Yet Is Cab Libroal Yabixal Eb Rey 18 - A Txꞌan Biblia Yin Kꞌanjobal 1989

Ocnak Ezequías reyalok Judá

¹ A yet oxeb abilxa yoc Oseas c'ajol Ela yin reyal bay Israel, a yet tu' max chaon el yich Ezequías is c'ajol Acaz yak'on reyal bay Judá.

² 25 abil is k'inal yet tu', 29 abil max yak' reyal bay Jerusalén. A is txutx Ezequías tu' chi yik Abi, is cutz'in Zacarías xal.

³ A tzet max yun Ezequías, watx' satak Jehová, axca yet David is yichmam.

⁴ A ton max ion el masanil juntzan lugar can ay ajok bay chi oc eb comon anima yin ayilal. Max mak'on poj juntzan ch'en ch'en tol ya' yili yuj eb. Max tzoc'on aj juntzan yechel Asera. Max mak'on c'apax poj ch'en bronce labaj watx'nebil yuj cham Moisés, a ton bay tu' max yak' tz'a eb israel incienso, cax chi yak'on eb yik Nehustán.*fn*

⁵ A Ezequías tu', a wal yin Jehová Dios max yaoc is nabal. A xol masanil eb reyal Judá yet yalantok c'al yintakilal c'am junok lajan is nabal axca yet Ezequías.

⁶ Caw wal yikemc'al max yut ba bay Jehová. C'am junelok max yican el ba yintak Cham, palta tol max yikej masanil chekbanilej max chek Jehová yalcan cham Moisés.

⁷ Yuj wal tu' xan max colwajc'al Jehová yetok, max yic'al ba masanil tzet yetal max yunej. Max yut ba Ezequías yin tenomtakil bay reyal Asiria, majxa yiken bay.

⁸ Max yak' ayc'ay eb filisteo c'al yiontek masanil tzetak yetal ay bay nación tu'; max tittac'al bay juntzan cuartel masantac'al bay juntzan mimek conob. Ay c'apax oc conob Gaza, tz'akilok yetokc'al masanil is makbej.

Max ayc'ay Samaria

⁹ A yet is can abilxa yoc Ezequías yin reyal bay Judá, yet ukebxa abil yoc Oseas is c'ajol Ela yin reyal bay Israel, max yoyon aj cham Salmanasar, reyal Asiria conob Samaria yin oxeb abil.

¹⁰ Lajwi tu', max ayc'ay Samaria yuj. Max yun jun tu' yet wal wakebxa abil yoc Ezequías reyal bay Judá, cax balonebxa abil yoc Oseas reyal bay Israel.

¹¹ Max yitok Salmanasar eb israel bay Asiria. Max bet yak'oncan jaywan eb bay conob Halah yul yet Habor bay is ti a' Gozán, c'al bay is conoblak eb medo.

¹² Axca tu' max yun yelapnok yujtol maj yikej eb israel bay Jehová is Diosal eb, max ten eb is trato Cham, maj cha yab eb tzet max cheklaycan yun eb yuj cham Moisés is chekbej Jehová, tamwal max yikej eb.

Max yak' cham Senaquerib owal yin Judá

¹³ A yet canlajonebxa abil yoc Ezequías yin reyal bay Judá max oc Senaquerib reyal Asiria yak'on owal yin conoblak ay murallail yul yet Judá, cax max ayc'ay yuj.

¹⁴ Yuj tu xin, a Ezequías max yatok jun un bay reyal Asiria bay Laquis chi yaloni: Max waoc in mul ayach, iil a soldado ayoc bay sat co lugar ti', cax ok in tojlanen tojlabal ayoc wiban oj, ẍitok bay. Yuj tu xin, xan max yaoc cham reyal Asiria 225 quintal plata c'al 23 quintal oro tojlabal yiban Ezequías reyal Judá,

¹⁵ cax max yaontok cham Ezequías ch'en plata max ilchaj yuj bay yul is templo Jehová, c'al jantakxa is beyomal ay bay yul is despacho.

¹⁶ A yet jun tiempoal tu' max yion el rey Ezequías ch'en oro ayoc yin templo tu', c'al ch'en oro ayoc yin is puertail, c'al yin is marcoal, c'al yin is reglail, a juntzan ti' ac'al oc cham rey Ezequías max aon ocok. Masanil juntzan tu' max yatok bay cham reyal Asiria.

¹⁷ Max lajwi tu', max yaontek cham reyal Asiria tu' oxwan eb sat yajaw yayji yin eb soldado bay rey Ezequías yetok jun miman bulan eb soldado. Max el eb bay Laquis, max toj eb bay Jerusalén. A tu' max watx'nej eb is campamento bay is be a' aej bay is babel tanqueal a' ay bay yiban, yul be chi toj bay chi tx'ajwi eb chemom k'ap.

¹⁸ Ayman max awtelay cham rey Ezequías. Max chekontok cham rey tu' eb ti': A ton Eliaquim is c'ajol Hilcías, mayordomo yayji bay yatut cham rey, c'al Sebna tz'ibem abix, yetok Joa, is c'ajol Asaf, yajtz'ib cham rey.

¹⁹ Max yalon junok eb sat yajaw yet Asiria tu' bay eb: —Alek bay Ezequías tzet chi yal cham reyal Asiria, jun rey tol mimanbil bay sat tx'otx' ti': ¿Tzet yetal ayoc yipok a c'ul?

²⁰ ¿Tom cha na' tol yujc'al k'anej cax chi je' yoc wanaj yip eb soldado jelan yin owal? ¿Tzet ayoc yipok a c'ul cax chach meltzoj oc win?

²¹ Max wila' tol a Egipto chaoc yipok a c'ul. Watx' toni, yujtol a Egipto tu' lajan wal axca junok te' aj tol pojiltakxac'al. A yet chon oc lacan yin cax chi toj is pojilal yul co k'ab. Axca tu' yayji oc cham reyal Egipto bay mac tol a cham chi yaoc yipok is c'ul.

²² Ta che yal ayin: A yin Jehová co Diosal on, chi jaoc co c'ul, ta quex chi, toxa mayal c'aylay el juntzan lugar yuj cham Ezequías bay che yak' ayilal bay e diosal tu', yetokc'al is yaltaril mayal c'ayilok. Cax max yaloni tol a bay altar ay bay Jerusalén, a tu' chi oc masanil eb anima ay bay Judá c'al bay Jerusalén yin ayilal.

²³ Axa tinani' xin, watx'nej junok a trato yetok in yajawil, a ton reyal Asiria, cax ok wak'on cabok mil no chej, ta chi ilchaj oj mac chi aj yiban no'.

²⁴ ¿Tom ok ex tzakay e yak'on owal yetok eb soldado ayoc yalan yikbej junok yajaw tol yaynakil yopiso co xol ayon Asiria on ti'? ¿Tom che na' tol ok ak'lay soldado c'al chej yuj Egipto ayex?

²⁵ Yetok c'apax junxa, ¿chim laj e na' tol c'amoc Jehová wetok cax chin jay yin wak'on owal, yet chex wak' c'ayilok? A Jehová max aloni tol ok wak' owal e yetok cax ok ex in c'ayon elok, ẍi.

²⁶ Cax max tak'wi Eliaquim c'al Sebna c'al Joa bay jun chekbej tu': —Chi wal ayach, elokab yin a c'ul chach k'anjab yin arameo ayon, yujtol chi jabej, palta c'am chach k'anjab yin hebreo yujtol chi yab masanil anima ayajtok yiban murallail conob, ẍi eb.

²⁷ Cax max yalon jun chekbej asirio tu': —Man asannejok ayach yetok e reyal bay max quin cheklaytek yuj in yajawil yet chi ul wal juntzan k'anej ti', palta wal yel a ton bay masanil eb anima ayajtok yiban muralla tu' chi wala', yujtol ok yab eb yail e yetok tol ok e lo' e tza' c'al e yuq'uen e txul ta chi oc owal.

²⁸ Xan max aj wan jun chekbej tu', caw wal yip max yalon yin hebreo: —Abek wal tzet chi yal cham rey mimanbil, a ton cham reyal Asiria:

²⁹ Manchak e yak' e ba yetnej Ezequías; tokwal ok je' yuj quex colon el yul in k'ab, ẍi cham.

³⁰ A Ezequías chi yochej che yaoc e nabal yin Jehová. Chi yaloni: Wal caw yel chon col-lay yuj Jehová co Diosal. A yuj Cham c'am chi ayc'ay co conob yul k'ab cham reyal Asiria, ta ẍi,

³¹ manchak e cha e yab bay tzet chi yala'. A cham reyal Asiria max chekon ul wal ayex asan tol che yaoc e ba yul k'ab yinc'al masanc'ulal, yet watx' ok e lo' tzetak yetal awbil e yuj axca e yuva c'al higo c'al e yuq'uen e yuc'bala' watx'nebil e yuj.

³² Chi lajwi tu xin, cax ok ex yiontok bay yul jun conob lajan axca e yet ti', bay ay uva, ay trigo, cax ok e watx'nen e pan c'al e vino, jun lugar bay ay aceite, c'al olivo, c'al no yal cab, cax watx' ok yun yec' e yuj, man ok ex cam yuj wajil. Palta manchak e yaoc yin e c'ul tzet chi yal Ezequías tu', toc'al chex yetnej yin tzet chi yal tu': A Jehová chon coloni, ẍi.

³³ Tokwal chi colchaj el juntzanxa nacionlak yul k'ab cham reyal Asiria yuj is diosal.

³⁴ ¿Baytal ay max je' yuj is diosal conob Amat c'al conob Arfad? ¿Baytal ay max je' yuj is diosal conob Sefarvaim c'al Hena c'al eb aj Iva? ¿Tokwal max colchaj Samaria yul co k'ab ayon asirio on ti' yuj is diosal?

³⁵ ¿Baytal wal ay junok juntzan diosal juntzan conob tu' max je' coloncan el is conob yul is k'ab cham reyal Asiria? ¿Tzet yuj xan che na' tol a Jehová ok je' colon el Jerusalén? ẍi jun chekbej tu'.

³⁶ Toxac'al max tz'inji el masanil eb anima. C'amxa mac max tak'wi, yujtol a cham rey Ezequías max aloni tol c'am mac chi tak'wi.

³⁷ Axca tu' max yun toj Eliaquim yilomal yatut cham rey yayji, c'al Sebna tz'ibem abix, c'al Joa yajtz'ib cham rey, yalon bay cham tzet max al-lay tu'. Max tzilontok eb is pichil yujtol caw wal max tac c'ul eb yuj tzet max yal is chekbej cham rey Asiria tu'.