Babel Libroal Cham Samuel 17 - A Txꞌan Biblia Yin Kꞌanjobal 1989

Max mak'lay cam Goliat yuj David

¹ Ay jun c'ual, max wajbaj oc ba eb filisteo bay Soco, yul yet Judá, yet chi yak' eb owal yin israel. A tu' max watx'nej eb is campamento bay Efes-damim, nan xol Soco tu' yetok Azeca.

² Ac'ala' c'apax Saúl, max wajbaj oc ba yetok eb yet israelal bay jobeal Ela, yuj maklay sat eb filisteo.

³ Ayic' eb filisteo bay jun tzalan; axa bay junxa tzalan, a tu' ayic' eb israel; ay jun jobe aycan nan xol eb.

⁴ Max eltek jun soldado xol eb filisteo, caw wal miman is tel, oxeb metro wal is tel, chi yik Goliat, aj conob Gat.

⁵ Broncec'al el jun is ch'en toctor ayaj yin is jolom, naba bronce ch'en coraza ayoc yin txam c'ul, oyeb mi arroba yalil ch'en ayoc yin.

⁶ Broncec'al ayoc yin yakan, broncec'al ayoc yinlak jolom is xic', c'al coc'tak lanza ayoc yin yichin.

⁷ A teal is lanza ibil oc yuj tu', caw wal miman yin, ec'ban 13 libra yalil ch'en hierro ayoc yin txam te'. Babel nak yiomal oc makbal julbalej yuj.

⁸ Max oc lecan satak eb soldado israel, max awji ajtok: —¿Tzet yuj xan tol txololixac'al che yut eltek e ba yin owal? Ayin filisteo in, axa ayex soldado ex Saúl ti'. A tinani', siq'uek eltek junok winak e xol tu', yet chi aytek yak'on owal wetok.

⁹ Ta chi tzakay yak'len owal wetok, ta chin ayc'ay yuj, chon occan e chekbejok; ta a jun nak tu' chi ayc'ay wuj xin, cax chex occan co chekbejok on.

¹⁰ A yet jun c'ual ti' chekektek junok winak chi yak' owal wetok tinani', ẍi Goliat.

¹¹ A yet max yaben Saúl, c'al conob Israel jun k'anej tu', max somchaj c'ul eb yuj xiwilal.

¹² A bay Belén yul yet Judá, ay jun cham icham winak chi yik Isaí. A yul tiempoal Saúl tu' caw icham winakxa, ay waxakwan is c'ajol; a xol eb nak tu' ay jun nak chi yik David.

¹³ A oxwan c'ajol Isaí tu' babel winak, ayoc eb yin soldadoal yuj Saúl; a Eliab babel, axa yet is cab, a ton Abinadab, axa yet is yox, a ton Sama.

¹⁴ Tzunan uninxac'al David tu'; a eb oxwan tu' tzakan eb yintak Saúl.

¹⁵ Axa pax David tu', chi ulic' bay c'atan Saúl cax chi tojpax yilon calnel is mam bay Belén.

¹⁶ A yet tu', ayc'al oc Goliat filisteo yalon buchwal k'anej yin eb israel. Junjunc'al k'inibalil, c'al junjun yayc'ualil ayc'al oc buchwaji, cac'al tu' max yun yin cawinak c'ual.

¹⁷ Ay jun c'ual max yal Isaí bay David is c'ajol: —Itok ox almu ixim trigo k'anbinakxa ti', yetok lajonebok ixim pan, cax chi toj elon eb oẍtak tu'.

¹⁸ Cax cheontok lajonebok no queso ti' bay is capitán eb oẍtak tu'; cax cheloni ta watx' c'ul eb nak, cax cheontek junok tzet yetal tx'oxbanilok ta watx' c'ul eb, ẍi Isaí tu' bay nak David.

¹⁹ A tu' ay Saúl yetok eb yuẍtak David, c'al yetok masanil eb soldado israel bay jobeal Ela yin yak'on owal yetok eb filisteo.

²⁰ Yet puch k'inibalil yet junxa c'ual, cax max yak'on can David no calnel bay junxa nak winak, cax max toji, ibil oc tzetak yetal max yatok is mam tu' bay. A yet max apni oc bay campamento eb soldado israel, ipanxa toj eb yin owal, chi el yaw eb.

²¹ Max txolon ba eb israel, ac'ala' caytu' max yut c'apax ba eb filisteo tu', max txolon oc ba eb bay satak eb israel.

²² Yin aymanil max yak'can David tzetak yetal ibil oc yuj tu' bay yul campamento, bay jun nak chi taynen tzetak yetal; max toj bay txolan oc eb tu', cax max k'anleni, tzetbil yayji eb nak is yuẍtak nak.

²³ A yet lanan k'anjab yetok eb, cax max eltek Goliat, aj conob Gat, nan xol eb filisteo, cax chi yalon juntzan buchwal k'anej chi yalc'alta' yet junjun c'u yin eb israel. C'uxan max yab David tzet max yala'.

²⁴ A yet max yilon eb israel nak filisteo tu', cax chi xiwaj eb, chi el eb bay.

²⁵ Cax chi yalon eb: ¿Max mi wal e yil yelol jun winak tu' yalon buchwal k'anej jin? Ta ay wal junok ok tzakay mak'on camok, a cham rey max yala' tol miman tumin chi yak'a', cax chi yak'on is cutz'in yistzilok, c'amxa chi yak' eb is yican tojlabal, ẍi eb.

²⁶ Max k'anlen David bay eb ay is cawilal tu': —¿Tzet yetal chi ak'lay bay junok chi mak'on cam jun filisteo ti', cax ok bek yalon juntzan buchwal k'anej jin? ¿Tzet yelapnok jun tx'ok conob ti', xan chi tx'emlay eb soldado yet cham Dios iquis yuj? ẍi David.

²⁷ Ac'ala' max yut yalon eb axcac'al max yut yalon eb yet yalantok, tol miman tzet yetal chi yi' jun mac chi mak'on cam jun ajc'ul tu'.

²⁸ Lanan yaben Eliab, babel yuẍtak David, tzet chi yala', c'al tzet chi yal eb tu', caw wal ow max yaloni: —¿Tzet chi ul on cayti'? ¿Mac max ak'can yilon jayc'on no calnel bay xolak te' tu'? Wojtak tol miman elapnok aloni; palta yob a nabal; toc'al chi ul el tzetbil chi yun yoc owal, ẍi jun yuẍtak tu' bay.

²⁹ —¿Tzet chex wut xin? Toc'al chin k'anlej tzet yayji jun filisteo tu', ẍi David.

³⁰ Ayman max eli, max toj k'anlej bay junxa; ac'ala' max yun paktzelay bay.

³¹ Axa pax eb max aben tzet max yal David tu', max toj eb yalon bay Saúl; yuj tu' xan max awtelay yuj.

³² Max yalon David bay Saúl: —Manchak ex xiw bay jun filisteo tu'. Ok in tok ayin a chekbej in ti', ok wak' owal yetok, ẍi David.

³³ —Maj je' a toj ak'on owal yetok jun filisteo tu', yujtol unin ach'ej achto; xal pax jun tu xin, icham winak, yintax yach'ejal max c'oli yin owal, xan caw wal jelan, ẍi Saúl.

³⁴ Max tak'wi David tu' axca ti': —A' ayin a chekbej in ti', a yet chi wilon is calnel in mam, ay bay chi jay no coj, ma no oso yet chi ul yitok no', no calnel tu'.

³⁵ Chin toj yintak no', cax chin tok'on ec' no calnel tu' bay no'. Ta chi tit no' win, cax chin tzac'ontek yalan ti', chin mak'on camok.

³⁶ Yuj tu', taxac'al coj ma oso, tojolc'al cam wuj. Caytu' ok wut jun tx'ok conobal tu'. ¿Tzet yuj xan tol chi tx'emlay eb soldado cham Dios iquis yuj?

³⁷ A Jehová max in colon bay no coj c'al bay no oso, ac'ala' a Cham ok in colon bay jun filisteo ti', ẍi David. Max yalon Saúl bay: —Asi' xin, a Jehová ok ach colonok, ẍi bay.

³⁸ Ayman max yiel Saúl is pichil yet owal ayoc yuj, max chek yalay oc yin David. Max alay ajtok jun ch'en toctor naba bronce yin is jolom c'al jun coraza yin txam is c'ul.

³⁹ Lajwi tu', max c'alon oc David tu' ch'en espada yin is nan, cax max bey yaloni; maj je' bey yetok, yujtol man k'ajanok. Yuj tu' xan max yal bay Saúl. —C'am chi je' in bey yetok juntzan ti', man k'ajanok in yetok, ẍi. Yuj tu' xan max yiel masanil juntzan tu' yin.

⁴⁰ Asan max yi' jun is te', cax max sic'on aj oyeb c'olan ch'en ch'en bay ti a', max yaon aytok yul is yalpa, ibil oc jun jurjub yuj, max jitzontok ba cawilal jun filisteo tu'.

⁴¹ Ac'ala' jun filisteo tu', max jitztek ba bay cawilal David tu', babel nak yiomal oc makbal julbalej yuj.

⁴² A yet max il-laytok David yuj jun filisteo tu', max yiloni, tol caw wal watx', c'al cakwak'inak yili, palta c'am yelapnok yul sat, yujtol ach'ej uninto.

⁴³ Max yaloni: —¿Tom tx'i' in chela', xan chach tit win yetok a te'? ẍi bay. Lajwi tu', max catabnelay David tu' yuj, yin is bi is diosal, max yaloni:

⁴⁴ —Sebach cayti', ok wak' a chibejal tu' chitok no ostoc, c'al no ok, ẍi bay David.

⁴⁵ Max tak'wi David tu' axca ti': —Ach ti' espada ibil oc oj, yetok lanza c'al coc'tak lanza, cax chach jay ak'on owal win. A pax ayin ti', a yetok yipalil Jehová Cham Yajaw yin Masanil chin jayoc a satak, a ton co Diosal ayon soldado israel on ti', a ton Cham c'am yelapnok aloni.

⁴⁶ A tinani', a Jehová ok ach aon oc yul in k'ab, cax ok ach in mak'on camok, ok in tzoc'on el a jolom, cax ok wak'on a chibejal tu' chitok no ostoc c'al no ok; yetok c'apax chibejal eb et conob ti', ok wak' chitok no no' tu'. Axca tu' ok yun yojtaknen el masanil anima, tol ay jun Dios co xol ayon israel on ti'.

⁴⁷ A masanil eb anima wajan ec' ti', ok nachaj el yuj eb, tol man espadaok, tamwal lanzaok chi mulnaj yuj Jehová yet chi colon el is conob. A jun owal ti' yet Jehová, a wal caw ok ex aon oc yul co k'ab, ẍi David.

⁴⁸ Max tit Goliat tu' satak David, ac'ala' David tu' ayman max toj c'apax satak Goliat tu'.

⁴⁹ Ayman max yanaj aytok k'ab yul is yalpa, max yion ajtek jun ch'en ch'en, max yaon octok yul is jurjub tu', max yak'oni. Palanc'al low yin nan sat Goliat, max canxac'al can ch'en yul is nan sat tu', cax max ayc'ay nojnaj sat tx'otx'.

⁵⁰ Caytu' max yun yayc'ay Goliat yuj David; junnej ch'en ch'en yetok jun jurjub max ak'on cam Goliat. C'amc'al yespada David,

⁵¹ xan max ajtok lemnaj yiban Goliat, max yion ajtek ch'en espada yet Goliat tu', ac'al oc ch'en max ak'onxac'al camok cax max yion el jolom Goliat tu' yetok ch'en. A yet max yilon eb filisteo tol mayal cam jun mimanbil xol eb tu', max el eb yin yanej.

⁵² A yet max yilon eb israel, c'al eb Judá, max el yaw eb, max toj eb yintak eb filisteo, masantac'al max apni oc eb bay ti' conob Gat, c'al Ecrón. Bay masanil yulak be chi tojtac'al bay Saaraim, chi apni oc bay Gat, c'al bay Ecrón, toxac'al telton ba cantok is mimanil eb soldado filisteo camnakxa.

⁵³ Max lajwi tzakloj eb israel yintak eb filisteo bay juntzan lugar tu', cax max meltzoj eb yion eltek eb masanil tzetak yetal ay bay yul campamento eb filisteo tu'.

⁵⁴ Yak'ban tu', cax max yion aj David is jolom Goliat, max yiontok bay Jerusalén; axa ch'en ch'en yet ak'bal owal yuj Goliat, max yielok, max yaon octok bay yul is mantiado.

⁵⁵ A yet max yilon Saúl toj David yin owal yin Goliat, max k'anlen bay Abner, general yayji yin eb soldado: —Abner, ¿mactxel is mam jun nak ach'ej ti'? ẍi.

⁵⁶ —Ach mamin rey, caw wal man wojtakok, ẍi Abner. —Chi cancan yul a k'ab a k'anlen ec'ok, ẍi rey Saúl.

⁵⁷ A yet lanan meltzoj David, yet maxax camcan Goliat yuj, ibil oc is jolom yuj, max yiontok Abner bay Saúl,

⁵⁸ Max k'anlen Saúl tu' bay David: —¿Mactxel a mam, cha ach'ej? ẍi Saúl. Max tak'wi nak David: —C'ajol in Isaí, cham a chekbej cajan bay Belén, ẍi nak.