Babel Libroal Cham Samuel 20 - A Txꞌan Biblia Yin Kꞌanjobal 1989

Max colwaj Jonatán yin David

¹ Max el David bay Naiot yul yet Ramá, max toj il-lay Jonatán yuj, yet chi yal bay: —¿Tzet wal yetal in mul? ¿Tom ay junok in mul caw wal yobxac'al max wun bay a mam, xan caw wal chin saylay ec' yuj, yet chin is mak' camok? ẍi David.

² Max tak'wi Jonatán: —C'amokab chi yunej. Man ok ach camok. Chi cam a naoni, tol a masanil tzet chi yun in mam, chic'al yal ayin; caxc'al miman yelapnok ma txennej. ¿Tzet wal yuj xan man ok yal in mam tu' ayin yuj jun ti'? Majc'al mi xin, ẍi Jonatán.

³ Max occ'al ijan David k'anjabi: —Yojtak a mam tu', tol caw wal watx' jak'oni, yuj tu' xan c'am chi yal ayach, c'am chi yochej c'ul chojtaknej elok, yet c'am chach oc yin cusc'ulal. Palta xin, yojtak Jehová tol t'ananxa oc camich win, ẍi David.

⁴ Max yalon Jonatán: —Tatol ay junok bay chi je' ach in coloni, al ayin, ẍi.

⁵ Max tak'wi David: —A yet yecal chi chalay k'inal yaljubal xajaw, yowalil chin ay chotan low c'atan cham rey. Elok yin a c'ul chin c'ubajcan el in ba xolak te' ti', masantac'al yet yayc'ualil yet cabej.

⁶ Ta chin is k'anlej a mam, al bay cham, tol a' ayach max in k'ana' tol chin tojcan bay in conob Belén, yujtol a masanil eb wican ok chaon k'in axcata yet junjun abil.

⁷ Yunokab tzet chal tu', ta ẍi cham, watx' wet chi yal tu'. Ta chi tit yowal cham xin, chi yal elapnok tol naanc'al yuj in is mak'on camok.

⁸ Yuj tu' ta chi cha a c'ul, ilab toxa mayal jak' co ti' bay satak Jehová, tol watx' jak'oni. Ta yel ay in mul xin, chic'al je' in a mak'on camok, man yowalilok chin toj etok bay a mam tu', ẍi David.

⁹ Max tak'wi Jonatán: —Manchak a na' axca tu', ta max wab k'umal tol chi yochej in mam tu' chach mak' camok, mayal mi wal ayach, ẍi Jonatán.

¹⁰ —¿Mac pax ok alon ayin, ta yob ok yun tak'wok cham ayach? ẍi David.

¹¹ Max yalon Jonatán: —Ton eltok yintak eltok conob ti', ẍi. Max toj eb cawanil.

¹² A yet max apni oc eb bay c'amxa anima max yalon Jonatán: —Yojtak Jehová co Diosal tol yel chi wala'. A yet yecal ma cabej yab axca ti', ok in k'anlej wal el bay in mam tu', tzet nabil yuj. Ta watx' tzet chi na' in mam tu' en, ok waltek abej.

¹³ Tatol yob is nabal cham en xin, aokab Jehová ok aon oc yailal wiban, ta man ok wal ayach yuj tzet ok yun a colon el a ba. Axa tinani', colwajokab Jehová etok, axca max yun colwaj yetok in mam tu'.

¹⁴ A tinani' xin, ta iquis into, cax ok ach occan yin reyal, chin k'an ayach tol ayokab a yabenc'ulal win axca yabenc'ulal Jehová en, c'amokab chin a mak' camok.

¹⁵ Ta mayal quin cam xin, chin k'an ayach, tol cha natek winatil yin tojbalk'inal. A yet ok c'aylay el eb ajc'ul yuj Jehová, c'amokab chi c'ayil in binaj bay a makbej, ẍi Jonatán.

¹⁶ Caytu' max yun watx'nencan Jonatán is trato yetok David tol ok beyc'altok xol yinatil David tu'. Max yalon axca ti': Aokab Jehová chi paktzen bay eb yajc'ul David, ẍi.

¹⁷ Yujtol caw wal ochebil David yuj Jonatán, xan max yal bay yuj cayic'nen eb is trato.

¹⁸ Max yalon pax Jonatán: —Yecal chi chalay k'inal yaljubal xajaw, ok txeclojok, tol c'am ach ec'ok yujtol colan ok yuncan bay chach ay chotanok.

¹⁹ A yet cabej yet yayc'ualil, chi toj a c'ubaj el a ba bay max a c'ubaj el a ba yet junel yet yalantok. A tu' chechbanej bay cawilal ch'en ch'en chi yik Ezel.

²⁰ Ok in jultok oxebok in julbal bay tu', axca tol yin junok tzet yetal chin jultok.

²¹ Ok lajwok tu', cax ok walon bay in chekbej: Asi' itek in julbal tu', quin chi bay. Tatol ok wal bay axca ti': Tol a bay sataktek ti' ay, itek te', ta quin chi, cax chach tit yin junc'ulal, c'am tzet ok ach on chi yal tu'. Mayal wak' in ti' satak Jehová tol axca tu' ok wutej.

²² Palta ta ok wal xin: A jun in julbal tu', najatta ay bay a sataktok tu', ta quin chi bay nak, asi' najat yin a colon a ba. Caytu' yoc is nabal Jehová tol chach toj najat chi yal tu'.

²³ A pax yin co trato max jalcan ti' xin, a Jehová testigo yayji yin, tol junelnej chi jalcanok, ẍi Jonatán.

²⁴ Max lajwi tu xin, cax max c'uban el ba David bay xolak te'. Axa chalay el yich k'in yet unin xajaw tu', cax max ay chotan rey Saúl lowok.

²⁵ A bay sat pared max ay chotanok, axcac'alta' bay chi ay chotanok; axa bay yetc'ulal bay is satak, a tu' max ay chotan Jonatán, axa bay is tz'eyil Saúl tu', a tu' max ay chotan Abner, axa pax is ẍila David, c'am mac max ay chotan yul.

²⁶ A yet babel c'ual, c'am tzet max yal Saúl, axa max yun naon xin: Tekan ay junok tzet man watx'ok max yun David, tom maj je' watx'nen ba, atac'ala' yalon ley yet ayokto, ẍi mi cham.

²⁷ Yinxa yet is cab c'ual chaon oc k'in, colanc'al is ẍila David, c'amc'al mac max ay chotan yul. Yuj tu' xan max k'anlej Saúl bay Jonatán: —¿Tzet yuj xan maj jay jun c'ajol Isaí tu' low tinani' c'al yet ewi? ẍi.

²⁸ Max tak'wi Jonatán: —A David tu' max yal ayin yet ewi,

²⁹ tol chin chacantok, tolab masanil eb yican chi chaon k'in xajanbal bay is conob; yuj tu' xan max awtelaytok yuj is yuẍtak: Yuj tu' ta ay jabok in watx'il yul a sat, cha' in tok wak' tzalojbok in c'ul bay eb wuẍtak, ẍi ayin. Yuj tu' xan c'am chi jay low bay a meẍa ti', ẍi Jonatán.

³⁰ A yet max yaben cham rey axca tu', max tit yowal yin Jonatán, max yaloni: —Yune' ach yobal ix. ¿Tom man wojtakok tol watx' ak'on yetok jun c'ajol Isaí tu', yuj a q'uixwilok, c'al q'uixwilok a txutx?

³¹ ¿C'am mi chi nachaj el oj tol yak'ban iquis ec' jun c'ajol Isaí tu', man ok ach oc yin reyal? A tinani' xin, atok sayomal, titokabi, c'amxa chi ec'tok cami, ẍi Saúl.

³² Max tak'wi Jonatán axca ti': —¿Tzet yuj xan ok camok? ¿Tom ay junok tzet yob max yunej, xan axca tu' chala'? ẍi.

³³ A yet max yaben Saúl jun tu', max julontok jun lanza yin Jonatán yet chi yak' lajwok yaloni. Yuj tu' xan max nachaj el yuj Jonatán tol a is mam tu', chi yochej chi mak' cam David.

³⁴ Max tit yowal Jonatán, max aj lemnajok, max eltek; majxa low yetok eb yin yet is cab c'ual tu', yujtol max cus c'ul yuj David, yujtol caw wal yob tzet max yal Saúl tu' max yabej.

³⁵ Yet wal puch k'inibto yet junxa c'ual, max toj Jonatán yilon David, axca yayji trato eb, tzunan oc jun nak unin yintak.

³⁶ Max yalon Jonatán bay is chekbej tu': —Ayman ok tok etek in julbal ok in jultok ti', ẍi bay. Cax max toj yiontek. A wal yet tu' max julontok junxa bay is sataktok is chekbej tu'.

^37-38 A yet max apni oc nak bay max ayc'ay jun julbalej tu', caw wal yip Jonatán yawji axca ti': —¡Yel a c'ul, manchak ach oc wanajok; atac'al bay a sataktok max apni! ẍi. Lajwi tu' max yion aj is chekbej tu' is julbal Jonatán chi yak'balnej tu', cax max yiontek bay.

³⁹ C'am wal jabok max nachaj el yuj jun chekbej tu' tzet chi yun Jonatán; asan Jonatán yojtak, tzetbil yayji oc is trato yetok David.

⁴⁰ Max lajwi tu' max yak'on Jonatán is julbal bay is chekbej tu', cax max chekon meltzoj bay conob.

⁴¹ Maxc'al tojcan is chekbej tu', cax max elcantek David bay yintak ch'en ch'en; maxc'al eltek, max ay nojan satak Jonatán yin oxel. Max lajwi tu' max tz'ublen el eb is ti', max ok' eb cawanil, masantac'al max yal wal t'ukbi c'ul David tu' yok'i.

⁴² Lajwi tu' max yalon Jonatán bay: —Asi', c'amc'al tzet cha na'. Ayokabc'al oc Jehová jetok, c'al yetok enatil, c'al yetok winatil, yet chi yun co trato max co watx'nej etok ti', ẍi Jonatán. Max lajwi tu xin, max tojcan David; axa meltzoj pax cantek Jonatán bay conob.