1 Ti 2 - A Txꞌan Biblia Yin Kꞌanjobal 1989

Tzetbil chi yun yoc txaj

¹ A tinani', tix tzet chi babji walontok ayach ti'. Yowalil chon tewi bay Dios, chon txajli yuj masanil anima. Yowalil chi co k'an bay Cham, cax chi jak'on c'apax yuj diosalil yuj eb anima tu'.

² Yowalil chon txajli yuj eb mimek yajaw, c'al yuj eb yajaw masanil, yet watx' chon beytok yin numanil, c'al yin masanc'ulalil. Yuj tu' ok je' jaon wal oc co ba yul k'ab Dios, cax ok je' co beybalnen bayc'al ijanil.

³ Ta axca tu' yayji, watx' yul sat Dios co Colomal, cax caw chi tzaloj Cham yuj.

⁴ Yujtol chi yochej Cham chi colchaj masanil anima, c'al yojtaknen el eb jun cuybej acaw yel.

⁵ Asan jun Dios ay, cax asan c'apax jun yaomal oc co ti' bay, a ton Jesucristo, a ton Cham max oc animail,

⁶ ul yak'nak ba camok, yet watx' chi je' colchaj masanil anima yuj. A yet max jay tiempoal jun ti', max al-lay el yabixal.

⁷ Wal yel chi wala', c'am chin naajok tol max ak'lay wopiso walon el jun abix ti'. Max quin alay oc chekbejok Jesucristo, yuj in cuyon eb man israelok yin cuybej acaw yel, yet watx' chi yaoc eb c'ul yin Cham.

⁸ Yuj tu', chi wochej chi txajli eb winak bay junjun lugar.*fn* A eb chi yiaj k'ab can cax chi txajli, yowalilokab watx' is beybal eb yul sat Dios. C'amokab chichonc'ulal eb. Manokab ak'om owalok eb.

⁹ A eb ix ix, bayc'al ijanokab chi yut pichon ba eb ix, tojolokab chi yut yaon oc eb ix is pichil. Manokab ayxa mayok chi yut eb is xil. Manchak luesnej ba eb yaon oc ch'en oro chi tzekeki yili, c'al ch'en ch'en yelxac'al can is tojol. Manchak luesnej ba eb yetok pichilej yelxac'al can is tojol.

¹⁰ A ti yet eb, aokab watx' beybalej chi tx'oxil eb, a ton beybalej moj chi beybalnej eb ix ix chi oc ayilal bay Dios.

¹¹ Yabokab eb ix ix cuybanil yin ayilal, cax tz'inc'alokab ẍi eb ix.

¹² Ayin chi wala' tol c'am chi je' cuywaj eb ix xol winak. Maj je' tol a eb ix ok ak'on mandar winak. Abxalwokokab eb ix yin tol c'am chi yaltok eb ix yet.

¹³ Yujtol babel watx'nebil Adán yuj Dios. Tzunanilxa watx'nebil Eva.

¹⁴ Manak Adán max ilay aytek sat yuj nak diablo, palta a Eva, xan a ix max ayc'ay yin tenomtakil bay Dios.

¹⁵ Caxc'al chi yab eb ix yailal yalji unin yuj, palta ok colchaj yanimail eb ix, ta chi yaoc eb ix Dios yin c'ul, ta ay is camc'ulal eb ix, ta watx' beybal eb ix yul sat Dios, ta chi yak' cuenta ba eb ix.