1 Ti 4 - A Txꞌan Biblia Yin Kꞌanjobal 1989

Ay creyente ok yican el ba yin is creyenteal

¹ Yin jichanil chi yut yalon Cham Yespíritu Dios, tol a yet lananxa jay lajub tiempoal, ay eb ok yican el ba yin creyenteal, cax axa yin cuybej man yelok ok yaoc eb nabal. A juntzan cuybej tu', cuybej demonio.

² Ok yacbaj eb txiquin yaben tzet chi yal anima lek'ti'. Cabsat juntzan eb anima tu'. Junelnej wal tol etaxnak el nabal eb sic'libil.

³ Ok tz'ak yal eb axca ti': Ay yowalil chi oc jetbi. Ay juntzan tzet ay yowalil co looni, ẍi eb, ok tz'ak yalon eb lek'ti' tu'. Palta a Dios watx'nenej juntzan tzetak yetal tu', yuj co loon ayon creyente on ti'. Yuj tu' xan a yet chi co looni, chi jal yuj diosalil bay Dios yuj, yujtol jojtakxa jun cuybej acaw yel.

⁴ Masanil tzet watx'nebil yuj Dios, watx'c'al elok. Yuj tu', c'am chi je' jaloni tol ay tzet man watx'ok yul sat. Chi je' co loon masanil tzetak yetal, asan tol chi jal yuj diosalil bay Dios yuj.

⁵ Ta chon txajli, cax chi jalon yuj diosalil yuj tzet chi co lo' tu', c'am yowalil, yujtol caytu' yalon k'anej Dios.

Is beybal eb chekbej Jesucristo

⁶ Ta ok ak' juntzan cuybej ti' cuy eb creyente bay tu', cax chak'on ep yin a cuyon a ba alon juntzan k'anej chi jaoc yin co c'ul, a ton juntzan cuybej caw watx' bay ayoc co nabal, watx' chekbej Jesucristo ach chi yal tu'.

⁷ Palta manchak a cha' ab juntzan comon abix c'am yelapnok. Ac'al oc a nabal yin Dios.

⁸ Ta chi co k'aytzej co mimanil yet watx' ay jip, watx' toni; palta yelxac'al ec'ban watx'il ta chi jaoc co nabal yin Dios. Ta caytu' chi jut co ba, ay is watx'il ok co cha' bay yulyibank'inal ti', c'al bay satcan.

⁹ A jun cuybej ti', caw wal yel. Moj chi co cha' jab yin masanil co c'ul.

¹⁰ Yujc'al ton jun ti', xan chi jiajtek co c'ulok jak'on jip co mulnaj yin yet Dios, yujtol a Cham Dios iquis chi jaoc yipok co c'ul. A Dios, is Colomal masanil anima yayji. A eb chi yaoc c'ul yin, ok colchaj eb yuj.

¹¹ A juntzan tzet chi waltok ayach ti', caw chi cam alon bay eb creyente bay tu', cax cha cuyon eb yin.

¹² Watx'c'al chot a ba satak eb creyente masanil, yet watx' c'am mac chach alon uninal. Watx' chot k'anjab a ba bay eb. Watx' chot a ba satak eb. Watx' chot a camc'ulnen eb. Asannejokab Cham Jajawil chaoc yin a c'ul. Tojolc'al chot a nabal yil eb, yet watx' caytu' chot a tx'oxon watx' beybalej yil eb bay tu'.

¹³ Yak'ban chin apni, ak' ep awten tx'an k'anej Dios yab eb. Chak' ep a jekon oc nabal eb, c'al a cuyon eb.

¹⁴ Manchak a bek ilnej opiso ak'bil yuj Dios yet max batxban ajtok eb anciano k'ab yiban a jolom. A Dios ak'nej nachaj el yuj eb tol ok ach k'anbalnej, xan max ak'lay c'apax ojtaknej elok tzet ok ot ak'on serbil.

¹⁵ Caw chaoc juntzan chi waltok ayach ti' yin a c'ul, yet watx' ok yil eb masanil bay tu', tol cac'al ti' eon ep junjun c'u.

¹⁶ Taynej a ba, cax chi cam eloni tzet cuybanilejal chak' cuy eb. Tec'anc'al chot a ba yet watx' ok a col a ba, cax ok colchaj c'apax eb chi aben tzet chala'.