Babel Libroal Cham Samuel 15 - A Txꞌan Biblia Yin Kꞌanjobal 1989

Max ten Saúl tzet max yal Jehová

¹ Ay jun c'ual max yal cham Samuel bay Saúl: —A Jehová max in chekoni, yet max ach waon oc yin reyal xol israel is conob. Yuj tu' xan cha ab tzet chi yal Jehová ayach.

² Axca ti' yalon Jehová, Cham Yajaw Yin Masanil: Ok waoc yailal yiban eb amalecita yuj max yak' eb owal yin eb israel yet max tit eb bay Egipto.

³ Yuj tu' xan chak' owal yin eb, cax cha c'ayon el eb yetokc'al tzet ay eb, c'amc'al junok makan bay chi cusoc a c'ul yin, palta cha mak' cam masanil eb winak, eb ix ix, eb unin, c'al yetok eb tolto chi alji, ac'ala' c'apax no wacax, no calnel, no camello, c'al no burro cha c'ayil masanil, ẍi Jehová, ẍi Samuel.

⁴ Max wajbaj oc Saúl masanil eb israel, cax max il-lay eb masanil yuj bay Telaim; 200,000 eb soldado israel chi beyi, c'al 10,000 eb aj Judá.

⁵ Lajwi tu', cax max toj Saúl bay beal is miman conob Amalec, cax max chekon c'ubaj el ba eb soldado bay yul beal jun a' takin melem.

⁶ Max yalontok bay eb quenita: —Elanek bay xol eb amalecita, yet c'am chex in c'ayil yetok eb; yujtol max cus e c'ul yin eb jet israelal on yet max jay eb cayti', yet petoj eb bay Egipto, ẍitok Saúl bay eb. Ayman max pojil ba eb quenita tu' xol eb amalecita.

⁷ Max apni oc lemnaj Saúl yin eb amalecita bay Havila, masantac'al bay Shur bay sat mojonal yet Egipto; cax max ayc'ay eb yuj.

⁸ Max mitx'ontek Agag is reyal eb, cax max yiontok preso; axa masanil eb amalecita xin, max mak'lay cam eb.

⁹ Palta a Saúl yetok eb is soldado maj mak' cam eb Agag. Maj c'apax mak' cam eb no wacax tol watx', c'al no calnel, c'al no yunetak wacax tol bak'ech, c'al no icham calnel, c'al juntzanokxa tzetak yetal tol caw wal ay tojol; axa masanil tol c'am wal watx'il, c'al tol c'am wal tojol, masanil max c'ayil yuj eb.

¹⁰ Ayman max yal Jehová bay cham Samuel:

¹¹ Majokta waoc Saúl yin reyal, yujtol chi yican el ba wintak, cax chi tenon tzet max wala', ẍi Jehová. Max occan cham Samuel yin cusc'ulal, masanil ak'bal max txajli cham bay Jehová.

¹² Puch k'inib max toj cham yilon Saúl. Max al-lay bay cham tol max toj Saúl bay Carmel, a tu' max watx'nej aj jun monumento yuj mimanen ba; lajwi tu' max toj bay Gilgal.

¹³ Yuj tu' max toj cham Samuel bay tu'. A yet max apni oc cham, max yalon Saúl bay axca ti': —Yak'okab Jehová a cawil; mayal wikej bay tzet max yal Cham, ẍi.

¹⁴ —¿Tzet pax yayji no calnel c'al no wacax chi el yaw chi wab tu'? ẍi cham Samuel.

¹⁵ —A tu' max tit no' bay yul yet Amalec, max yanejcan eb soldado no' calnel tol watx', c'al no toro tol ok oc no' xajanbalil bay Jehová co Diosal. Axa pax masanil xin, max c'ayilok, ẍi cham Saúl.

¹⁶ C'amxa tzet watx' chala'. Ok wal ayach tzet max yal Jehová ayin yet k'ekbintakil ewi, ẍi cham Samuel bay Saúl. —Ala', ẍi Saúl.

¹⁷ Max yalon cham Samuel bay Saúl axca ti': —¿Tom maj al yet yalantok xin, tol caw wal yaynakil ayji? Caxc'al mi yaynakil ach, palta max ach oc yin reyal yiban masanil is tribual israel; a Jehová max ach aon oc reyalok co conob ti'.

¹⁸ Ta max ach chek Cham yin toj a c'ayon el juntzan yobtakwom amalecita tu', yetok masanil tzetak yetal ay eb,

¹⁹ ¿tzet yuj xan max a ten tzet yetal max yal Jehová, palta tol max etek tzet yetal bay eb ajc'ul tu'? Caw wal yob tzet max on satak Jehová, ẍi cham.

²⁰ Max tak'wi Saúl: —C'amak, max wikej bay tzet max yal Cham, max bet in mitx'tek Agag reyal eb amalecita, max in c'ayon el masanil eb anima bay tu'.

²¹ Axa eb soldado xin, max yanejcan eb no calnel, c'al no wacax watx' xol no' tol t'inanc'alta c'aylay elok; max yitek eb no', yet ok ak'lay yin xajanbalil bay Jehová co Diosal bay Gilgal ti', ẍi Saúl.

²² Yuj tu' max yal cham Samuel: Yelxac'al chi tzaloj Jehová ta chi ikelay bay tzet chi yala' yintak pax xajanbal chi ak'lay tz'a bay. Yelxac'al watx' tatol chi chalay ablay tzet chi yal Cham, yintak pax yak'lay tz'a seboal no' calnel bay.

²³ Miman is mul jun tenomtak bay Jehová, axca wal is mul eb naom el k'anej yaloni. Lajan wal is mul mac c'am chi yikej tzet chi yal Jehová, axca wal eb chi ay nojan bay comon dios. Yujtol maj ekej tzet max yal Cham, xan ok ach yiel yin reyalil, ẍi cham Samuel.

²⁴ Max yalon Saúl bay cham Samuel: —Yel toni, max oc in mul, max in ten tzet max yal Jehová, c'al tzet max al ayin, yujtol max in xiw bay eb anima tzunan oc wintak ti', max wiken bay tzet max yal eb.

²⁵ Elokab yin a c'ul tol chak' mimanc'ulal win yuj in mul max oqui, meltzojan wetok cax chach oc ayilal wetok satak Jehová, ẍi Saúl.

²⁶ —C'am chin meltzoj etok, yujtol max a ten tzet max yal Jehová; xan chach yiel Cham yin reyalil yin co conob Israel ti', ẍi cham.

²⁷ A yet max meltzoj cham Samuel, axa pax tu' yaloni, max oc nic'an Saúl yin ti' is k'util cham, max nic'chaj yuj.

²⁸ Yuj tu' max yal cham Samuel bay Saúl: —Axca wal tu' ok yun tzilon el Jehová ekbej yin reyal yin is conob israel ti', cax ok yaoncan oc ekbej tu' bay yul k'ab junxa jetconob tol watx' entak.

²⁹ Yowalil ok yun jun ti', yujtol a Jehová, Cham chi ji' can ayon israel on ti', maj je' yak'on lek'tial, c'am chi yak' tac is ti' axca anima, ẍi cham.

³⁰ Max yalon Saúl: —Yel toni max oc in mul, palta elokab yin a c'ul, tol ayokab welapnok satak eb yajawil co conob, c'al bay satak eb jet conob masanil. Yuj tu' meltzojan wetok, cax chon oc yin ayilal bay Jehová co Diosal, ẍi Saúl.

³¹ Yuj tu' max meltzoj cham Samuel yetok, cax max oc Saúl yin ayilal bay Jehová.

³² Lajwi tu' max yalon cham Samuel: —Iektek Agag, reyal Amalec, in satak ti', ẍi cham. Max tzalojxac'al c'ul Agag, max oc lecan satak cham. A mi wal naoni tol mayal eq'uel camich yiban.

³³ Max yalon cham Samuel tu' bay: —Yuj espada ti' xan xiwil eb xal ix max cancan yin c'amxa yune'. Axca wal max yuncan eb xal tu' caytu' ok yun cancan a txutx, ẍi cham Samuel. C'amc'al mimanc'ulal yuj cham, coc' tzoc' max yuntok Agag satak Jehová bay Gilgal yuj.

³⁴ Max lajwi tu' max meltzoj cham bay Ramá, cax max meltzoj c'apax Saúl bay yatut bay Gabaa.

³⁵ A yet iquisto cham Samuel tu', majxa toj yil Saúl, palta chi oc yin cusc'ulal yuj. Axa Jehová max na ba yuj max yaoc Saúl yin reyalok conob Israel.