1 Ti 3 - A Txꞌan Biblia Yin Kꞌanjobal 1989

Is beybal eb anciano

¹ A junxa k'anej ok waltok ayach ti', caw wal yel. Ta ay mac chi yochej chi oc yilomalok yet creyenteal, watx' jun mulnajil chi yochej eb chi yun tu'.

² Ok waltek tzet yowalil chi el beybalnen eb chi oc yin jun opiso tu'. C'amokab bay chi el yunen eb junok tzet yetal man watx'ok, yet watx' c'am tzet yin chi je' yak'lay queja eb. Yowalil tol junnejokab yistzil eb. Tec'anokabc'al chi yut eb is nabal, yak'okabc'al cuenta ba eb. Yowalilokab watx'c'al chi yut eb is beybal satak yet animail, ak'om posadaokab eb. Watx'okab chi yut cuyon eb eb yet creyenteal.

³ Manokab uq'uemanok eb. Manokab mak'wajwomok eb. Watx'okab c'ul eb. Manokab ak'om owalok eb. Manokab asannejok yin ak'oj ganar tumin ayoc nabal eb.

⁴ Watx'okab yak'on cuenta ba eb yul yatut, yet watx' yikemokabc'al yuninal eb bay, yet watx' ayokab yelapnok eb yul sat yuninal tu'.

⁵ A mac man yojtakok tzet chi yut yak'on cuenta ba yul yatut, ¿tom ato wal yak'on cuenta yiglesia Dios ok je' yuj?

⁶ A eb unin creyente, c'amto chi je' yalay oc yopiso eb, yujtol ay is may chi yi' can ba eb. Ta chi yi' can ba eb, ay is may chi alay oc is yailal eb, axca max utlay nak diablo.

⁷ A eb ayoc yopiso, yowalilokab watx' chi yut eb beybal satak eb man creyenteok, yet watx' c'am chi buchlay eb, c'al yet watx' c'am chi ayc'ay eb yul is trampa nak diablo.

Is beybal eb diácono

⁸ Ti chi wal c'apaxtok ayach tzet yowalil chi el beybalnen eb diácono. Yowalil tol watx'okab chi yut eb beybal satak yet animail. Manokab cabok is ti' eb. Manokab uq'uemanok eb. C'amokab chi yi' eb tumin yin tzet man watx'ok.

⁹ Yowalil caw chi yaoc eb nabal yin juntzan cuybej ak'bil ayon yuj Dios, juntzan bay chi jaoc co c'ul. Yuj tu' yowalilokab chi cha yab eb tzet chi yal yikbomal is nabal.

¹⁰ Beyc'ulnelayokab eb chi oc diáconoal tu' babelal. Ta c'am is paltail eb chi ilchaji, chi je' yalay oc yopiso eb.

¹¹ Ac'ala' c'apax eb ix ix chi oc yopiso, yowalil watx'okab chi yut eb ix is beybal satak yet animail. Manokab alom k'umalok eb. Yowalil tec'anokab chi yut eb is nabal. Yetok c'apaxok, yikemokabc'al chi yut ba eb ix watx'nen masanil tzet chi cheklay watx'nej.

¹² Junnejokab yistzil junjun diácono. Watx'okab yak'on cuenta ba eb yul yatut.

¹³ Ta watx' yilon eb diácono tu' yopiso, miman yelapnok eb yul sat yet creyenteal, cax c'am chi xiw eb yaloni tol ayoc Cristo Jesús yin is c'ul.

Ak'bil jojtaknej co cuybanil.

¹⁴ Chin toj ayach tu' yet jayeb c'u.

¹⁵ Palta ta c'uxan chi mayji wapni, yuj tu' chin tz'ibejtok jun in carta ti' ayach, yet watx' chojtaknej elok tzet chi el oten a beybal yul yatut Dios, a ton yiglesia Cham Dios iquis. A yiglesia tu' ay yopiso yoc yipomalok cuybanilej caw yel.

¹⁶ Wal yel, caw miman yelapnok co cuybanil ak'bil jojtaknej el yuj Dios. Chi yal axca ti': Max tx'oxaj ba Dios yin mimanilejal yet anima. Axa Cham Espíritu tx'oxnak elok, tol caw tojol is nabal. Ilbil Cham yuj eb ángel, albil el yabixal bay xolak nación. Ay eb yet yulyibank'inal ti' max yaoc c'ul yin. Yetok c'apaxok max ilay paxaj Cham satcan.