1 Ti 5 - A Txꞌan Biblia Yin Kꞌanjobal 1989

A tzet moj chi beybalnej masanil eb creyente

¹ Manchak a tzu eb cham ichamtak winak. Jek oc nabal eb yin watx'c'ulalil axca chot alon junok tzet yetal bay a mam. C'al bay eb nak ach'ejtak winak, watx'c'al chot alon yab eb nak, axca chot alon yab junok caw oẍtak.

² Ac'ala' c'apax bay eb xal ixnamil ix, watx' chot alon yab eb axca chot alon yab a txutx. C'al bay eb ix k'opoj ix, watx'c'al chot alon yab eb, axca bay junok acaw anab. Manokab cab satok chot k'anjab a ba bay eb.

³ Chi wal c'apaxtok juntzan chekbanil ti' ayach yuj eb ix ix camnakxa yichamil. A ton eb junelnej wal tol tx'oklil, yowalil chon colwaj bay eb ix.

⁴ Ta ay eb ix ay yune', ma yitxiquin, yowalil cha cuy eb uneej tu' c'al eb itxiquinej tu', tol a eb cuenta yak'on colwal bay is mam, c'al bay is txutx, yuj yak'on eb pak tzet max ak'lay bay eb. Ta chi beybalnej eb axca ti', caw watx' yul sat Dios.

⁵ Ay eb xal chi cam yichamil, cax caw yel tol tx'oklilxac'al, asanxanej Dios chi yaoc eb yipok c'ul. C'ualil c'al ak'balil txajc'al chi yun eb bay Dios, yuj k'anon eb tzet chi k'anabax oc yuj.

⁶ Palta ay eb xal camnakxa yichamil chi yak' is nabal yin tzet chi yochej c'ul. Caxc'al iquis eb tu' yul sat anima, palta yul sat Dios camnak el eb.

⁷ Chi cam alon juntzan cuybej ti' bay eb xal bay tu', yet watx' c'amokab mac yob tzet chi alon yin eb.

⁸ Ta ay eb creyente c'am chi colwaj bay is mam, c'al bay is txutx, ma bay is mam yican, c'al bay eb ayic' yetok yul yatut, titol c'am jabok yelapnok cuybej Cristo bay eb chi yal tu', cax ec'ban yobal eb yintak eb man creyenteok.

⁹ A eb xal camnakxa yichamil ok waltek ti', chi je' yoc eb cargook iglesia: Eb xal ayxa 60 abil is k'inal, eb xal tol c'amc'al bay max say is mul yul k'ab yichamil.

¹⁰ Eb xal miman txequel tol watx' is beybal satak yet creyenteal. Eb watx' max yut yilon ch'ib yune', eb xal max beybalnej ak'oj posada. Eb max yak' serbil yet creyenteal yin ayilal, eb max colwaj bay eb ayoc yin yailal, eb watx'c'al tzet chi el yuneni. Asan ton eb xal ti' chi je' yoc cargook iglesia.

¹¹ A pax eb ix k'opoj ixto xin, cax chi cam yichamil, man a chaoc eb cargook iglesia. Yujtol ay eb, a wal tzet chi yochej c'ul chi beybalnej, cax chi bekoncan eb Cristo. Asan junokxa yichamil eb chi na'.

¹² Ok beyc'ulnelay eb, yujtol c'am chi yikej eb bay max yak' is ti'.

¹³ Yetok c'apaxok, chi yilil eb ix isajil. Asanxanej k'anej chi yil yun eb ix xolak na. Man asannejok tol chi yilil eb ix isajil, palta chi yil c'apax el eb ix wajoj k'anej, cax comon chi yaltok eb ix yet xol junok tzet yetal bay c'am yalon yet, cax chi yalon c'apax eb ix tzet man watx'ok.

¹⁴ Yuj tu' xan chi wochej tol a eb ix k'opoj ixto camnakxa yichamil, watx' chi yi' eb ix junokxa yichamil. Unewokokab eb ix. Yak'okab cuenta eb ix yul yatut. Ta chi yikej eb axca walon ti', c'am tzet chi je' yalon eb ajc'ul jin yuj eb ix.

¹⁵ Chi waltok juntzan ti' ayach, yujtol ay eb ix camnakxa yichamil meltzojnakxa yintak. Axa Satanás chi yak' serbil eb ix tinani'.

¹⁶ A jantak creyente aj lugar bay tu', caxc'al winak, ma ix, ta ay junok xal ix camnakxa yichamil ayic' yintak, yowalil chi colwaj eb bay xal. Yujtol man mojok ta a iglesia chi cargonen eb. Asan eb xal caw is tx'oklil, a eb moj chi col-lay yuj iglesia, yujtol maj tzakay iglesia cuentanen eb xal masanil.

¹⁷ A eb anciano watx' yak'on cuenta yet creyenteal, yowalil ayokab ay yelapnok eb yul sat yet creyenteal masanil. Mawal eb chi yak' yip cuywaji, c'al yalon el k'anej Dios, yelxac'al ec'ban yelapnok eb.

¹⁸ Yujtol ẍi tx'an Un axca ti': Manchak e yaoc pa yin ti no no' yet chi tec'wi trigo, ẍi. Cax chi yalon c'apax tx'an axca ti': A mac chi mulnaji, moj chaon is tojol, ẍi.

¹⁹ Ta ay mac chi ak'on queja junok anciano, yowalil ayokab cawanok, ma oxwanok testigo. Ta c'am cawan oxwan testigo tu', man a cha' ab tzet chi al-lay aj yin tu'.

²⁰ Ta ay mac c'am chi bekcan yunen yobtakil, cha tenchanej satak eb creyente masanil, yet watx' chi xiw eb masanil yoc is yobtakil.

²¹ Satak Dios, yetok satak Jesucristo, c'al satak eb is yángel sic'bilcan el yuj, chi cam walontok ayach, tol chekej juntzan chekbanilej ti', yin tol c'am a q'uexanc'ulal yin junjun.

²² Man comonok chaoc yopiso junok mactxel yin ayman, yet c'amto chi cam elon is beybal, yujtol axa talaj chi yunajok, chach locaytok xol is yobtakil. I el a ba yin tzanc'al tzet man watx'ok.

²³ Chi waltok ayach yuj a c'ul, ilab tol ya'c'al. Manokab asannejok aej choq'uej. Chi je' oq'uen jabok vino, yet watx' chi watx'ji a c'ul tu'.

²⁴ Ay mac miman txequelxa is yobtakil yet manto beyc'ulnelayok. Ay mac xin, masantac'al chi beyc'ulnelayi, catatu' chi txecloj aj is yobtakil.

²⁵ Cay c'apax tu' eb watx' is beybal, miman txequelxa eb tol watx' is beybal eb. Ta ay eb watx' is beybal c'amto chi txecloj elok, yowalil ok txeclojc'alta' el eb.