Babel Libroal Cham Samuel 22 - A Txꞌan Biblia Yin Kꞌanjobal 1989

¹ Max el David bay tu', cax max toj c'uban el ba bay jun nach'en yul yet Adulam. A yet max yaben aj eb yuẍtak, c'al eb yican bay ayic'ok, max toj eb c'uban el ba yetok.

² Max apni c'apax oc eb chi etaxi, masanil eb ay is jec c'al eb cabtak c'ul. A David max oc is yajawilok eb. Ay mi junok 400 winak ajun yetok.

³ Petoj David bay tu', max tojcan bay Mizpa, bay Moab; max yalon bay cham reyal Moab: —Chin tewi ayach, tol chi cancan in mam c'al in txutx etok masantac'al ok wil tzet ok yun Dios wetok, ẍi David.

⁴ Caytu' max yun yiontok David tu' is mam bay satak reyal Moab tu'. A yetok, max ayji ec'ok yak'ban ayic' David colon ba.

⁵ Axa Gad, chekbej Dios max yal bay David: —Manchak ach cancan cayti' yin a colon a ba; palta tol ok ach tokc'al masantac'al bay yul yet Judá, ẍi cham Gad. Caytu' max yun toj David, masantac'al max apni oc bay jun k'aktelak yul yet Haret.

Max mak'lay cam eb sacerdote bay Nob

⁶ Ay jun c'ual, chotan ay Saúl bay yich jun te' tamarisco bay cajlobal Dios bay Gabaa, lacbil aj is lanza yuj, oyan oc eb is soldado yin. A yet tu' max yabeni, tol max il-lay bay ayic' David yetok is soldado.

⁷ Xan max yal bay eb is soldado oyan oc yin tu': —Ex wet conob yinatil Benjamín, abek tzet ok wala': ¿Tom che yaoc yin e c'ul, tol a jun c'ajol Isaí tu', ok ak'on e tx'otx' c'al e yuva? ¿Tom wal e masanilxac'al ok ex oc yin comandanteal c'al yin capitanil yuj?

⁸ Xan e masanilxac'al ayex ti' chex oc ajc'ulalil win. C'am mac chi alon ayin, tatol a in c'ajol mayal yak' jun is trato yetok jun c'ajol Isaí tu'. Caw wal c'am junok ex ayex ti' chex oc il janic'ok wuj. C'am junok ex che yal ayin tatol mayal oc in c'ajol tu' yak'on c'ul jun in chekbej yet chi oc ajc'ulal win quin makoni, axca chi yun tinani', ẍi cham Saúl.

⁹ Ay c'apax oc Doeg, edomita xol eb is chekbej Saúl, xan a' max tak'wi axca ti': —Ayin ti' max wil nak c'ajol Isaí tu' yet max tojcan bay Nob, max apni oc bay Ahimelec is c'ajol Ahitob.

¹⁰ A Ahimelec tu' max k'anlej bay Jehová yuj David tu', max yak'on c'apax lobej, c'al ch'en espada yet Goliat filisteo bay, ẍi Doeg.

¹¹ Caytu' max yun chekon cham rey yawtelay sacerdote Ahimelec tu', yetokc'al masanil eb sacerdote ay bay Nob tu', a ton juntzan eb tol yicanc'al ba yetok Ahimelec tu'. A yet max apni oc eb masanil satak cham rey tu xin,

¹² max yalon rey Saúl tu' bay Ahimelec: —Ach c'ajol Ahitob, ab tzet ok wala', ẍi Saúl. —Ayin ec' yul a k'ab mamin rey, ẍi Ahimelec.

¹³ Max k'anlen Saúl bay axca ti': —¿Tzet yuj xan ayach oc ajc'ulal win yetok jun c'ajol Isaí tu'? Ach max ak' is lobej, max ak'on c'apax jun ch'en espada bay, cax max a k'anlen bay Dios yuj, yuj yoc ajc'ulal win, cax chi oc quin is makoni, axca ton chi yun tinani', ẍi Saúl.

¹⁴ Max lajwi tu', max paktzen Ahimelec bay cham rey: —¿Mactxel junok xol eb a chekbej mamin rey, yelxac'al ikem axca David, yetok c'apaxok tol a ni' wal mamin rey, yajaw pax yayji xol eb a taynemal, is moj wal tol chi ilay can bay a despacho?

¹⁵ Tokwal babelto chin k'anlej bay Dios yuj David. C'amc'al bay chin oc ajc'ulal en mamin rey, xan c'amokab tzet cha na' win, c'al yin eb wican, yujtol caw wal man wojtakok, tzetbil yayji oc jun k'anej ti', ẍi cham Ahimelec tu'.

¹⁶ Palta max yalxac'al cham rey bay Ahimelec axca ti': —Asan tol chaoc yin a c'ul, tol ok ach cam yetok masanil eb ecan, ẍi cham.

¹⁷ A wal yet jun bek tu' max chekon cham rey eb is taynemal, max yaloni: —Mak'ek cam masanil eb sacerdote yet Jehová ti', yujtol a juntzan ti' ayoc eb yetok jun David tu'. Yojtak eb, tol chi toj jun David tu' c'ubaj el ba, maj pax yal eb wabej, ẍi cham. Palta a eb soldado taynemal cham rey tu', maj yal c'ul eb max low k'ab yin eb sacerdote yet Jehová.

¹⁸ A yuj tu xin, max cheklay Doeg edomita yuj cham rey, max yalon bay: —Mak' cam eb tu' ach ti', ẍi cham rey. Xan max oc Doeg mak'om cam eb sacerdote tu'. A yet jun tiempoal tu' max mak' cam 85 eb winak tol chi yaoc an chaleco naba lino.

¹⁹ Yin aymanil, max oc c'apaxtok bay yul conob Nob, a ton is conobal eb sacerdote; a yetok espada max mak' cam masanil eb winak, eb ix, eb unin c'al yetok eb toltoc'al chi alji. Max mak'on c'apax cam no wacax, no burro yetok no calnel.

²⁰ Palta a junok eb is c'ajol Ahimelec, a ton jun chi yik Abiatar, maxto je' yelaj bay chi oc camich tu', max tojcan bay ayic' David.

²¹ Xan a' max alon bay David, tol a masanil eb sacerdote yet Jehová, mayal mak'lay cam eb yuj orden max yak' cham Saúl.

²² Max yalon David: —A jun tu' wojtakxac'alta'a, yujtol a yet tu' max wila', tol ayic' Doeg bay tu', xan wojtak, a' ok alon bay Saúl. A tinani' wuj wali, xan max cam masanil eb ecan tu',

²³ palta xin, canancan wetok cayti'; C'am chach xiwi, yujtol a jun ajc'ul oc en, ac'ala' jun tu' ajc'ul oc win; palta watx' ayji wetok cayti'.