1 Cr 22 - A Txꞌan Biblia Yin Kꞌanjobal 1989

¹ Yuj tu' xan max yal cham rey David axca ti': A cayti' ok ayjok is templo Jehová Dios, yetok jun altar bay chi jak' tz'a co xajanbal ayon israel on ti', ẍi cham.

Wajbanil tzet yetal yuj watx'jubal templo

² Lajwi tu' max chekon cham rey David wajbalay oc masanil eb tx'ok conobal cajan ec' bay xol eb israel; max sic'lay el eb josom ch'en, a ton ch'en ok oc yin watx'jubal templo Dios.

³ Max wajban c'apax xiwil ch'en hierro yet chi oc ch'en yin lawuẍal chi k'anlay yin puerta, yetok c'apax jun miman bulan ch'en bronce c'amxa chi echchaji,

⁴ yetok c'apax te c'ute' c'amxa chi nachaj jantak is bisil te' max wajlayi, yujtol a eb cajyom bay Sidón c'al eb cajan bay Tiro caw wal miman te c'ute' tu' max yitek eb.

⁵ Yujtol max na cham rey David: A nak in c'ajol Salomón uninto nak. A pax jun templo Jehová ok watx'jok tu', tol miman ok yunej, yelxac'al ok binaj yuj watx'il yili bay masanil yulyibank'inal ti'. Yuj tu' xan yowalil ok in wajcan masanil tzet yetal ok oc yin, ẍi cham. Yuj tu' xan xiwil tzet yetal max wajcanok yet c'amto chi cami.

⁶ Max lajwi tu', max yawtentek David Salomón is c'ajol, max yalon bay tol a' ok watx'nen aj jun templo yet Jehová, is Diosal conob Israel.

⁷ Max yalon bay axca ti': Ach in c'ajol, ay wal oc yin in nabal tol ok in watx'nej aj junok templo Jehová co Diosal.

⁸ Palta max yal Jehová ayin: Max wila' tol xiwil chic' max a pulcantok yuj xiwil owal max onej. Yuj tu' xan manak ach ok a watx'nej aj jun in templo tu'.

^9-10 Palta ay jun a c'ajol tol c'am owal ok yunej. Ayin ok wak' yun masanil eb ajc'ul, tol ok cancan eb yin junc'ulalil yetok. Yuj tu' xan, ok yik Salomón.*fn* A yul is tiempoal ok wak' junc'ulal, c'al tzalojc'ulal bay in conob Israel. A' ok watx'nen aj jun in templo tu'. Axca wal in c'ajol ok yunej; ayinxa axca wal is mam ok wunej, cax ok wak'on ayjok ec' is yikbej bay Israel yin tojbalk'inal, ẍi Jehová ayin.

¹¹ Xan a tinani' ach in c'ajol, a Jehová co Diosal ok occ'al etok yet ok a watx'nen aj jun templo tu', axca max yun yak'on is ti' tol ach ok a watx'nej.

¹² Aokab Jehová ok ak'on a jelanil c'al a nabal, yet watx' a yet ok yak'on Cham ekbej bay yiban co conob Israel ti', ok ekej masanil is chekbanil Cham.

¹³ Axca tu xin, watx'c'al ok yun elocok, tatol ok ekej masanil is ley Jehová, c'al masanil tzet yetal max yal bay cham Moisés yin co conob Israel ti'. Ak' ep, tec'anc'al chot a ba. C'amc'al chi cabax aj a c'ul, tamwal a xiwajok.

¹⁴ Ilab ayin ti', max wak' wal wip in wajon 80,000 quintal ch'en oro yuj watx'jubal templo Jehová tu', yetok 800,000 quintal ch'en plata, yetok jun miman bulan ch'en bronce, c'al ch'en hierro tol c'amxa chi je' yechelayi. Cax max in wajon c'apax xiwil te te', c'al ch'en ch'en. Oktoc'al a waj is tz'akil c'apax ach ti'.

^15-16 Xiwilxa mulnajwom ayic' yul a k'ab ok mulnaj etok, eb josom ch'en, eb albañil, c'al eb josom te'. C'amxa chi bischaj jantak winak tol caw wal jelan yin tzanc'al tzet mulnajilal, axca yin oro, yin plata, yin bronce c'al yin hierro. Yuj tu xin, ocokab mulnajil, colwajokab Jehová etok, ẍi cham rey David bay Salomón.

¹⁷ Max lajwi tu' max yalon cham bay masanil eb ayoc yin yajawilal, tol chi colwaj eb yetok Salomón is c'ajol cham tu' yin mulnajil; max yalon bay eb axca ti':

¹⁸ A Jehová co Diosal ayoc e yetok c'apax ayex ti'. A' max ak'onc'al junc'ulal ayon bay masanil co makbej, yujtol a Cham max aon oc yalan wikbej masanil juntzan nación ti', xan max occan eb yul k'ab Jehová, c'al yul co k'ab ayon is conob on ti'.

¹⁹ Yuj tu' xan aek wal oc yin e c'ul e yaon oc e ba yul k'ab Jehová co Diosal. Yelc'ulal che watx'nej aj jun lugar tol yet Cham yayji ocok, yet watx' ok octok te caẍail trato Jehová co Diosal tu' yul, c'al yetok masanil is mitx'k'abil jun templo tu', tol yet Jehová yayji jun templo ok watx'jok aj tu', ẍi cham rey David.