Yet Is Cab Libroal Yabixal Eb Rey 21 - A Txꞌan Biblia Yin Kꞌanjobal 1989

Yet ayoc Manasés yin reyal bay Judá

¹ 12 wal abil is k'inal Manasés yet max chaon oc yak'on reyal, 55 abil max yak' reyal bay Jerusalén. A is txutx chi yik Hépsiba.

² Palta caw wal yob is yunben satak Jehová. Max beybalnej masanil yobtakilal axca max beybalnej juntzan nacionlak max yiel Jehová satak eb israel.

³ Max ca watx'nej aj juntzan lugar yet ayilal bay can ay ajok, juntzan max yuch lajwok Ezequías. Max watx'nej aj altar yet Baal, max watx'nen c'apax aj jun yechel Asera, axca wal max yun Acab reyal Israel, cax max oc yin ayilal bay masanil tzektebalej ay satcan.

⁴ Max watx'nen c'apax aj juntzan altar bay yul templo Jehová, a ton yin jun lugar ti' max yal Cham axca ti': A bay jun templo bay Jerusalén ok oc ayilal ayin, ẍi Cham.

⁵ Ay wal juntzanxa altar max watx'nej aj bay cab yamak'il templo Jehová, yuj yoc yin ayilal bay juntzan tzektebalej ay satcan.

⁶ Yetok c'apaxok max yak' tz'a is c'ajol yin xajanbalil bay junok is diosal tu'. Max oc c'apax yetok eb ajbal, eb tz'akan c'ul yaloni, eb naom el k'anej, c'al yetok eb chi yawtej pixan camnak. Junelnej tol caw wal yob masanil tzet max el yunen satak Jehová, max tx'emxac'altek yowal c'ul Cham.

⁷ Toltax max ya wal octok jun te', yechel Asera, bay yul templo Jehová, a ton yin jun templo tu' max yal Jehová bay David c'al bay Salomón is c'ajol: A bay jun templo bay Jerusalén ti' tol max in sic'can el xol masanil eb tribual Israel, a bay tu' ok in cajay yin tojbalk'inal.

⁸ Tatol ok yikej eb e yet conob masanil in chekbanil, c'al in ley, c'al yetok in cuybej max wak' yal in chekbej Moisés bay eb, majxa wiel eb bay sat jun tx'otx' max wak' bay yichmam eb, ẍi Cham.

⁹ Palta caw wal maj yikej eb masanil juntzan tu'. A wal caw rey Manasés max ikban eb yin yobtakil, yelxac'al yob yintak is beybal juntzan nación max c'aylay el yuj Jehová is satak eb.

¹⁰ Yuj tu' xan max k'anjab Jehová yin yak'balnen eb is chekbej, max yaloni:

¹¹ A Manasés ti', yelxac'al ec'ban yobtakil max yunej yintak eb amorreo, a ton eb max ec'lej yettax yalantok; max yikban c'apax Judá yin yobtakil yin yak'on ayilal bay yechelej.

¹² Yuj wal tu', ayin wal caw Jehová e Diosal in ayex israel ex ti', chi wala', tol ok wi waltek yailal yiban Jerusalén c'al yiban Judá ti', toltax caw wal ok tacxac'al can el c'ul eb ok abenok.

¹³ Tol ok waoc yailal yiban Jerusalén ti' axca max wut Samaria c'al eb yinatil Acab; tol ok wiel masanil anima ay bay, lajanxac'al ok yuncan axca junok plato yet chi lajwi tx'ajlayi cax chi aycan nojanok.

¹⁴ Axa janic'okxa in conob ti' xin, ok in bekcanok, axa waoncan oc yul k'ab eb ajc'ul, yet watx' chi ilaycan ec' masanil is tzet yetal eb,

¹⁵ yujtol junelnej yobxac'al chi yun eb in satak. Max tx'emc'al eb yowal in c'ul yettaxc'al max wion eltek yichmam eb bay Egipto, masantac'al tinani', ẍi Jehová.

¹⁶ Caw wal max oc masanil eb aj Judá ajmulal yuj jantak yobtakilal max yun Manasés satak Jehová. Xiwilxa max pulcantok is chiq'uil eb anima c'am is mul masanil yul yet Jerusalén.

¹⁷ A janic'okxa is yabixal Manasés c'al tzetak max yunej, yetokc'al jantak is mul max yaocok, a tu' tz'ibbilcan yul tx'an un yet is yabixal eb reyal Judá.

¹⁸ A yet max cami, a tu' max muklay bay xolak awoj bay ti' is yatut, a ton bay xolak awoj yet Uza. Lajwi tu' axa Amón is c'ajol max occan yin reyal is q'uexelok.

Ocnak Amón reyalok Judá

¹⁹ 22 abil is k'inal Amón yet max chaon el yich yoc yin reyal bay Judá. Cab abil max yak' reyal bay Jerusalén. A is txutx chi yik Mesulemet, is cutz'in Haruz aj Jotba.

²⁰ Caw wal yob is yunben cham Amón satak Jehová axca yet Manasés is mam.

²¹ Ac'al yob beybalej tu' max beybalnej, max oc yin ayilal bay juntzan yechelej max watx'nej aj is mam.

²² Caytu' max yun yintaknencan el Jehová Dios, a ton is Diosal eb yichmam, majc'al wal yikej yochwan Cham.

²³ A eb ayoc yin opiso yetok Amón max meltzoj oc eb yin, max mak'lay cam cham yuj eb bay yul is despacho.

²⁴ Axa masanil eb conob max mak'on cam juntzan ay yopiso tol max mak'on cam Amón tu', axa Josías is c'ajol, max yaoc eb yin reyal is q'uexelok.

²⁵ A janic'okxa is yabixal Amón c'al jantak tzet max yunej, a tu', tz'ibbilcan ay bay yul tx'an un yet yabixal eb reyal Judá.

²⁶ A tu' max muklay bay xolak awoj yet Uza. Cayton tu' max yun yoccan Josías is c'ajol yin reyal is q'uexelok.