Babel Libroal Cham Samuel 18 - A Txꞌan Biblia Yin Kꞌanjobal 1989

Max yamigonej ba David yetok Jonatán

¹ A yet max lajwi k'anjab David yetok Saúl, max camc'ulnelayxac'al David yuj Jonatán, is c'ajol Saúl tu', axca wal chi yut ya'ilnen ba, caywal tu' max yutej.

² Ac'ala' c'apax Saúl, a yet jun c'ual tu', max canxac'al David yin mulnajil yetok, majxa chalaytok yuj bay yatut is mam.

³ Max yak' Jonatán is ti' bay David yin yoccan yin amigoal yin tojbalk'inal, yujtol c'amxa yalbanil, jantak is camc'ulal Jonatán yin.

⁴ Max yion el Jonatán is jokan pichil, c'al is pichil ayoc yuj, max yak'on bay David, yetokc'al yespada, c'al is julbal, c'al cincho ayoc yin is nan.

⁵ Caw wal watx' max eloc David yin masanil tzet max cheklay yun yuj Saúl; yuj tu' xan max oc yin yajawilal yin jun makan eb soldado. Caw wal max tzaloj eb soldado yuj jun tu', yetokc'al eb mulnajwom bay Saúl.

Max chichon oc c'ul Saúl yin David

⁶ A yet max meltzoj masanil eb soldado yin owal, yet mayal camcan Goliat yuj David, cax max wajban ba masanil eb ix ix ay bay yul makbej israel, yet chi chaon jay eb ix cham rey Saúl. Chi canalwi eb ix, cax chi txijon eb pandereta, c'al platillo,

⁷ cax chi bitni eb ix: Yin milal eb ajc'ul max mak' cam Saúl. Axa pax David xin, yinxa xiwil milal eb ajc'ul max mak' camok, ẍi eb ix.

⁸ A jun tu', caw wal ya' yoc max yab Saúl; yuj tu' xan max chichon aj c'ul, max naoni: —Yelxac'al chi ilay can David in satak, xan chi yal eb ix tol xiwilxa milal max mak' cam David, axa in ayin ti' txennej milal max in mak' camok. Janic'xanej chi oc nak ti' yin reyal in q'uexelok, ẍi is nabal Saúl.

⁹ Ataxc'al yet tu' max chichonxac'al oc c'ul Saúl yin David.

¹⁰ Axa yet junxa c'ual, max oc jun espíritu yob yuj Jehová yin Saúl, max oc yin locoal bay yatut, cax max oc ijan David txalon te arpa, axcac'alta' chi yutej; ibil aj jun lanza yuj Saúl.

¹¹ Max tit wal numnaj max yil Saúl tu', max julontok is lanza yin David, cax chi occan lac'an yin sat pared tu' naoni, palta max col ba David yin cayel.

¹² Yuj tu' max xiwaj Saúl bay David, yujtol a Jehová ayoc yetok, axa pax yetok Saúl xin, c'amxa oc Cham yetok.

¹³ A yuj tu', manxanak bay yatut Saúl tu' max mulnaj David, palta tol max yiel Saúl tu' is c'atan, max yaon oc yin yajawilalok jun mil eb soldado, a ton inej oc eb yet max betic' eb yin owal.

¹⁴ Tzanc'al baytal max ec' David, watx'c'al max yut ba, yujtol a Jehová ayoc yetok.

¹⁵ Yuj tu' max texac'al xiwaj Saúl bay David, yujtol watx'c'al chi yut ba bay chi eq'ui, c'al yin tzet chi yunej.

¹⁶ Masanil eb israel, c'al eb aj Judá max ochen David; caw chi tzaloj eb yetok, yujtol a wal chi ikban eb yin owal.

¹⁷ A yet junel, max yal Saúl bay nak David: —Chi wak' ix in babel cutz'in chi yik Merab estzilok, ta caw yel watx' ach yin owal, ta c'am jabok chach xiw yin ak'oj owal juj, ayon is conob Jehová on ti', ẍi bay. Max na Saúl, tol c'am chi loc is mul yin David yin mak'on camok; yelxac'al watx' tol a eb filisteo chi mak'on camok.

¹⁸ Max tak'wi David: Tok ay jabok welapnok, tokwal miman yelapnok in mam yetok eb wican xol eb jet israelal, cax ok in oc a niok, mamin rey, ẍi David.

¹⁹ Axa max yut Saúl xin, yet max apni oc c'ual yet chi occan niejal bay yuj ix Merab tu', axa bay Adriel aj Mehola max yak' Saúl is cutz'in tu'.

²⁰ Axa junxa ix cutz'in Saúl tu' chi yik Mical, caw wal chi ochelay David tu' yuj ix; yuj tu' xan a yet max yaben Saúl tu' axca tu', max tzalojbi ajok.

²¹ Xan max na' xin, tol chi yak' ix yistzilok David, yet watx' a ix ok ak'on ayc'ay David tu' yul k'ab eb filisteo. Max yalon Saúl bay David yin is cayelal: —A tinani', wal yel chach oc in niok, ẍi bay.

²² Cax max tz'ak yalon Saúl bay eb chi mulnaj bay: —Alek bay David tu' yin c'ojanc'ulal, tol ayin rey in ti', caw wal chi wochej, c'al masanil eb chi mulnaj ayin ti' chi ochelay c'apax yuj eb; yuj tu' xan a' wal chi wochej chi oc in niok, ẍi Saúl.

²³ Max toj eb chekbej Saúl yalon bay David, cax max tak'wi David bay eb axca ti': —A mi e naon ayex ti' tol suboj joc yin niejal bay junok rey, ta meba' on, cax c'am wal jabok jelapnok, ẍi David.

²⁴ Max lajwi tu xin, max toj eb chekbej Saúl tu' yalon bay, tzet max yun yalon David.

²⁵ Axa yuj tzet chi yun yayc'ay David tu' yul is k'ab eb filisteo, xan caytu' chi yun chekon Saúl tu' yal-lay bay David: —Alek wal bay, c'amc'al chi tojlanej in cutz'in ti' axca ta is beybal eb anima, asan chi yitek 100 jolom is winakil eb filisteo ayin, axca tu' chi yun in pakon in ba bay eb wajc'ul tu', ẍitok Saúl.

²⁶ Max toj pax eb chekbej tu' yalon bay David. Max chaon is c'ul axca tu', max na' tol yin subojal chi yun yoc niejal bay cham rey. A yet c'amto chi apni oc c'ual,

²⁷ max toj David yetok eb is soldado, yin mak'on cam 200 eb filisteo; axa yiontok David tu' jolom is winakil eb bay Saúl tu', asan yet chi occan niejal. Max lajwi tu', max yak'on Saúl ix Mical is cutz'in yistzilok David.

²⁸ Max yilon Saúl, c'al nachaj el yuj, tol a Jehová ayoc yetok David, cax yelxac'al chi camil c'ul ix Mical is cutz'in tu' yin,

²⁹ xan caw wal max xiwaj Saúl bay David, yintak yet yalantok; yelxac'al max oc ajc'ulal yin.

³⁰ Cax max ajc'alcan eb filisteo yak'on owal yin eb israel, palta David jelan yak'on owal yintak juntzanxa eb yet yajawilal yin eb soldado junjuntak el, xan caw binajbil max yunej.