max ilchaj ti'. Ay mi tek is yowal c'ul Jehová tu' jin, yujtol maj yikej eb jichmam tzet chi yal tx'an, ẍi cham.

¹⁴ Yuj tu' max toj Hilcías sacerdote, Ahicam, Acbor, Safán yetokc'al Asaías yilon xal is chekbej Dios chi yik Hulda, is yistzil Salum, is c'ajol Ticva, is yitxiquin Harhas. A Salum tu' yilomal bay chi c'ubelay pichilej bay templo. A xal Hulda tu', a tu' ay xal bay yet is cab cantón yet Jerusalén. A yet max k'anjab eb bay xal,

¹⁵ max tak'wi bay eb: —A ton is paktzebal e k'anej chi yak' Jehová co Diosal ayon israel on ti', la: Ayin Jehová in ti' chi wala': Alek bay mac max ex chekontek e k'anlej ayin ti',

¹⁶ tol ayin ok watek jun uchlejbail yiban jun conob ti', c'al yiban eb cajyom cayti' axca yalon tx'an yunal ley max yil jun reyal Judá tu'.

¹⁷ Max in beklaycan yuj eb anima, cax max yak'on eb is sabal c'al ayilal bay comon dios, tol max tx'emtek eb wowal yuj is diosal eb, watx'nebil yuj. Yuj wal tu' max tit wowal yin jun lugar ti'. C'amxa chi tan wowal tu' yin, ẍi Jehová.

¹⁸ Alek bay cham reyal Judá, cham max ex aontek e k'anlej bay Jehová: A Jehová co Diosal chi yala': Yujtol max abej tzet ayay yul tx'an un tu',

¹⁹ cax max aon oc yin a c'ul, xan max al a ba ayin, c'al a tzilontok a pichil, c'al ok'aj in satak, yuj max ab tzet max wala' tol ok c'aylay el conob ti' c'al catabnelay eb cajan bay, yuj tu', mayal wab tzet max ala', xan chi wal ayach,

²⁰ tol max wak' mimanc'ulal en, cax ok ach muklay yin junc'ulalil. Manxa ok el jun uchlejbail ok watek yiban jun conob ti', ẍi Jehová, ẍi xal Hulda. Cax max meltzojtek eb is chekbej cham rey ul yalon tzet max bet yab eb tu'.