1 Cr 21 - A Txꞌan Biblia Yin Kꞌanjobal 1989

Yinak aj bisil eb conob

¹ A Satanás max oc ajc'ulal yin eb israel. A' max iptzen cham rey David yin yion aj bisil eb is soldado.

² Yuj tu xin, max yalon cham David bay cham Joab, yetokc'al eb yajawil soldado axca ti': —Asek, cax che yion aj bisil eb soldado. Chi toj e chatek bay conob Beerseba, masantac'al chex apni oc bay conob Dan. Yet chi lajwi tu xin, cax che yiontek bisil ayin, yet watx' chi wila' jantak eb yin masanil.

³ Palta max tak'wi cham Joab axca ti': —Aokab Jehová chi ion aj can bisil is conob yin tol c'amxa chi bischaji. Yul a k'ab ayoc eb masanil, ¿tzet yuj xan chi yochej a c'ul jun ti' mamin rey? A yin jun ti' ok oc mul co conob ti' oj, ẍi.

⁴ Palta majxa cha yab cham rey tu' tzet max yal Joab, xan max toj xin, max bet tz'iben aj bisil masanil eb soldado Israel, cax max meltzoj bay Jerusalén.

⁵ Max yak'on Joab bisil masanil eb soldado ay yul nación tu', axa max yun xin, a bay yul makbej Israel ay jun millón yetok cien mil winak tol tiempoal toj yin owal, ay c'apax 470,000 eb bay Judá.

⁶ Palta majtoc'al oc eb winak yet is tribual Leví, c'al eb yet Benjamín bisilok, yujtol a Joab maj cha c'ul jun chekbanil cham rey tu'.

⁷ Caw wal yob c'apax max yab Dios masanil juntzan tu', xan max yatek jun yailal yiban conob Israel.

⁸ Yuj tu' max yal cham rey David is mul bay Dios: —Caw wal miman in mul max oqui, yujtol max wun jun ti'. Palta chin k'an ayach tol chak' tanil jun in mul ti', yujtol axca junok c'am nabal max wut in ba, ẍi cham.

⁹ Yuj tu' max yal Jehová bay Gad, a ton jun is chekbej, tol chi aon oc nabal cham David:

¹⁰ Asi', il David, cax chalon bay tzet yetal chi wal ti': Ayokab tzet yetal ok je' wuneni; axa ok sic'on tzet yetal ok wunej, ẍi Jehová.

¹¹ Xan max toj Gad tu' yilon cham rey David, max yalon bay: —A wal juntzan ti' max yal Jehová: Sic' xol juntzan yailal ti':

¹² Oxeb abil wajil, oxeb xajaw ok ex mak'lay cam yin owal yuj eb ajc'ul, ma a oxeb c'ual ilya' ok yak' yul nación ti', a ton is yespada Jehová tu'; yujtol a jun yángel Jehová, a' ok ion jay jun yailal tu' bay masanil yul co makbej ayon israel on ti'. Sic' tinani' yet watx' ok je' walon bay Cham max in chekontek, ẍi cham Gad bay David.

¹³ Max yalon cham rey David bay Gad: —Caw wal owxac'al in michchaj chi wabej. Yelxac'al mi watx' tol a Jehová chi ayc'ay k'ab wiban, manak anima chi low k'ab win, yujtol wojtak tol miman is yabenc'ulal Cham, ẍi David.

¹⁴ Max yatek Jehová jun ilya' yiban conob Israel, xan max cam 70,000 eb israel tu'.

¹⁵ Max chekontek Jehová jun yángel yet chi yak' lajwok Jerusalén. A yet lanan yak'on lajwok tu', max cusaj c'ul Jehová yuj jun yailal tu', axa yalon bay jun yángel lanan yak'on cam anima tu' axca ti': K'okbilxa, beka', ẍi Cham bay. A wal yet jun bek tu', a jun yángel Jehová, ay wal ec' bay lanan tec'wi trigo cham Ornán jebuseo.

¹⁶ A yet max aj t'anan cham rey David, max yiloni tol ayic' jun yángel tu' nan xol satcan yetok tx'otx' tx'otx' ti', yetok jun espada mitx'bil aj yuj, lanan yetc'ulnentok yespada tu' yin Jerusalén. A yet tu' max ay nojan cham rey David yetok eb yicham winakil conob Israel masantac'al bay sat tx'otx', ayoc el pichilej yuj eb.

¹⁷ Max yalon cham rey David bay Dios axca ti': —Mamin, ayin max wala' tol max ilay aj is bisil eb conob. Ayin wal max oc in mul. ¿Tok ay tzet max yun juntzan anima c'am is mul ti'? Mamin Jehová, ach in Diosal, chin tewi ayach, tol a jun yailal ti', ayokab c'ay wiban yetok winatil, xan c'amokab chak' lajwok jun a conob ti', ẍi cham.

Altar bay tec'bal trigo

¹⁸ Xan max yal cham yángel Jehová tu' bay Gad, tol chi yal bay cham rey David, tol chi watx'nej aj jun altar bay jun lugar bay chi tec'wi trigo cham Ornán jebuseo.

¹⁹ Yuj tu xin, max toj cham rey watx'nen aj jun altar tu' bay satak Jehová, axca max yun yal-lay tu'.

²⁰ A cham Ornán, yetok canwan is c'ajol lanan tec'wi trigo yet max yilon eb tol ayic' cham ángel bay tu', axa eb is c'ajol cham Ornán tu' max toj eb c'ubaj el ba.

²¹ A yet max yilon cham Ornán tu' tol lanan yapni cham rey bay is cawilal, max eltek bay chi tec'wi trigo tu', max ay nojan satak cham rey.

²² Yuj tu xin, max yalon cham rey bay cham Ornán: —Matawal chi el yin a c'ul, chak' jun lugar bay chach tec'wi trigo ti' ayin, yet chin watx'nej aj junok altar bay Jehová, yet watx' chi el jun ilya ti' xol conob. Txon ayin axca wal jantak is tojol, ẍi cham rey.

²³ Max tak'wi cham Ornán tu' bay: —Mamin rey, chi je' wak'on ayach jun lugar ti' cax cha watx'nen tzet chi yochej a c'ul, cax chi wak'on c'apax no toro, yet chi oc no' yin xajanbalil, c'al te tec'bal ti', chi je' yoc yin sial, axa ixim trigo chi je' yoc yin ofrendail. Masanil juntzan tu' chi wak' ayach mamin rey, ẍi.

²⁴ Palta max tak'wi cham rey David axca ti': —Yuj wal dios ayach yuj masanil juntzan ti', palta ayin ti' yowalil tol chin man masanil juntzan ti' axca wal is tojol, yujtol maj je' wion ec' tzet yetal tol et cax ok wak'on yin xajanbalil bay Jehová. Maj je' wak'on junok tzet yetal tol man ok wab yail in manoni, ẍi cham.

²⁵ Caytu' max yun manon cham rey David jun tx'otx' tu' yin 600 siclos ch'en oro.

²⁶ A bay tu' max watx'nej aj cham jun altar, max yak'on tz'a xajanbal, c'al xajanbal yet junc'ulalil. Max lajwi tu', max txajli bay Jehová; axa Cham max tak'wi yin yaontek k'ak'ej bay satcan yiban jun xajanbal ay yiban altar tu'.

²⁷ Yuj tu xin, max yal Jehová bay jun ángel tu', tol chi c'ubaj aj is yespada yul is tz'umal.

Jun lugar yet templo

²⁸ Atax yet max yilon cham rey David tol max tak'wi Jehová bay, bay ay tec'bal trigo cham Ornán jebuseo, max yak' xajanbal bay tu'.

²⁹ Caxc'al mi a jun mantiado max watx'nej aj cham Moisés bay Jehová bay takin tx'otx', c'al jun altar bay chi tz'a xajanbal tu', ata tu' ay bay jun lugar yet ayilal can ay ajok bay Gabaón,

³⁰ palta maj je' toj cham rey David bay tu' yet chi toj k'anlej bay Dios, yujtol caw wal max xiwaj c'ul yet max yilon jun espada ibil oc yuj cham yángel Jehová.