1 Jn 3 - A Txꞌan Biblia Yin Kꞌanjobal 1989

Yuninal onxa Dios

¹ Ilab wali, caw wal chon is camc'ulnej co Mam Dios, ilab tol chon yaloc yuninalok. Yel toni, yuninal onxa. A eb yet yulyibank'inal ti', c'am chi nachaj el yuj eb, tatol yuninal onxa Dios, yujtol man yojtakok eb Dios.

² Ex wuẍtak, ex wanab camc'ulnebil wuj, yuninal onxa Dios tinani'. Palta manto txequelok tzetbil ok yun jelocok. Palta jojtak tol a yet ok jay Jesucristo, lajanxa ok jun axca Cham, yujtol ok jiloc tzetbil yili.

³ Co masanil on chi jaoc yipok co c'ul tol axca tu' ok yunej, lanan wal co watx'nen oc co beybal, yet watx' caw wal watx' on axca Jesucristo.

⁴ A mac chi beybalnen yobtakil, man lananok yiken chekbanil Dios. Yujtol a mac c'am chi iken juntzan chekbanil tu', a yobtakil chi el yuneni.

⁵ Jojtakxa, tol yuj yion el Jesucristo co yobtakil, xan max ulic' bay yulyibank'inal ti'. C'am jabok yobtakil yin Cham.

⁶ Yuj tu xin, ta yel wali ayon oc yin Cham, manchakxa co beybalnej yobtakil. Palta tzanc'al mac ac'ala' beybalnen yobtakil xin, c'am chi yaoc nabal yin Cham, cax manto ojtakbilok Cham yuj.

⁷ Ex in camc'ulnebil, manchak e yak' e ba etnelay yuj junok mactxel. Tatol watx'c'al chi jut co beybal, watx' on ton axca Cristo xin, yujtol watx'c'al beybal Cham.

⁸ A mac ac'ala' beybalnen yobtakil, ac'ala' yettoc'alta' nak diablo chi yal tu', yujtol a' chanej el yich yobtakil tu'. Toltax tinani', ac'ala' yunen yobtakil. Yuj tu xan max ulic' Cham C'ajol Dios bay yulyibank'inal ti', yuj ul yak'on lajwok tzet chi el yunen nak diablo tu'.

⁹ Tatol yel yuninal onxa Dios, majxa co beybalnej yobtakil, yujtol a is c'ulbal Cham ayoc jin. A tinani', c'amxa chi je' co beybalnen yobtakil, yujtol yuninal onxa.

¹⁰ Axca ton ti' chi yun txecloj elok, mactak txel eb yuninalxa Dios, mactak txel eb yuninal c'apax nak diablo. Ta man watx'ok co beybal, ta c'am chi co camc'ulnej eb juẍtak eb janab, wal yel mayon yetok Dios chi yal tu'.

Yowalil chi co camc'ulnelej co ba

¹¹ A jun chekbanil ok waltok ayex ti', atax yet max ex oc yetok Dios cax max e chaon el yich e yabeni: Co camc'ulnelejek co ba, ẍi jun chekbanil ti'.

¹² Yuj tu', maj je' caytu' chi jut co ba axca max yut ba Caín. Yet nak diablo nak Caín tu'. Yuj tu' xan max mak' cam nak tu' jun yuẍtak. Yujc'al tol watx' is nabal nak yuẍtak nak tu' xan max mak' camok. Axa nak xin, yob nabal nak.

¹³ Ex wuẍtak, ex wanab, manchak c'ayaj e c'ul yet ok chichon oc c'ul eb yet yulyibank'inal ti' e yin.

¹⁴ A yet yalan ayontoc'al oc yin camich. Axa tinani' xin, jojtakxa, tol mayal ak'lay co k'inal tol ayc'al yin tojbalk'inal, yujtol ayxa co camc'ulal yin eb juẍtak c'al yin eb janab. Ta c'am co camc'ulal yin eb, ac'ala' yet ontoc'al camich chi yal tu'.

¹⁵ Ta cac'al ti' chichon oc co c'ul yin junok juẍtak ma yin junok janab, mak'om cam anima on yul sat Dios. Palta jojtakxa tol c'am junok mak'om cam anima ay is k'inal tol ayc'al yin tojbalk'inal.

¹⁶ Jojtak tzetbil yayji oc is camc'ulal Dios jin, tol max yak' ba Jesucristo cam juj. Yuj tu', yowalil cayokab tu' chi jut co camc'ulnen eb juẍtak, eb janab, jak'okab co ba cam q'uexelok eb.

¹⁷ K'inalok watx' ayon, axa chi jilon junok juẍtak, ma junok janab tol ayoc yin majilal. Ta c'am tzet chi jak' pax bay, c'am jabok co camc'ulal yin Dios chi yal tu'.

¹⁸ Ex in camc'ulnebil, c'am chi je' tol toc'al chi jala' tol aynaj co camc'ulal, palta yowalil chon colwaj bay eb juẍtak c'al bay eb janab. Axca ton ti' ok jut co tx'oxk'abnen elok tol yel chi jala' tol ay co camc'ulal.

C'amxa xiwc'ulal eb creyente satak Dios

¹⁹ Ta ay co camc'ulal, jojtakxa chi yal tu', tol yet onxa jun cuybej caw yel, cax c'amxa co xiwc'ulalil satak Dios,

²⁰ caxc'al chi yal co nabal tol ay co yobtakil. Palta ec'banxa yojtaknen el Dios jintak. Yojtak masanil tzetak yetal.

²¹ Ex wuẍtak, ex wanab camc'ulnebil, ta jojtak tol watx' co beybal yul sat Dios, c'am chon xiw co txajli bay,

²² cax tzanc'al tzet ok co k'an bay, ok yak' ayon, yujtol lanan jiken is chekbanil, cax lanan junen masanil tzet chi cha' c'ul.

²³ Tixton is chekbanil ti', tol chi jaoc co c'ul yin Jesucristo is C'ajol, cax chi co camc'ulnelen co ba, axca max yut yaloncan ayon.

²⁴ Ta chi jikej is chekbanil, tita' wal tol ayon oc yin Cham, cax ayoc Cham jin junjun on. Jojtak tol ayoc Cham jin, yujtol max yak' Cham Espíritu ayon.