1 Cr 23 - A Txꞌan Biblia Yin Kꞌanjobal 1989

Yopiso eb levita

¹ A yet caw wal icham winakxa cham rey David, max yaoncan oc yikbej Salomón is c'ajol yin reyal yiban conob Israel.

² Caytu' max yun wajban oc masanil eb yajaw yayji xol conob, yetok eb sacerdote c'al eb levita.

³ Max bislay jantak eb levita tol 30 abil is k'inal, chi beyc'altok satak. A yet max yion eb cuenta yin eb tu', max eloc yin 38,000 eb winak.

⁴ A xol eb max al-lay oc jun 24,000 eb yin yikban eb mulnaj yin watx'nej templo; axa junxa 6,000 eb xin, ayoc eb yin juezal c'al yilomalok conob Israel.

⁵ Caneb mil max oc yin taynej puerta, c'al canebxa mil max oc yin aloj watx' k'anej bay Jehová, yetok jantak mitx'k'abej yin música, a ton juntzan mitx'k'abej tu' max chek cham rey David watx'nelay yuj yoc yin yopiso bay tu'.

⁶ Max pojic' cham eb levita yin makquiltakil, atac'ala' eb ichmamej ti': a ton Gersón, Coat c'al Merari.

⁷ A eb c'ajol Gersón: a ton Laadán c'al Simei.

⁸ Eb c'ajol Laadán oxwan bey eb tu': a ton Jehiel, jun babel, axa eb tzunan, a ton Zetam c'al Joel.

⁹ Eb is c'ajol Simei, a eb tu' oxwan c'apax bey eb: Selomit, Hasiel, c'al Harán. A ton juntzan ti' yajaw yayji yin yinatil Laadán.

¹⁰ Axa eb is c'ajol Simei, a eb tu' canwan bey eb: a ton Jahat, Ziza, Jeús, c'al Bería.

¹¹ A jun babel, a ton Jahat, jun yet is cab, a ton Ziza. A pax Jeús c'al Bería man wal xiwilok is yinatil eb yet chi tzakay eb yilon yopiso, xan junnej makan max yun eb.

¹² Axa eb is c'ajol Coat, canwan bey eb tu': a ton Amram, Izhar, Hebrón, c'al Uziel.

¹³ Eb c'ajol Amram, a ton Aarón c'al Moisés. Max sic'lay el cham Aarón yetok yinatil yuj Dios yin tojbalk'inal, yin yilon eb juntzan tzet yetal tol yet Jehová yayji ocok, yin yak'on tz'a eb incienso, yin yikban eb ayilal, c'al yin yalon watx' k'anej yiban eb anima yin bi Jehová.

¹⁴ A pax eb yinatil Moisés is chekbej Dios xin, max oc eb tz'akilok tribual Leví.

¹⁵ A eb c'ajol Moisés, a ton Gersón c'al Eliezer.

¹⁶ A xol eb yinatil Gersón aj babel yayji Sebuel.

¹⁷ Axa xol eb yinatil Eliezer, aj babel yayji Rehabías, asan jun is c'ajol Eliezer tu'; axa pax Rehabías tu', xiwil is c'ajol.

¹⁸ A is babel c'ajol Izhar is c'ajol Leví, a ton Selomit.

¹⁹ A eb c'ajol Hebrón: a ton Jeraías babel, Amarías yet is cab, Jahaziel yet is yox, c'al Jecamán yet is can.

²⁰ Axa eb c'ajol Uziel: a ton Micaías babel, c'al Isías yet is cab.

²¹ A eb is c'ajol Merari, a ton Mahli c'al Musi. Eb is c'ajol Mahli, a ton Eleazar c'al Cis.

²² A Eleazar tu' c'amc'al junok is c'ajol, asan is cutz'in ay, a ton eb ix tu' max nupay yetok yican, a ton yetok eb c'ajol Cis.

²³ A pax eb c'ajol Musi, oxwan bey eb: a ton Mahli, Edar c'al Jeremot.

²⁴ A ton juntzan eb tu' yinatil Leví, atac'ala' is makquiltakil max yun tz'ibelayi masanil eb 20 abil is k'inal, cax chi beyc'altok, a ton juntzan eb tu' ayoc yopiso bay templo.

²⁵ Yujtol max yal cham rey David: Mayal yak' Jehová co Diosal xewilal ayon is conob on ti', a' c'apax max satnen jun lugar bay ok ayjok ec' bay Jerusalén.

²⁶ Yuj tu' xan a eb levita majxac'al iklay ec' is mantiado cham yuj eb, c'al yetok jantak mitx'k'abil yet chi oc ayilal, ẍi.

²⁷ Cayton tu' max yun axca tzet max yal cham rey David yinxa lajubal, xan max ilay aj is bisil eb yinatil Leví; yin 20 abil k'inal cax chi beyc'altok.

²⁸ A eb tu' max can yul k'ab eb cham sacerdote, a ton eb yinatil Aarón, yin yoc eb yin opiso bay templo Jehová, c'al yilon eb yamak'il, c'al yulak cuarto; c'al yilon eb sakbanelay masanil mitx'k'abej tol asan Jehová ay yet. Chi yilon c'apax eb juntzanxa mulnajil bay templo tu'.

²⁹ A eb chi watx'nen ixim pan chi oc satak Jehová, c'al yilon eb ixim harina chi ak'lay yin ofrendail, c'al ixim c'oxox pan c'am yich, yetokc'al juntzan ofrenda tol chi watx'nelay yul ẍaltin, c'al ixim harina sombil yetok aceite, chi yilon c'apax eb echbalej chi k'anabax yin ofrenda.

³⁰ Yetok c'apaxok, yowalil tol ayc'al ec' eb bay templo, yuj yalon eb yuj diosal, c'al aloj watx' k'anej bay Jehová yet junjun k'inibalil, c'al yayc'ualil,

³¹ yet chi ak'lay tz'a xajanbal bay Jehová yet c'ual xewilal, yetok yet c'ual k'in yet unin xajaw, c'al yetok juntzanxa k'in puch miman yelapnok. Chi ak'wic'al serbil bay Jehová atac'ala' bisil eb, c'al mulnajil ak'bil yun eb.

³² A eb chi taynen c'apax mantiado bay chi co chalej co ba yetok Dios, c'al is cajlobal Cham; c'al mulnaj eb bay templo atac'ala' tzet chi yal eb yican yin is tribual, a ton eb sacerdote yinatil Aarón.