Biblia Todo Logo
Bìoball air-loidhne

- Sanasan -

1 Cr 5 - A Txꞌan Biblia Yin Kꞌanjobal 1989


Eb yinatil Rubén

1-3 A Rubén, a ton wal babel c'ajol Israel; palta maj oc babelal yin lista, maj yi' c'apax is satak yet babel winakil; yujc'al tol max mitx'oc yistzil is mam, xan a jun satakej tu' max ec'cantok bay eb is c'ajol José. Is c'ajol c'apax cham Israel José tu'. Palta a yet yintakilxa, a Judá max yi' wal yikbej yiban eb yuẍtak tu'. A yin max eltek jun yajaw, palta is satak yet babel winakil, ac'al bay José aycanok. A eb c'ajol Rubén: a ton Hanoc, Falú, Hezrón, c'al Carmi.

4-6 Axa eb yinatil Joel yin txolilal: a ton Semaías, Gog, Simei, Micaía, Reaía, Baal, Beera. A Beera tu', yajaw yayji xol eb yinatil Rubén, a ton jun tu' max ilaytok yin mosejal yuj Tiglat-pileser, reyal Asiria.

7 A eb yican Beera tu' tol yajaw yayji, atac'ala' max yun tz'ibchaj is bi yichmam eb, a ton Jeiel, Zacarías,

8 c'al Bela, is c'ajol Asaz, is yitxiquin Sema. A Sema tu', a ton is c'ajol Joel. A Bela tu' max cajay ec' bay Aroer, axa is tx'otx'al tu' max apnitac'al oc bay Nebo, c'al bay Baal-meón.

9 Axa bay yichcan xin, a tu' max ayji ec' bay tz'inan tx'otx', max apnitac'al oc bay a' Éufrates, yujtol caw wal max aj can is joboj bay yul yet Galaad.

10 A yet ayoc Saúl yin reyal, a eb yet Rubén tu', max yak' eb owal yetok eb agarenos, max ayc'ay eb agareno tu' yuj eb, axa cajay ec' eb bay is conobal eb bay yichcanil yet Galaad tu'.


Eb yinatil Gad

11 Eb yinatil Gad, max cajay ec' eb bay satak eb yet Rubén, bay yul makbej Basán, masantac'al bay conob Salca.

12 Babel yajaw yayji Joel bay Basán tu'. Axa yintak Joel tu', max jayoc Safán. Lajwi tu' max jay Jaanai, c'al Safat.

13 Axa juntzanxa eb yican eb, yajaw c'apax yayji eb: a ton Micael Mesulam, Seba, Jorai, Jacán, Zía c'al Heber, ukwan eb yin masanil.

14 A ton eb ti' c'ajol Abihail. A listail eb yichmam Abihail yin txolilal: a ton Huri, Jaroa, Galaad, Micael, Jesisai, Jahdo c'al Buz.

15 Axa Ahí, is c'ajol Adiel is yitxiquin Guni, a ton yajaw yayji xol is yinatil eb.

16 Masanil juntzan eb tu', max cajay ec' eb bay Galaad, c'al bay Basán, c'al bay is yaldeail, yetokc'al masanil bay watx' chi low no no' bay Sarón, masantac'al bay is mojon eb.

17 Masanil juntzan eb tu' max tz'ibchaj eb yetok is yinatil yet wal ayoc Jotam yin reyal bay Judá, axa Jeroboam rey yayji bay Israel.


Is yabixal nan yox tribu

18 A xol eb yinatil Rubén, yetok eb yet Gad, c'al yetok nan yet Manasés, ay wal 44,760 eb soldado ibil oc makbal julbalej, espada, c'al julbalej yuj eb. Caw wal cuywinak eb yin ak'oj owal.

19 Cax max yak'on eb owal yetok eb agareno, a ton eb yinatil Jetur, Nafis c'al Nodab.

20 Max oc Dios yetok eb, xan max ayc'ay eb agareno yetokc'al eb ayoc yetok eb yul k'ab eb, yujtol a yet lanan yoc owal tu' max k'anon eb colwal Dios yetok. Max colwaj Dios yetok eb, yujtol max yawal oc eb c'ul yin Cham.

21 Lajwi tu xin, max yiontok eb jantak is jobbejal no' eb ajc'ul tu', tol ay 50,000 no camello, 250,000 no calnel, c'al 2,000 no burro; ay c'apax 100,000 anima max yitok eb preso.

22 Caw wal miman eb ajc'ul tu' max cami, yujtol a jun owal tu' a Dios ay yet. Caytu' max yun cancan cajan eb bay juntzan lugar tu', masantac'al yet max ilaytok eb bay Asiria.

23 Axa eb nan is tribual Manasés tu', yujtol caw wal xiwil eb, max ayji ec' eb bay tx'otx' chi tojtac'al bay Basán masantac'al chi apni oc bay Baal-hermón, ac'al oc chi yik c'apax Senir c'al Witz Hermón.

24 A eb yajaw yayji xol eb: a ton Efer, Isi, Eliel, Azriel, Jeremías, Hodavías, c'al Jahdiel; masanil juntzan tu' soldado wal tol caw jelan, binajbil eb, yajaw yayji eb xol is yican.

25 Palta caw wal max oc is tenomtakil eb bay is Diosal; ac'al ton a' Diosal yichmam eb, caw wal man watx'ok max yut ba eb, max oc eb ayilal bay juntzan diosal eb conob max ak'lay lajwok ay yuj Dios satak eb.

26 Yuj wal tu' xan max cheklay cham Pul, a ton Tiglat-pileser, reyal Asiria yuj Dios yin yiontok eb rubenita, eb gadita, c'al yetok nan is tribual Manasés yin presoal bay conob Halah, Habor, Hara, c'al bay tilak a' aej Gozán. A bay tu' ayic' eb tinani'.

Kanjobal (Q’anjob’al) © Sociedad Bíblica de Guatemala 1989

Bible Society in Guatemala
Lean sinn:



Sanasan