Yet Is Cab Libroal Yabixal Eb Rey 13 - A Txꞌan Biblia Yin Kꞌanjobal 1989

Ocnak Joacaz yin reyal bay Israel

¹ A yet 23 abilxa yoc Joás is c'ajol Ocozías yin reyal bay Judá, a yet tu' max chail yich Joacaz, c'ajol Jehú yak'on reyal bay Israel. 17 abil max yak' reyal bay Samaria.

² Palta caw wal yob is yunben satak Jehová. Majc'al bek yunen yobtakil axca wal is yobtakil Jeroboam is c'ajol Nabat, cham max ikbantok eb yet israelal yin yobtakil.

³ Yuj wal tu' xan max tit wal yowal c'ul Jehová yin Israel, yin miman tiempoal max oc eb yul k'ab Hazael reyal Siria, c'al yul k'ab Ben-adad, is c'ajol.

⁴ Yuj tu xin, max txajli Joacaz bay Jehová, cax max ablay is txaj tu' yuj Cham, yujtol max yil Cham tzet wal chi utlay eb israel yuj reyal Siria,

⁵ xan max yak' Jehová jun mac max colwaj yin eb. Caytu' max yun yel eb israel bay yul k'ab eb sirio, max ayji ec' eb yin junc'ulalil bay yatut axca ta yayji ec' eb yet yalantok.

⁶ Palta xin, majc'al bekcan eb beybalnen jun yobtakil bay max ikbelay eb yuj Jeroboam yetokc'al eb yinatil. Max ajc'al can eb yin jun yobtakil tu'; a pax jun yechel Asera ayc'al ec' bay Samaria.

⁷ A Joacaz tu' c'amxa tx'ial eb is soldado, asanxanej 50 soldado chi oc yiban chej, 10 carruaje yet owal, yetok lajoneb mil eb soldado chi beyi, yujtol a reyal Siria max ak'on lajwok el eb.

⁸ A jantakto is yabixal rey Joacaz c'al jantakto tzetak max yunej, a tu' tz'ibbilcan bay tx'an un yet is yabixal eb reyal Israel.

⁹ A yet max cami, a tu' max mukay bay Samaria. Max lajwi tu' axa Joás is c'ajol max occan yin reyal is q'uexelok.

Ocnak Joás reyalok Israel

¹⁰ A yet 37 abilxa yoc Joás yin reyal bay Judá, a yet tu' max chail yich Joás is c'ajol Joacaz, yak'on reyal bay Israel, 16 abil max yak' reyal bay Samaria.

¹¹ Palta caw wal yob tzet yetal max yun satak Jehová, yujtol ayc'al oc yin yobtakil axca wal is yobtakil Jeroboam, is c'ajol Nabat, cham max ikbantok eb yet israelal yin yobtakil.

¹² A jantakto yabixal Joás c'al jantakto tzetak max yunej, c'al tzet max yun yak'on owal yetok Amasías reyal Judá, a juntzan tu' tz'ibbilcan bay yul tx'an un yet is yabixal eb reyal Israel.

¹³ A yet max cam Joás, a tu' max mukay bay Samaria yetokc'al juntzanxa eb max ec'lej reyal bay Israel. Lajwi tu' max oc Jeroboam yin reyal is q'uexelok.

Camichal cham Eliseo

¹⁴ A yul is tiempoal Joás is reyal Israel, caw wal yobxac'al is c'ul cham Eliseo yuj jun ilya' max onxac'al cami, xan max betic' Joás tu' yilon cham, max ok'aj yin cham, max oc lak'an yin, max yaloni: —¡Ay mamin, ay mamin! Axca wal junok ejército xiwil yip, caywal tu' ayji xol co conob Israel ti', ẍi bay.

¹⁵ Max yalon cham Eliseo: —Itek junok a julbal yetok jayebok is flechail, ẍi cham. Cax max yiontek cham rey tu'.

¹⁶ Max yalon cham Eliseo: —Watx'nej ocok yet ok a julon el junok a flecha tu', ẍi cham. Yak'ban chi yun cham rey axca tu', cax max yaon oc cham Eliseo is k'ab yiban is k'ab cham rey tu'.

¹⁷ Max yalon cham Eliseo: —Jak wentena bay yetc'ulaltok Siria, ẍi cham. Max jakon cham rey wentena tu', max yalon cham Eliseo: —Julwajantok tinani', ẍi cham. Max julwajtok cham rey, max aj yaw cham Eliseo: —A julbalej chi tx'oxon el colwal Dios yin is conob, a julbalej chi tx'oxon el lowbanil yin eb sirio, yujtol ok ak' ayc'ay eb sirio bay Afec cax ok ak'on lajwok eb masanil, ẍi cham.

¹⁸ Max lajwi tu' cax max yalon pax cham Eliseo bay cham rey tu': —Iaj a flecha, ẍi cham. A yet max yion aj is flecha tu', max yalon pax cham Eliseo: —A tinani' cha chucubtanej ay sat tx'otx', ẍi cham. Xan max chucay cham rey tu' oxel sat tx'otx', max oc wanajok.

¹⁹ Max tit yowal cham Eliseo, max yaloni: —Ta max a chucay oyelok ma wakelok bay sat tx'otx', axca tu' max ak' lajwok masanil eb sirio. Akxa tinani' asan ch'an oxel ok ayc'ay eb oj, ẍi cham.

²⁰ Cax max cam cham Eliseo, max muklayi. Junjunc'al abil chi jayc'al eb moabita elk'an bay yul is makbej eb israel.

²¹ A yet junel, max toj juntzan eb israel mukon jun camnak. A yet lanan wal yapni oc eb bay ok mukayok, max yilon eb jayoc eb elk'om tu', toxac'al max k'okcan octok eb jun camnak tu' bay mukan cham Eliseo, cax max toj eb. A yet max apni oc jun camnak tu' yin is bakil cham Eliseo, max ictzojajok, max aj lecanok.

²² Caw wal max etax eb israel yuj Hazael reyal Siria yak'ban yet iquisto ec' rey Joacaz.

²³ Palta a Jehová xin, max cusc'ul yin eb, yujc'al is trato yetok Abraham, Isaac c'al yetok Jacob, xan max oc t'anan yin eb. Maj cha' yak'layxac'al lajwok ay eb, tamwal yilay el eb is satak masantac'al tinani'.

²⁴ A yet max cam Hazael reyal Siria, axa is c'ajol chi yik Ben-adad max occan yin reyal is q'uexelok.

²⁵ Axca tu xin, a Joás is c'ajol Joacaz max colon el juntzan conoblak max yiec' rey Ben-adad bay rey Joacaz yet max yak'on owal. Oxel wal max ayc'ay Ben-adad yuj, caywal tu' max yun colon pax juntzan conob tu'.