Yet Is Cab Libroal Yabixal Eb Rey 11 - A Txꞌan Biblia Yin Kꞌanjobal 1989

A xal Atalía max yaoc ba yin reinail

¹ A yet max yaben xal Atalía is txutx cham rey Ocozías, tol mayal cam yune' tu', max chekon c'aylay el masanil is yinatil cham rey tu'.

² Axa pax xal Josaba, is cutz'in cham rey Joram, is cab yanab cham rey Ocozías tu', a' max ion can el Joás is c'ajol Ocozías xol juntzanxa is c'ajol lanan mak'lay cam tu'. Caytu' max yun c'uban el bay Atalía tu'. A tu' max bet c'ubaj el nak yetok ix max ilon ch'ibok bay jun cuarto bay chi way anima, yuj tu' xan maj mak'lay camok.

³ A tu' max c'uayc'al el Joás yetok ix yilomal ch'ib tu' bay templo Jehová yin wakeb abil. Yak'ban tu' max yak' xal Atalía yajawilal bay Judá.

⁴ Axa yet is suk abil xin, a cham sat sacerdote Joiada, yichamil xal Josaba, max chek awtelay eb cham capitanil eb cereteo c'al yetok eb chi taynen yatut eb rey. A' max aon octok eb bay yul templo Jehová. A bay tu' max yak' eb ti' yuj, yin yoccan eb yetok yin tzet yetal nabil yuj, max tx'oxlay oc Joás, is c'ajol camom Ocozías bay eb yuj.

⁵ Ayman max yal bay eb: Caywal ti' ok e yun axca ti': Ayex chex occan yin e turno yet c'ual xewilal, junok makan ex ok e taynej yatut eb rey.

⁶ Axa junxa makan ok taynej bay puerta yet Shur. Axa junxa makan, a tu' ok taynej bay yintak is nail bay ay eb chi taynen eb rey. Cayton tu' ok yun e taynen templo ti' yet watx' c'am che cha jayoc junok mactxel tol c'am yalon yet.

⁷ Axa ayex chex elcan yet c'ual xewilal tu', ca makan che yut e ba che taynen templo Jehová ti' c'atan cham rey.

⁸ Tol ok ex oc oyan yinlak bay ay cham rey, junjunc'al ibil oc is yarma. Tzanc'al mactxel chi octok e xol bay txolan ex oc tu', tojolc'al cami. Ac'ala' ayex ti' ok ex tok yetok cham rey tzanc'al baytal ok tok, ẍi cham Joiada.

⁹ Max yikej eb capitán yunen bay tzet max yal cham sacerdote Joiada. Junjunc'al eb max chekon eb is soldado, axca eb chi oc yin is turno yet c'ual xewilal c'al eb chi elcanok, cax max oc eb satak cham sacerdote Joiada tu'.

¹⁰ Xan max yak' cham ch'en lanza c'al ch'en makbal julbalej bay eb capitán tu', a ton ch'en yet cham rey David yayji yet yalantok. A juntzan ch'en tu', a tu' ayic' ch'en bay templo yet Jehová.

¹¹ Caytu' max yun yayji oc oyan eb soldado taynen satak templo yinlak altar c'al yinlak cham rey, junjunc'al ibil oc is yarma.

¹² Catatu' max yion eltek cham Joiada is c'ajol cham rey, max yaon aj is corona, max yak'on jun yunal trato Dios bay. Lajwi tu' max secon ajtok aceite yiban is jolom nak, axa yalon el cham tu' tol reyxa nak. Lajwi tu xin, masanil max tzak'on eb is k'ab max yalon eb: Viva co reyal, ẍixac'al eb.

¹³ A yet max yaben Atalía yel yaw eb soldado c'al eb anima, max toj bay templo Jehová, bay ayic' eb masanil.

¹⁴ Axa max yiloni, ayic' jun rey bay tu', lecan oc bay c'atan jun oy bay yul tu' axcac'alta' is beybal eb. A bay is tz'eyil nak, a tu' ayic' eb yajaw c'al eb chi aon oc música. Masanil eb anima chi tzaloj eb, cax chi xulay trompeta. Xan max tziltok xal Atalía is pichil, max el yaw: ¡Uktem ex el rey ayex ti'! ¡Uktem ex el rey! ẍixac'al xal.

¹⁵ Axa cham sacerdote Joiada max alon bay eb capitán yayji yin eb soldado: —Iek eltek xal e xol bay txolan ex oc tu'. A mac chi tzakloj yintak xal tu', teklayokab camok, ẍi cham Joiada. Yujtol mayal yal cham sacerdote tol c'am chi je' mak'lay cam xal bay templo Jehová.

¹⁶ Caytu' max yun yeltok xol eb tu', max ilaytok bay chi ocapnok is be eb ayoc yiban chej chi apni bay yatut eb rey. A bay tu' max mak'lay cam xal yuj eb.

¹⁷ Lajwi tu xin, max yalon cham sacerdote Joiada tol chi watx'nej cham rey c'al eb conob junok trato yetok Jehová tol chi yacan oc ba eb is conobok Cham. Max yalon c'apaxok tol ayokab junok trato cham rey yetok eb conob tu'.

¹⁸ Lajwi tu xin, max toj eb bay templo Baal, max yuchon ay eb, max mak'on poj eb juntzan altar c'al juntzan yechelej. Axa Matán, sat sacerdote yayji bay Baal tu', max mak'lay cam yuj eb satak juntzan altar tu'. Max yaon oc cham sacerdote taynemal templo yet Jehová.

¹⁹ Ayman max eltok eb capitán, eb cereteo, c'al eb chi taynen cham rey, c'al masanil anima. Junej max yun yel eb bay templo yet Jehová yetok cham rey masantac'al max apni eb bay yatut cham. A tu' max ca yoctok eb bay puerta bay ayic' eb chi tayneni, axa yay chotan rey Joás bay yul trono.

²⁰ Masanil eb anima max tzalojbi ajok, yujtol a xal Atalía mayal tzoc'lay cam bay yatut eb rey. Caytu' max yun cancan jun conob tu' yin tzalojc'ulal.

Ocnak Joás yin reyal bay Judá

²¹ Ukeb abil is k'inal rey Joás yet max chaon el yich yak'on reyal bay Judá.