1 Co 11 - A Txꞌan Biblia Yin Kꞌanjobal 1989

¹ Yuj tu', beybalnejek in beybal, axca chi wut c'apax in beybalnen beybal Cristo.

A tzet chi yut eb ix ix is beybal bay culto

² Ex wuẍtak, ex wanab, chex wal watx'il, yujtol naan inc'al e yuj masanil tiempo, c'al yuj lanan e beybalnen juntzan cuybej walnakcan ayex.

³ Palta chi wochej che yojtaknej elok, tol a Cristo ayoc is yajawilok junjun winak, axca tol is jolom yayji ocok. Axa nak yichamil ix ix, a nak ayoc is yajawilok ix, axca Dios, yajawil Cristo yayji.

⁴ Tzanc'al mac winakil ayaj k'oxil yet chi txajli, ma yet chi yalon el k'anej Dios, ac'al oc chi yak' q'uixwan ba.*fn*

⁵ Ac'ala' c'apax eb ix ix tol c'am aj k'oxil yet chi txajli ma yet chi yalon el k'anej Dios, chi yak' q'uixwan eb jolom, axca tol tzukbil el jolom eb tu'.

⁶ Ta ay eb c'am chi yal c'ul chi yaj k'oxil, tzukokab el eb jolom tu xin. Ta chi q'uixwi eb tzukon el jolom, yaokab aj eb is k'oxil.

⁷ A ayon winak on ti', man mojok chi jaaj co k'oxil, yujtol axca tol yechel Dios jayji, tx'oxomal el is mimanbilal Cham jayji. Axa eb ix ix, tx'oxomalok el is mimanbilal nak winak yayji eb ix.

⁸ Yujtol a yet max watx'nen Dios nak babel winak, man yinok ix ix elnaktek nak winak tu'. A ix ix tu' a yin nak winak tu' elnaktek ix.

⁹ A ix ix tu', watx'nebil ix yuj yoc ix yetbiok nak winak. Man yujok watx'ilok ix, xan max watx'ji nak winak tu'.

¹⁰ Yuj tu' xan moj yaon aj eb ix k'oxil is jolom, yuj tx'oxk'abnen el eb ix, tol ayoc eb ix yalan yikbej yichamil. Moj axca tu' chi yut ba eb ix, yuj t'anan c'apax oc eb ángel jin.

¹¹ Palta chi yochej Cham Jajawil tol ayokab yelapnok eb ix yul co sat ayon winak on ti', cax chi yochen c'apaxok tol ayokab jelapnok yul sat eb ix c'apaxok.

¹² Yel toni, a yin nak babel winak tu' elnaktek ix babel ix, palta a tinani', a yin eb ix ix chon pitzc'oj elok. Palta masanil, ac'al ton Dios max naoni.

¹³ Beyc'ulnejek el sic'libil ayex caw, ¿moj mi chi txajli junok ix bay Dios, ta c'am tzet ayaj yin is jolom?

¹⁴ Jojtak co masanil tol q'uixwil, ta jokan xil co jolom axca xil jolom eb ix.

¹⁵ Watx' yili eb ix ix, yujtol jokan tel xil jolom eb. A xil jolom eb ix tu' ayoc is k'oxilok.

¹⁶ Ta ayex chi tit e yowal yuj juntzan cuybanilej ti', yowalil chi nachaj el e yuj, tol ayon ti', c'am chi co cha' junokxa tx'ok beybalej. Ac'ala' c'apax eb creyente bay junjun yiglesia Dios, c'am chi cha eb junokxa tx'ok beybalej.

Eb man watx'ok chi yut ba yet chi oc Santa Cena

¹⁷ Ay juntzanxa tzet ok waltok ayex. Palta majto je' ex walon watx'il, yujtol ayex aytoc'al e paltail. Yujtol a yet che wajban e ba bay tu', c'am jabok watx'ilal che cha', toc'al chex etaxcan el yuj.

¹⁸ Yuj tu' xan a jun ti' ok babjok walontok ayex. Chi wabej tol a ab yet che wajban e ba yin e culto, ay ab pojlejbail e xol. A chi wut in naoni, tekan yel juntzan chi wab tu'.

¹⁹ (¡Tekan yowalil ok ex pojchajc'alta'a, yet watx' chi txecloj elok, mac caw yel creyente!)

²⁰ Yuj tu', a yet che wajban e ba, manak cena Cham Jajawil jun che lo' tu'.*fn*

²¹ Yujtol a yet chi oc yorail cena tu', comonxac'al che lo' e yet junjun ex yin ayman. Yuj tu', ay ex c'amxa che yi' e yet, cax chi tit e wajil. Ay ex xin, chex uc'wixac'al aj an yuj.

²² ¿Tom c'am e yatut bay watx' chex low junjun ex? A yet che yunen axca tu', a eb e yet creyenteal che yintaknej elok, palta yiglesia Dios yayji eb e yetok. A eb caytu' chi yut axca tu', c'am tzet chi lo' eb e yetok. Yuj tu', q'uixwil eb che yielok. ¿Xin ta chi je' ex walon watx'il yuj jun e beybal tu' che na'? Caw wal maj je' bian.

Is Cena Cham Jajawil

²³ A juntzan cuybanil yuj tzet chi yun chalay cena walnakcan ayex, a Cham Jajawil ak'nejcan ayin. A ton juntzan ok waltok ayex ti'. A yet jun ak'bal yet max alay oc Cham Jajawil Jesús yul k'ab eb t'inanta' yak'on camok, a yet manto michchajok, max yion aj jun ixim pan.

²⁴ Axa yet max lajwi yalon yuj diosalil bay Dios, max bijon ay ixim pan tu'. Axa yalon bay eb is cuywom axca ti': A jun ti', a ton in mimanil ok ak'lay e yuj. Loek ixim xin, yuj in e naontek, ẍi.

²⁵ Ac'ala' caytu' max yut yion c'apax aj jun vaso, yet max lajwi low eb. Max yalon c'apax bay eb axca ti': A tzet ayay yul jun vaso ti' tx'oxbanil jun is cab trato Dios.*fn* Yuj in chiq'uil xan ok yun jun is trato ti'. A yet che yuq'uen jun ti' junjuntak el, naek intek, ẍi Jesucristo bay eb.

²⁶ Yujtol junjun el chi co lo jun pan ti', c'al juc'balnen jun vaso ti', a camichal Cham Jajawil chi co tx'oxk'abnej elok, masantac'al chi yal jay Cham.

A tzet yowalil chi jun yet c'amto chi co lo' Cena

²⁷ Yuj tu', ta ay mac man watx'ok chi yut loon jun pan Cham Jajawil ti', c'al yuc'balnen jun vaso Cham ti', chi oc is mul yin mimanil Cham Jajawil, c'al yin is chiq'uil Cham.

²⁸ Yuj tu xin, a yet c'amto chi co lo' ixim pan tu', c'al yet c'amto chi juc'balnej jun vaso tu', yowalil chi co beyc'ulnej co ba junjun on yul jet.

²⁹ Yujtol a yet chi co looni c'al juq'uen jun ti', ta c'am chi cam co naon is mimanil Cham Jajawil, chi jitek yailal jiban.

³⁰ Yuj juntzan ti', xan xiwil eb ya'ay e xol, c'al mac tz'ontak, cax xiwil mac chi cami.

³¹ Palta ta chi co beyc'ulnej co ba junjun on, c'amxa chon beyc'ulnelay yuj Cham Jajawil.

³² A yet chon beyc'ulnen Cham Jajawil, chi yaoc Cham co yailal, yet watx' manxa ok on tokcan bay jun miman yailal yetok eb yet yulyibank'inal ti'.

³³ Yuj tu' ex wuẍtak, ex wanab, a yet che wajban oc e ba e loon Cena tu', che yechbanelej e ba, yet watx' junnejc'al e loon e masanil.

³⁴ Ta ayex ay e wajil, lowanekcan bay e yatut, yet watx' c'am chi jay yailal e yiban yuj Dios, yujc'al tzet che yut e ba bay e wajanil tu'. Axa juntzanxa tzet tol man watx'ok bey e xol xin, okxa in watx'nej oc yet ok ex tok wiloni.