1 Cr 17 - A Txꞌan Biblia Yin Kꞌanjobal 1989

Trato Dios yetok cham rey David

¹ A yet mayal octok cham rey David bay yul is despacho, max yalon bay Natán, is chekbej Dios: —Ilabi, tol ayin octek yul jun despacho tol naba c'ute' ayoc yin, yak'ban a is caẍail trato Jehová, a yul jun mantiado ayoctok, ẍi cham.

² Axa tak'wi Natán tu' bay: —Chi je' a watx'nen masanil tzet chi yochej a c'ul yujtol ayoc Dios etok, ẍi.

³ Palta a yet jun ak'bal tu' max k'anjab Dios bay Natán, max yalon bay:

⁴ Asi', cax chalon bay David in chekbej, tol ayin Jehová in chi wala': Manak ach ok a watx'nej aj junok templo bay ok in cajayok.

⁵ Yettaxc'al max ex wion eltek bay Egipto, c'amc'al bay max in cajay yul junok templo, yujtol asanc'al yulak mantiado chin ayji bay juntzan lugarlak.

⁶ Masanilc'al bay max in ec'c'al e yetok, c'amc'al bay max in k'an junok templo bay junok eb max ex ikbani, a ton eb max waoc yin e yajawilalok. Maj in k'an bay eb, tol chi watx'nej eb junok templo naba c'ute' bay chin cajayi.

⁷ Ayin max ach wiel yintak no calnel yet watx' chach oc yajawilalok in conob Israel.

⁸ Max in occ'al etok bayc'al max ach ec'jabi, max wak' c'ayil masanil eb ajc'ul max jayoc a satak, max wak'on a mimanbilal, axca yet juntzanxa eb yajaw tol mimanbil bay yulyibank'inal ti'.

⁹ Yetok c'apaxok, mayal in watx'nej bay ok ayjok in conob Israel. A bay tu' ok wak' ayjok ec' eb yin junelnej bay c'amxa mac ok tenon eb, c'al yetnelay eb, axca wal max yun eb yet babelal,

¹⁰ yet max waon oc eb max oc yajawilal xol in conob. Ayin ok wiay masanil eb ajc'ul; cax chi wak'onc'al ojtaknej elok tol ok wak'c'al ikbej bay eb enatil.

¹¹ A yet ok lajwok apnok a k'inal, cax ok ach camok; ayin ok waoc junok a c'ajol yin reyal a q'uexelok, cax ok wak'onc'al yi yip is yikbej.

¹² A jun tu' ok watx'nen aj junok in templo ayin ok wak' ayjok eb yinatil bay yul is trono yin junelnej.

¹³ Ayin ok wut wal axca chi yun junok mamej yetok is c'ajol. Man ok wiel in camc'ulal yin; man axcaok max wun yetok Saúl, jun max wiel a satak.

¹⁴ Ok wak'c'al yikbej a c'ajol tu' bay in conob. A yikbej tu' ok beyc'altok yin yinatil yin tojbalk'inal ẍi Jehová, cachi bay, ẍi Cham bay Natán.

¹⁵ Xan max yal cham Natán masanil juntzan ti' bay cham rey David, axca wal max yun yiloni c'al yabeni.

¹⁶ Xan max octok cham rey k'anjab satak Jehová, max yaloni: Mamin Jehová in Diosal, ¿tzet welapnok ayin ti', c'al tzet wal yelapnok in mam c'al eb wichmam, xan miman a watx'c'ulal chak' ayin?

¹⁷ Palta cochwal txennej jun ti' yul a sat Mamin; ilabi, lananxa ak'on a ti' ayin yin winatil yet yajtok tu'. Lajanxac'al chin ot wal axca juntzan mimek winak bay sat tx'otx' ti'.

¹⁸ ¿Tzetto wal chi je' walon ayach yuj wikbej chak'a'? Ach ti' Mamin Jehová, ojtak wal tzet wayji.

¹⁹ Mamin Jehová, masanil juntzan ikbej tol c'ayubtakxac'al yoc ti' max ak' ayin, ayin a chekbej in ti', atac'ala' bay chi el yin a c'ul, c'al ak'on wojtaknen elok.

²⁰ Mamin, tokwal ay junokxa lajan etok; tamwal ay junok dios tol chi lajlej ba etok, atac'ala' tzet max yun jaben ayon ti'.

²¹ A pax ayon a conob Israel on ti', tok ay junokxa lajan jetok on, bay sat tx'otx' ti'. Ilab Mamin, ach max on a colo', yet chon occan a conobok, yelxac'al miman max yun a binaj juj, yujtol max on tzet yetal c'ayubtakxac'al yoqui. Ach max ecan el juntzanxa nacionlak bay satak jun a conob max a colcan eltek bay Egipto.

²² Yujtol ach max acan oc a conob Israel on ti' a conobok yin junelnej. Ach ti' Mamin Jehová, ach ton co Diosal ach.

²³ Yuj tu' Mamin, yunokab bay max ak' a ti' ayin, c'al yin winatil. Yunokab tzet yetal max al xin,

²⁴ yet watx' chach ilay can, cax ok al-layok tol ach Mamin Jehová, Yajaw ach yin Masanil, co Diosal ach c'apax ayon israel on ti'. Axca tu', caw wal junelnej ok ayjok ec' winatil yin yikbej a satak.

²⁵ Ach in Diosal, max ak' wojtaknej elok, tol ok ayjokc'al ec' winatil yin yikbej. Yuj tu xin Mamin, caxc'al a chekbej in, palta chin tec'baj in ba in txajli ayach.

²⁶ Ach ti' Mamin Jehová, Dios ach toni, max ak' a ti' onen jun miman watx'c'ulal ti' ayin.

²⁷ A wal tinani' xin, chi el wal yin a c'ul ak'on a watx'c'ulal bay winatil, ayin a chekbej in ti', yet watx' chi ayjic'al ec' eb a satak. Ach ok ak' a watx'c'ulal yin eb, xan ok chac'al eb a watx'c'ulal yin tojbalk'inal, ẍi cham rey David.