Babel Libroal Cham Samuel 25 - A Txꞌan Biblia Yin Kꞌanjobal 1989

Camichal cham Samuel

¹ Max cam cham Samuel cax max wajban oc ba masanil eb Israel. Caw wal max ok' eb yuj is camichal. A tu' max mukay bay Ramá, is conobal. Max lajwi tu' max tojcan David bay tz'inan tx'otx' yet Parán.

David yetok Abigail

² A bay Maón ay jun winak caw wal tol beyom, 3,000 is calnel, jun mil is chiwo. Ay is tx'otx' bay cawilal conob yet Carmel, ac'al bay tu' chi tzuk xil is calnel.

³ A jun winak tu' chi yik Nabal, yinatil Caleb, junelnej tol caw wal yob c'ul. Axa pax yistzil xin, chi yik Abigail. A jun xal tu' caw wal watx' yili, caw wal aj nabal.

⁴ A yet ayic' David bay tz'inan tx'otx', max yabeni tol a Nabal tu' ayic' tzukon is calnel bay Carmel,

⁵ xan max chektok lajonwan eb is chekbej yet chi toj ak'lay cawil c'ul Nabal tu'

⁶ cax chi toj al-lay juntzan k'anej ti' bay: Chi yal David: Watx'okabc'al ayach yetok masanil eb cajan etok yul atut, yetok masanil tzet yetal ay ayach.

⁷ Max wabej tolab ayach ec' a tzukon a calnel. Ojtak c'apaxok tol a eb a ilom calnel tol ayc'al ec' eb jetok bay Carmel ti'. A yet ayic' eb jetok cayti', c'am jabok tzet max on eb, tamwal jabok tzet max ilay ec' bay eb.

⁸ Chi je' a k'anlen juntzan tu' bay eb a chekbej tu'. A eb tu' ok je' wal yalon ayach, ẍi David. C'ual wal a k'in max on jayocok, xan chi tewi David ayach tol chon a cha' yin watx'il cax chak'on ayon tzet yetal ay ayach, c'al bay David, jun a watx'il anima, quex chi, ẍi David.

⁹ A yet max apni oc eb nak chekbej David tu' bay cham Nabal, max yalon eb masanil tzet max yaltok David, max lajwi tu' max cancan eb yechbanen paktzebal ok yala'.

¹⁰ Palta cham Nabal xin, max paktzej axca ti': —¿Mactxel jun David tu'? ¿Mactxel jun c'ajol Isaí tu'? Axca tinani' xiwil juntzan winak chi elaj bay is yajawil.

¹¹ ¿Tom ok je' wak'on lobej yuc'a' c'al chibej eb in tzukom calnel ti', bay anima man wojtakok, tamwal wojtak bay chi ca tita? ẍi cham.

¹² Caytu' max yun meltzoj eb chekbej David yul is be junelxa. A yet max apni oc eb bay David, max yalon eb masanil tzet max yal cham Nabal bay eb,

¹³ xan max yal David bay masanil eb ajun yetok: —E masanil, iek e yespada, ẍi. Masanil eb winak tu' max yaoc eb is yespada yin is nan, axca max yut David yet. 400 winak tu' max toj yetok, axa junxa 200 xin, max cancan taynen masanil is tzetak yetal eb.

¹⁴ Axa max yun xin, ay junok eb nak is chekbej cham Nabal max bet alon bay xal Abigail is yistzil cham Nabal tu': —Atac'al bay tz'inan tx'otx' max chektek David juntzan eb is chekbej bay in patrón ti', yet max ul ak'lay cawil c'ul yuj eb, palta caw wal yob max yut k'anjab ba bay eb.

¹⁵ Palta xin, a juntzan winak tu' watx'c'al max yut ba eb ayon, yet max on ec'c'al iloj calnel bay ayic' eb tu'. C'amc'al janic'ok max on is tx'em eb, tamwal ay janic'ok tzet max yiec' eb ayon.

¹⁶ Toltax a yet c'ualil c'al yet ak'balil chon is taynej eb bay tu', yak'ban chon ilwi calnel.

¹⁷ Palta axca wal cham in patrón ti', tutun wal junelnej yob cham, c'am chi je' co k'anjab yetok. Na' ach ti' cax chelon tzet chonej, yujtol wal yel ay wal tzet yetal man watx'ok ok jay jiban yetok, ẍi jun chekbej tu'.

¹⁸ Yinxac'al aymanil max yion aj xal Abigail 200 ixim pan, cab net nojnak yuj vino, oc'on no' calnel toc'al bolbil yetok oyeb arroba ixim trigo k'anbinak, yetok 100 jenan uva tol taknak, yetok c'apax 200 jenan te' higo tol taknak. Ayman max yaoc yiban juntzan no burro.

¹⁹ Max yalon bay eb is chekbej tu': —Babjanektok ayex ti', ti' ok in tzakloj e yintak yet junbek, ẍi. C'amc'al janic'ok max yal xal juntzan ti' bay yichamil.

²⁰ Axa yoc xal Abigail tu' yiban jun no burro, chi aytek bay witzlak lot'an be. Axa max yilon xin, tol lanan yayol David satak yetok eb ajun yetok, xan max toj xal chaoni.

²¹ Axa David xin, lanan naobtaneni: Nabac'al max co taynej is tzet yetal jun Nabal tu' bay tz'inan tx'otx'. C'am wal janic'ok tzet yetal max jiec' bay yin is tzet yetal tu'. Caw wal yobxac'al chi yun paktzen co watx'c'ulalil.

²² Aokab Dios chi aon oc in yailal, tatol iquisto Nabal, ma junokxa winak xol eb yican wuj yet yecal yab axca ti'.

²³ Axa yet max yilon xal Abigail tu' David, max aytek yiban no burro, max ay nojanok.

²⁴ Ayman max toj bay yakantak, max yaloni: —A yobc'ulalil max yun cham wichamil, ayokab c'ay wiban. Chin tewi ayach tol chin a cha' k'anjab janic'ok, cax chaben tzet ok wala'.

²⁵ Manchak aoc cham Nabal yin a c'ul. A jun winak tu' quistal is nabal, tutun is mojc'alta' yunen axca yoc is bi tu'. C'am nabal, xan asanc'al yobal nabalej chi yala'. A pax ayin a chekbej in ti', maj wil eb a chekbej max a cheka'.

²⁶ Palta xin, a Jehová max ach tenon oc wanaj yet t'inan a mak'on cam anima yuj a paktzen yobc'ulalil anima tu' en. Aokab Jehová chi el yin c'ul tol a eb ajc'ul oc en c'al eb chi yochej chach etneni, cayokab tu' chi yun titcan yiban eb axca wal chi yun tit yiban Nabal ti'.

²⁷ Axa tinani' xin, chin tewi ayach tol a janic' sabalej chi witek ayach ti', cha pojic' xol eb a chekbej ajun etok ti'.

²⁸ Cax chak'on mimanc'ulal win ayin a chekbej in ti'. Wal yel a Jehová ok ach ak'onc'al ayjok ec' yin ekbej yetok eb enatil, ilab tol a yuj Jehová xan chak' owal ach ti'. A yin masanil a tiempoal, c'amc'al yobc'ulalil ok ak'a'.

²⁹ Caxc'al ay mac chach ukten ec'ok, chi yochej ok ach mak'on camok, c'am tzet ok ach onok; yul k'ab Jehová co Diosal ayach ocok. Axa pax eb ajc'ul oc en, a Jehová ok k'okon el eb axca junok mac chi k'okon junok ch'en yetok jurjubej.

³⁰ Axca tu xin a yet ok yunen Jehová masanil watx'il max yalil en, tol ok ach oc yajawilal bay co conob,

³¹ man ok cus a c'ul yujtol ijan cha mak' cam anima yin tol c'am is mul, ma yujtol ach caw cha pak a ba yin eb ajc'ul oc en. A wal yet ok ach yion aj can Jehová, chin a natek, ayin a chekbej in ti', ẍi xal bay.

³² Max tak'wi David bay xal: —Al-layokab watx' k'anej yin Jehová co Diosal ayon israel on ti', tol a max ach chekontek quin ul a chaoni.

³³ Ayokab c'apax watx'c'ulalil eban yuj aj nabal ach, yujtol ach wal chin a tenoc wanaj yin in mak'on cam anima, c'al in pakon in ba.

³⁴ Palta a tinani' chi wak' in ti' ayach satak Jehová, co Diosal ayon israel on ti', Cham max in tenon oc wanaj wak'on yobc'ulalil en, ta wal maj a c'ol ep a tit quin ul a chaoni, a yet yecal manxa iquisok cham Nabal tamwal junokxa winak yin yinatil chito cani, ẍi David.

³⁵ Max lajwi tu xin, max chaon ec' David bay xal masanil tzet yetal ibil oc yuj, max yaloni: —Chi je' chach toj yin tzalojc'ulalil bay atut. Ti wal chi cam eloni max nachaj el a nabal wuj, cax chi wiken bay tzet cha k'ana'.

³⁶ A yet max meltzoj xal Abigail bay ayic' cham Nabal, max yilon xal tol lanan chaon cham jun k'in axca k'in eb rey; caw wal uq'uem an cham, caw wal chi tzaloj c'ul, yuj tu' xan c'amc'al tzet max yal xal bay, atoc'al yet junxa c'ual.

³⁷ A yet max k'inib aj yet junxa c'ual, yet mayal watx'ji el c'ul cham Nabal yuj an tu', catatu' max yalon xal Abigail tzet yetal max uji, xan max oc jun derrame yin cham, max sicbican el is mimanil.

³⁸ Lajonebxa c'ual yunen axca tu', max low k'ab Jehová yin, caytu' max yun camxac'al cham Nabal tu'.

³⁹ A yet max yaben aj cham David tol mayal cam cham Nabal, max yalon axca ti': —Al-layokab watx' k'anej yin Jehová tol mayal paktzej bay camom Nabal yuj tzet max quin yutej. A c'apax Jehová max in tenon oc wanaj yin tzet yetal yob ijan max wunej, ac'al oc yiban camom Nabal tu' max jayoc yobal tzet max yunej, ẍi cham. Max lajwi tu' cax max yaontok cham David chekbej bay xal Abigail yet chi toj yal eb tol chi yochej chi ilay xal yuj.

⁴⁰ A yet max apni oc eb chekbej David bay Carmel k'anjab eb yetok xal, max yalon eb: —A cham David max on chekontek ayach, tol chi yochej chach oc yistzilok, ẍi eb bay xal.

⁴¹ Max ay nojan xal Abigail, max yaloni: —Ayin ti' chekbejc'al wayji bay David tu', caw wal bekan in c'ul in tx'ajon yakan eb is chekbej, tatol axca tu' chi yal ayin, ẍi xal.

⁴² A yet max lajwi yalon axca tu', cax max watx'nen ba yin aymanil, max tit owan eb ix is chekbej yetok, max oc xal yiban jun no burro max oc tzakan yintak eb chekbej cham David. Caytu' max yun yion cham David tu' xal.

⁴³ Max yion c'apax cham David tu' xal Ahinoam aj Jezreel; a eb xal cawan tu' max oc yistzilok.

⁴⁴ A cham Saúl xin, mayal yak' is cutz'in chi yik Mical bay Palti, is c'ajol Lais aj Galim. A Mical tu' a ton xal yistzilben cham David tu'.