1 Ts 3 - A Txꞌan Biblia Yin Kꞌanjobal 1989

¹ Palta maj ex techaj co naoni, xan max co nabalnej el co can co tx'oklil bay conob Atenas ti',

² cax max co chekontok Timoteo ti' ayex, yujtol yak'omal serbil Dios jetok yin yalon el k'anejal yet colbanilej aycan yuj Cristo. A' max toj yuj yak'on e tec'anil. Max toj yuj yaon oc e nabal, yet watx' che ya wal oc Cristo yin e c'ul,

³ c'al yuj yalon e yabej, yet watx' c'am ex chi somchaj el e nabal yuj tzet bay lanan e yaben yail. E yojtakxa tol yowalil chi jay juntzan yailal ti' jiban.

⁴ A yet max on ec' ayex tu', max jaloncan ayex, tol yowalil chi jab yail, xan e yojtakxa. Mayal wal yun axca max jut jaloncan tu'.

⁵ Yujc'al wal tu', maj ex techaj in naoni, xan max in chektok Timoteo toj yabentek, ta ayc'al oc Cristo yin e c'ul. A talaj c'uxan chi ak'lay somchaj el e c'ul yuj nak diablo, cax nabac'al mi max jetnej co ba co mulnaj e nan e xol.

⁶ Axa tinani xin, ti' mayal betic' Timoteo ayex. Max yala' tol ac'ala' ayc'al oc Cristo yin e c'ul, cax ayc'al e camc'ulal yin. Max yalon c'apaxok tol naan onc'al e yuj masanil tiempo, cax chon e camc'ulnenc'al, cax tolab che yochej che yil jin. Ilab on c'apaxok, caw wal xiwil chi jochej chi jil e yin.

⁷ Ayon ti' ex wuẍtak, ex wanab, xiwil tzet yetal chi jayoc jiban, lanan wal jilon yailal cayti', palta a yet max jabeni tol ayc'al oc Cristo yin e c'ul, max jay wal co tzalojc'ulal e yuj.

⁸ A yet max jabeni tol tec'anc'al waay e nabal yin Cham Jajawil, axca wal tol max ji' jun xikokxa co k'inal e yuj.

⁹ Yuj tu' xan caw wal chi jal yuj diosalil bay Dios e yuj, yujtol caw wal chon tzaloj e yuj satak Cham.

¹⁰ C'ualil c'al ak'balil chi jak' jip co txajli, yuj co k'anontok co ba ex toj jiloni, cax chi cam wal co tz'aktzencan e tec'anil tu'.

¹¹ Chi jochej chi oc co Mam Dios, c'al Cham Jajawil Jesucristo jetok, yet watx' chi je' co toj ayex tu'.

¹² Chi jochej chi yak' mimanbok Cham Jajawil e camc'ulal, yet watx' che camc'ulnelej e ba wal sic'libil, cax ok je' e camc'ulnen masanil anima axca chex jut co camc'ulneni.

¹³ Chi jochej tol a Cham chi ak'on tec'anbok e nabal, yet watx' ac'ala'c'al watx'il e beybal, cax c'am jabok e yobtakil yul sat co Mam Dios yet ok jay Cham Jajawil Jesucristo yetok eb yet-xa yayji.