Yet Is Cab Libroal Yabixal Eb Rey 17 - A Txꞌan Biblia Yin Kꞌanjobal 1989

Yayc'aybal Samaria, max tojcan eb israel preso

¹ A yet lajcawebxa abil yoc Acaz yin reyal bay Judá, axa Oseas c'ajol Ela, max oc yin reyal bay Israel; 9 abil max yak' reyal bay Samaria.

² Palta caw wal yob tzet max yun satak Jehová caxc'al maj wal apnok yintak is yobtakil juntzanxa eb rey max ec'lej bay Israel yet yalantok.

³ A Salmanasar, reyal Asiria max yak' owal yin Oseas. A jun ti' max oc is chekbejok c'al yak'on tojlabal bay.

⁴ Axa max yun xin, max yilontek Salmanasar tol a Oseas lananxa meltzoj oc ajc'ulal yin. Ayxa juntzan winak mayal chektok yin k'anon colwal bay So, reyal Egipto; yetok c'apaxok, c'amxa chi tojlanej tojlabal yet junjun abil. Yuj tu' xan max chek Salmanasar tol chi ilaytok Oseas preso.

⁵ Caytu' max yun yocxac'al yul masanil is makbej Israel, max yak'on owal yin Samaria, oxeb wal abil max yoymanej ajok.

⁶ Axa max yun xin, yet wal 9 abil yoc Oseas yin reyal, a yet tu' max ayxac'al c'ay conob Samaria yuj cham Salmanasar tu'. Caytu' max yun yilaytok masanil eb israel yin presoal. A tu' max ayji eb yuj bay conob Halah yul yet Habor bay is ti a' Gozán, c'al bay conoblak yet eb medo.

⁷ Caytu' max yun jayoc jun ti' yiban eb israel tu', yujtol caw wal max yaoc eb mul satak Jehová is Diosal, Cham max ion eltek eb bay Egipto yet max col-lay el eb bay yul k'ab cham reyal Egipto tu', max oc pax eb ayilal bay juntzan comon dios.

⁸ Max beybalnen eb is beybal juntzan nación max ilay el satak eb yuj Jehová, c'al juntzan beybalej max beybalnej jaywan eb is reyal eb.

⁹ Yin ewantakil max yun eb israel juntzan tzet yetal man watx'ok satak Jehová is Diosal eb, max watx'nen aj eb juntzan lugar yet ayilal bay can ay ajok bay junjun mimek conob, yetokc'al bay cuartel-lak.

¹⁰ Max watx'nen c'apax aj eb ch'en ch'en ya' yili yetok te te' chi tx'oxon jun diosal eb chi yik Asera bay tzalanlak c'al yich te te' xiwil pimal xak.

¹¹ A bay tu' max yak' tz'a eb incienso axca wal is beybal juntzan nación max yiel Jehová satak eb. Max tx'emtek eb yowal c'ul Jehová yuj yobtakil max el yunen eb.

¹² Max oc eb yin ayilal bay yechelej, a ton wal juntzan max yal Jehová tol c'am chi oc eb yin ayilal bay.

¹³ Max chek Jehová eb is chekbej yalon bay Israel c'al bay Judá: Naokab ba e c'ul yin masanil e yob beybalil, asan tol che yikej masanil chekbanilej, yetok ley c'al masanil cuybanilej max wak' bay eb e yichmam, ac'ala' a eb in chekbej lananc'al k'anjab el eb ayex, ẍi Cham, ẍi eb.

¹⁴ Palta maj wal cha yab eb, caw wal pit max yut eb is nabal axca yet is yichmam eb, yujtol caw wal maj yaoc eb Jehová is Diosal yipok c'ul.

¹⁵ Max yintaknej el eb ley c'al trato max watx'nej Cham yetok yichmam eb, c'al chekbanilej max al-lay bay eb yichmam eb tu', yetok c'apaxok tol max tzakloj eb yintak juntzan dios tol c'am jabok yelapnok. A yuj juntzan tu', xan c'amxa jabok yelapnok eb, axac'al is yob beybal juntzanxa nación max beybalnej eb, juntzan tol ay yowalil yuj Jehová beybalnen eb.

¹⁶ Max bekoncan eb masanil chekbanilej yet Jehová Dios, max watx'nen eb cab yechel wacax yul molde tol oro. Ay c'apax jun k'oj yechel xal Asera bay max oc eb yin ayilal, cax max oc pax eb yin ayilal bay masanil tzektebalej ay bay satcan, yetok bay Baal.

¹⁷ Max yak'on tz'a eb is yuninal yin xajanbalil bay comon dios, max k'anlen eb nabal bay eb naom el k'anej yaloni, c'al bay eb aj txum. Max bekonxac'al tok ba eb xol yobtakil satak Jehová; caywal tu' max yun tx'emon eb yowal c'ul Cham.

¹⁸ Yuj wal tu' xan caw wal max tit yowal c'ul Jehová yin Israel xan max yiel is satak. Asanxanej tribual Judá max cancan yuj.

¹⁹ Maj c'apax yikej Judá tu' chekbanilej yet Jehová is Diosal. A ti yet eb, tol max beybalnej eb axca wal tzet max beybalnej eb israel.

²⁰ Yuj tu xin, masanil eb yinatil Israel max intaknelay el yuj Jehová, xan max yak' ayc'ay eb, max occan eb yul k'ab juntzan eb max uchon lajwok eb masantac'al max yal yel eb satak Cham.

²¹ A Cham max pojon el eb israel tu' yintak eb yinatil David. A ti' yet eb tol max yaoc eb Jeroboam c'ajol Nabat yin is reyalok, a ton wal jun tu' max ikban el eb yintak Jehová, max yaon wal oc eb is mul caw wal yob.

²² Caywal tu' max yun yaonxac'al oc eb israel tu' is mul axca wal yobtakil max tz'uncan Jeroboam tu', majxac'al bek eb yuneni.

²³ Yuj tu' xan, max yiel Jehová eb israel tu' is satak, axca max yun chekon eb is chekbej yaloncan elok. Yuj tu xin, max ilaycantok eb israel yin preso bay Asiria, a ton bay tu' ayic' eb masantac'al tinani'.

Max oc pax Samaria conobal junelxa

²⁴ A reyal Asiria max iontek anima ayic' bay juntzan conob ti': a ton bay Babilonia, bay Cuta, bay Ava, bay Hamat, c'al bay Sefarvaim. A ton eb tu' max cajay yul yet Samaria is q'uexelok eb israel. Caytu' max yun cajay ec' juntzan anima tu' bay conoblak yul makbej Samaria.

²⁵ Yujtol a juntzan anima max jay cajan tu' c'amc'alta' chi oc eb ayilal bay Jehová, yuj tu' max yatok Cham no coj xol eb, max mak'lay cam jaywanok eb yuj no'.

²⁶ Yuj tu xin, max al-lay bay cham reyal Asiria: A eb anima max atok cajay bay Samaria man yojtakok eb chi oc ayilal bay is diosal jun lugar tu', xan a jun dios tu' chi chekontok no coj yin eb, cax chi mak'lay cam eb yuj no', ẍi.

²⁷ Xan max yak' meltzoj cham reyal Asiria junok eb sacerdote ibiltok yin presoal, yet watx' chi toj cajan bay tu' cax chi cuylay eb anima yuj, yin tzet chi yochej is diosal jun conob tu'.

²⁸ Xan max tit junok eb sacerdote aj Samaria tol ibiltok bay tu'. A tu' max ayji bay Betel, xan max cuywaj bay eb anima tu' tzetbil chi yun yoc eb yin ayilal bay Jehová.

²⁹ Palta junjunc'al nación max watx'nej is diosal bay junjun conob bay max cajayi. Max watx'nen aj eb is lugar bay tzalanlak bay watx'nebilta aj yuj eb aj Samaria.

³⁰ A eb aj Babilonia max watx'nej eb yechel Sucot-benot. Axa eb aj Cuta max watx'nej eb yechel Nergal; axa eb aj Hamat max watx'nej eb yechel Asima.

³¹ Axa eb aj Ava max watx'nej eb yechel Nibhaz, yetok yechel Tartac. Axa pax eb aj Sefarvaim max yak' tz'a eb yuninal yin xajanbalil bay yechel Adramelec c'al bay Anamelec, a ton juntzan tu' is diosal eb.

³² Cax chi oc pax eb yin ayilal bay Jehová yalbanil. Max yaon c'apax oc eb is yet conob yin sacerdoteal yet chi oc ayilal bay juntzan lugar bay can ay ajok.

³³ Axca tu xin, caxc'al mi chi oc eb yin ayilal bay Jehová yaloni, palta ac'ala' yoc eb yin ayilal bay is comon dios, axcac'alta' is beybal eb anima bay max ilaytek eb.

³⁴ Chitoc'al beybalnej eb tinani' axcac'al is beybal eb yet payxa tu'. C'am chi oc eb ayilal bay Jehová, tamwal chi yochej eb chi yikej chekbanilej c'al ley max yak' Jehová tol yowalil chi yikej eb yinatil Jacob, a ton cham max ak'lay yik Israel.

³⁵ A yet max watx'nen Jehová jun is trato yetok eb max yaloni: Manchak ex oc ayilal bay juntzanokxa comon dios, tamwal e yak'on serbil yin e yak'on xajanbal bay juntzan tu'.

³⁶ Palta a' ayin, a tu' chex oc yin ayilal, yujtol ayin max ex wieltek bay Egipto yetok wipalil, xan asan wal ayin yowalil chex oc yin ayilal, asan ayin che yak' c'apax e xajanbal.

³⁷ Yetok c'apaxok tol che yikej masanil in ley, in chekbanil, c'al in cuybej tol tz'ib yayjicanok. C'am chex oc ayilal bay juntzanxa comon dios.

³⁸ C'amokab chi toj c'ayc'ulal e yuj in trato chin watx'nej e yetok ti'. C'amc'al chex oc yin ayilal bay juntzanxa comon dios,

³⁹ palta asannej ayin Jehová e Diosal in ti', catatu' ok ex in colon el yul k'ab eb e yajc'ul, ẍi Jehová.

^40-41 Palta a juntzan nacionlak tu' majc'al cha eb yabej. A ti yet eb, tol max tzaklojc'al eb yintakc'alta' is beybal. Caxc'al chi oc eb yin ayilal bay Jehová yaloni, palta ac'ala' chi oc pax eb yin ayilal bay is diosal. A is yinatil eb max beybalnejc'al eb axcac'al beybal yichmam eb, ac'ala'c'al is beybal eb tu' tinani'.