1 Ts 2 - A Txꞌan Biblia Yin Kꞌanjobal 1989

Is mulnajil Pablo bay Tesalónica

¹ Ex wuẍtak, ex wanab, e yojtak tol man nabaok ec'nak ex jila'.

² Babel ec'nak on bay conob Filipos,*fn* cax e yojtak tol ec' jilnak yailal bay tu'. Max on yetnej eb sic'libil. Ac'ala' yet max on apni bay e conob tu' max jil c'apax yailal, palta max oc Cham co Diosal jetok. Yuj tu' xan c'am jabok max on xiw jalon el k'anejal yet colbanilej e xol.

³ Man ibilok aytek co sat xan max jal ayex. Man yujok junok tzet yetal yob chi jochej oc e yin, xan max on ec' ayex. Man yinok etnewalil xan max jal ayex.

⁴ A ti jet, axca wal chi yochej c'ul Dios, axca tu' max jut ec' jalon elok, max yil Dios tol co moj yaon oc jopiso yin aloj el k'anejal yet colbanilej. Man yujok jak'on tzalojbok c'ul anima, xan chi ec' jalcan elok, palta yuj jak'on tzaloj c'ul Dios, yujtol a' chi ilon yin co nabal junjun on, ta watx' ma tatol yob.

⁵ E yojtak, tol man toc'alok max ex ec' jal watx'il. Man yujok jion tumin, xan max ec' jalcan el ayex. Chi yil Dios, tol caw wal yel chi jala'.

⁶ Maj co say co mimanbilal e xol ayex ti', tamwal xol juntzanxa eb anima.

⁷ Max je' jalon oc co ba yajawil ayex, yujtol chekbej on Cristo. Palta yaynakil anima max jut co ba e xol. Axca junok ix ix chi ya'ilnej ch'ib yune', caytu' jutnak co ba ayex.

⁸ Caw wal ay co camc'ulal e yin. Yuj tu' xan man asannejok tol max jal k'anej yet colbanilej yet Dios e yabej, palta max co na' tol watx' c'apax chi co bek oc co ba yul e k'ab, yuj co camc'ulal e yin.

⁹ Ex wuẍtak, ex wanab, tekan che natek tzet max jut mulnaj co ba e xol. Caw wal max jak' jip co mulnaji. A yet max ec' jal k'anejal yet colbanilej tu' ayex, c'ualil c'al ak'balil max on mulnaj yuj co gasto. Yujtol max yochej co c'ul tol c'am mac chi yetnej c'ul yak'on co gasto tu'.

¹⁰ A yet ayon ec' e yetok tu', watx'c'al co beybal. Tojolc'al max jut co nabal e xol. C'am jabok tzet yetal yob max ec' co saya'. E yojtak tol caytu' max ec' jut co ba. Yojtak c'apax Dios tol cay ton tu'.

¹¹ E yojtak c'apaxok, tol axca chi yut yiptzen junok mamej is yuninal, c'al mimanc'ulneni, caytu' max ex jut jiptzencanok, c'al ex co mimanc'ulnen canok.

¹² Cax max jaloncan ayex, tol caw wal watx'c'al che yut e beybal, axca wal is mojalil e yawtebal yuj Dios. A Cham awtenej ex oc yul k'ab yet watx' ay e yalon e yet yin is watx'ilal.

¹³ A yet max jalon el k'anej Dios e xol, ayman max e yaoc yin e c'ul, yujtol yel toni is k'anej Cham, man yetok anima. Yuj tu' xan caw wal chi jal yuj diosalil bay Dios e yuj. Caw wal yel yet Dios jun k'anej tu'. Chi watx'ji oc co nabal ayon creyente on ti' yuj.

¹⁴ Ex wuẍtak, ex wanab, lajan wal max ex utlay axca max utlay eb creyente bay junjun yiglesia Dios yul yet Judea, eb tol yet c'apax Cristo Jesús. Caw wal max etnelay eb yuj eb jet israelal on. Cay ex c'apax tu', max ex etnelay yuj c'apax eb e yet conob.

¹⁵ A eb jet israelal on tu' ak'nej cam Cham Jajawil Jesús, yak'nak c'apax cam eb eb chekbej Dios yet payxa. Max on yuktej c'apax ec' eb ayon ti'. Caw wal yob eb yul sat Dios. Ajc'ul oc eb yin masanil anima.

¹⁶ A yet chi jochej chi jal yabix eb man israelok, yet watx' chi colchaj eb, c'am chi cha' eb jet conob on tu' jalon elok, xan yelxac'al chi mimanbi mul eb yul sat Dios. Yuj tu xin, xan a tinani', mayal yaoc Dios jun miman yailal yiban eb yin tz'akanil, yuj yowal is c'ul.

Yochwan Pablo

¹⁷ Ex wuẍtak, ex wanab, ayxa tiempo e can e tx'oklil juj. Caxc'al c'am chi jil-lejek oc jin, palta caw wal chex co nac'altek. Caw wal chi jochej chex toj jila'.

¹⁸ Max jak'lej co toji. Ilab ayin Pablo in ti', tx'ial el max wak'lej in toji, palta a Satanás maj on cha on tok.

¹⁹ A yet ok jay Cham Jajawil Jesucristo cax ok on ayjok ec' satak, chi jaoc yipok co c'ul tol e yuj xan ok co cha' co paktzebal. E yuj xan ok on tzalojbok aj sic'libil. Ok co cha' paktzil co mulnajil max jun e xol.

²⁰ E yujc'al xan caw wal watx' jet, cax caw wal chon tzaloj e yuj.