Babel Libroal Cham Samuel 14 - A Txꞌan Biblia Yin Kꞌanjobal 1989

Max ayc'ay eb filisteo yuj Jonatán

¹ Ay jun c'ual max yal Jonatán is c'ajol Saúl bay nak yiomal oc is mitx'k'ab yet owal: —Ec'okon tok bay k'axep tu', axa japni oc bay is destacamento eb filisteo, ẍi. C'amc'al tzet max yal Jonatán tu' bay is mam.

² Axa Saúl tu', a tu' ay is campamento cawilal Gabaa bay yich jun te' granado bay chi tec'lay ixim trigo; 600 soldado tzunan yintak.

³ Junej ay Ahías is c'ajol Ahitob yetok Saúl. Ayoc is pichil yet sacerdoteal yuj. (A Ahitob yuẍtak Icabod, c'ajol Finees eb, c'al yitxiquin Elí, a ton cham sacerdoteben bay Silo.) Man yojtakok Saúl c'al eb soldado tatol max toj Jonatán bay tu'.

⁴ Axa pax Jonatán xin, ayoc yin is nabal tol ok apnok bay campamento eb filisteo tu'. Bay nan cab mimek sat ch'en, a tu' chi ec'tok be tu', jun ch'en chi yik Boses, axa junxa ch'en chi yik Sene.

⁵ A jun ch'en ay bay satak Micmas yetc'ulal norte, axa junxa ch'en, ay bay satak Gabaa bay yetc'ulal sur.

⁶ Max yalon Jonatán bay nak yiomal oc is mitx'k'ab tu': —A tinani' ec'okon tok bay sat ch'en tu', axa jec'apnok bay campamento eb tx'ok conobal tu'. Axtawal ok colwaj Jehová jetok; tok ay yail colwaj Cham jetok, ta chi yal is c'ul, caxc'al mi c'am on tx'ial, ẍi Jonatán.

⁷ —Yunokab bay chi cha a c'ul, asan tol tzunan in entak bayc'al chi ca a toji, ẍi nak.

⁸ Max yalon Jonatán: —Ton xin, a yet ok on ayapnok bay yul jobe tu', ok co tx'ox co ba bay eb.

⁹ Ta ok yal eb ayon, tol ok jechbanej yayol eb cayti', c'am chon ajtok bay ayic' eb tu'.

¹⁰ Ta ok yal eb tol chon ajtok bay eb tu', catatu' ok on ajtok. Caytu' ok yun tx'oxon Jehová ayon tol ok colwaj jetok, ẍi Jonatán.

¹¹ Axca tu' max yut ba eb, max tx'ox ba eb bay eb filisteo. A yet max yilon eb filisteo eb cawan tu', max yalon eb: Ilektonabi, lanan yeltek eb hebreo yulak is yolan bay chi c'ubaj el ba eb, ẍi eb.

¹² A wal yet jun bek tu' max awji aytek eb bay Jonatán, c'al bay nak ajun yetok tu': —Lim, ajanektek cayti', ay tzet ok jal ayex, ẍi eb filisteo. Yetc'al jun bek tu' max yalon Jonatán bay nak: —Tzunan achc'al wintak, yujtol a tinani' ok yaoc Jehová eb filisteo ti' yul co k'ab ayon israel on ti', ẍi bay.

¹³ Max ajtok txactxon Jonatán yetok nak yiomal oc is mitx'k'ab tu'; a eb filisteo max ayc'ay yuj Jonatán, axa nak yiomal oc mitx'k'abej tu' max watx' mak'nenxac'al cam eb.

¹⁴ A yin jun babel owal tu', ay mi junc'alwanok max mak' cam eb, asannej mi canebok tx'anil bay max bey eb.

¹⁵ Masanil eb soldado ayic' bay yul campamento eb filisteo tu' c'al eb sakleminak yayji elok, a ton eb aytok ioj eltek tzetak yetal tu', caw wal max xiwaj eb. A wal yet jun bek tu' max ec' pax jun quixcab, caw wal ow max yut ba, yuj tu' xan max texac'al xiwaj eb.

¹⁶ Axa pax eb makwajwom ayoc yuj Saúl bay Gabaa yul yet Benjamín, max yil eb yec' bulbon eb filisteo tu'.

¹⁷ Yuj tu' xan max yal Saúl bay eb soldado tzunan oc yintak axca ti': —Il-layokabi, tz'akan on mi, catatu' ok txeclojok mactaktxel tol c'amic'ok, ẍi. Axa yet max il-lay eb xin, cax max ilchajtek tol c'amic' Jonatán yetok yiomal oc is mitx'k'ab.

¹⁸ A yet tu', ayic' caẍail is trato Jehová xol eb israel xan max yal Saúl bay Ahías: —Itek is caẍa Jehová cayti', ẍi.

¹⁹ Lanan wal k'anjab Saúl yetok cham sacerdote, max texac'al somchaj aj eb filisteo. Yuj tu' xan max yal Saúl bay cham sacerdote tu': —Manchakxa etek, majxa co k'anlej bay Jehová, ẍi Saúl.

²⁰ A wal yet junbek tu' max wajban oc Saúl masanil is soldado, cax max toj eb yin eb filisteo. Axa yet max apni oc eb, max yilon eb tol maxax somchaj el nabal eb filisteo, axac'al oc eb chi yak'lej cam ba.

²¹ Yetok c'apaxok, a jantak eb israel aycan xol eb filisteo, a yet max yilon eb tol tx'ok yayji ocok, cax max ec'tok eb yetok Saúl, c'al yetok Jonatán.

²² Axa yet max yaben eb israel chi c'ubaj el ba bay siquilal tx'otx' yul yet Efraín, tol ayoc eb filisteo yin elilal, xan ajun eb max toj yintak eb tu'.

²³ Max toj eb yintak eb filisteo, masantac'al bay sataktok Bet-avén; caytu' max yun colon Jehová conob Israel yet jun c'ual tu'.

Is ti' Saúl max yak'a'

²⁴ A yet jun c'ual tu', caw wal max ispay el yuj eb israel, yujtol c'am junok eb max low yet tu', yujtol max yal Saúl jun k'anej: Catabnebil mac ok low yet jun k'ekbintakil ti', yet c'amto chi wiel yowal in c'ul yin eb ajc'ul ti', ẍi.

²⁵ Axa yet max apni oc eb soldado bay xolak te', ay no' yal cab bay sat tx'otx';

²⁶ axcaxac'al yel yakan a' aej, caywal tu' bey yalcab bay sat tx'otx' tu', palta c'am wal junok max ablen jabok no', yujtol max xiw eb bay jun k'anej max yal Saúl.

²⁷ Axa Jonatán, maj yab jun is k'anej Saúl tu', yuj tu xin, max laaytok cham jun te te' ibil oc yuj xol no yalcab tu', max loon janic' yalcab tu', caw wal max oc yip yuj, max yabej.

²⁸ Max yalon jun soldado bay: —Masanil eb soldado max occan yalan is catab a mam, yuj tu' xan ta ay junok ay jabok tzet chi lo', catabnebil chi yuncanok; yuj tu' lajanxac'al pax jip co masanil, ẍi jun soldado tu'.

²⁹ Max tak'wi Jonatán: —A in mam tu', caw wal yob tzet chi yitek yiban co nación ti'. Ilab in ayin ti', caw wal max wab wal yoc wip yuj jab no yalcab max in lo' ti'.

³⁰ Caw wal ay tom yip eb soldado masanil, ta max lo eb janic'ok tzet max yican ec' eb bay eb ajc'ul tu'; xiwil tom eb filisteo max cam juj, ẍi Jonatán.

³¹ A yet jun c'ual tu', max tzakloj eb israel yintak eb filisteo bay Micmas, masantac'al bay Ajalón. Caw wal max paxxac'al yip eb soldado.

³² Yuj tu xin, a jantak tzet max yiec' eb bay eb ajc'ul tu', no wacax, no calnel, yetokc'al no yunetak wacax tu', max mak' cam eb no', majxac'al yechbanej eb yel is chiq'uil no' max chion eb.

³³ Ayman max bet al-lay bay Saúl: —Chi yaoc eb soldado is mul satak Jehová, chi chi' eb no' chibej yetok is chiq'uil, ẍi. Yuj tu' xan max yal Saúl: —Max e yaoc e mul yul sat Jehová, xan a tinani' balektek junok ch'en miman ch'en tu' cayti'.

³⁴ Cax alek bay eb anima, yiokabtek eb junok is wacax, ma junok is calnel, cax chi mak'on cam eb, chi chion eb cayti', yet c'am chi oc e mul satak Jehová yin e chion no chibej tol ayto oc is chiq'uil, ẍi Saúl. A yet jun ak'bal tu', junjunc'al max yitek is wacax, ma is calnel, cax max mak'on camok, max chioni.

³⁵ Cax max watx'nen Saúl jun altar bay tu'. A jun ti' babel altar max watx'nej aj Saúl satak Jehová.

³⁶ Catatu' max yalon Saúl bay eb soldado axca ti': —Tonek jak'ekc'al owal yin eb filisteo, cax ok jion ec' masanil is tzetak yetal eb, masantac'al yet ok k'inibok ajok, c'amxa junok chi can yin yiquisal, ẍi Saúl. —Yunokab bay chi cha a c'ul, ẍi eb. Max tak'wi cham sacerdote, max yalon axca ti': —A yet c'amto chon tojek, watx' ta chi co k'anlej bay Dios, ẍi cham.

³⁷ Max lajwi tu' max k'anlen Saúl bay Dios: —¿Tom chon toj jak' owal yin eb filisteo? ¿Ok mi aoc eb yul co k'ab on? ẍi. Maj tak'wok Jehová bay yet jun ak'bal tu'.

³⁸ Yuj tu' xan max yala': Jitzektek e ba ayex yajawil ex ti', cax ok co k'anleni, mac max oc is mul tinani'.

³⁹ Mayal wak' in ti' bay Jehová co Colomal ayon israel on ti', caxc'al a in c'ajol Jonatán max oc is mul, tojolc'al cami, ẍi Saúl. C'am junok xol eb soldado max tak'wi.

⁴⁰ Yuj tu' xan max yal Saúl bay masanil eb axca ti': Ec'anektek e masanil bay jun pac' ti', ayinxa ok in ec'tok bay jun pac'xa tu' yetok in c'ajol Jonatán, ẍi. —Yunokab bay chi cha a c'ul, ẍi eb soldado.

⁴¹ Max yalon Saúl axca ti': —Mamin Jehová ach co Diosal. Tx'ox wal yin jichanil yin suerteal ti' mac ay is mul, ẍi. Axa max yunej a yiban Jonatán, yetok Saúl max ayc'ayi, max colchajcan el eb conob.

⁴² Yin ayman max yalon Saúl axca ti': —Axa tinani' xin, axac'al wiban yetok in c'ajol ti' chi oc suerte, ẍi Saúl. Axa max yun xin, a yiban Jonatán max ayc'ayi.

⁴³ Yuj tu' max yal Saúl bay Jonatán axca ti': —Al ayin tzet max onej, ẍi Saúl. Max yalon Jonatán: —Wal yel max wablej janic' no yal cab, toc'al max in laaytok txam jun te te' xol no', max in looni, yuj tu' xan bekan in c'ul chin cami, ẍi Jonatán.

⁴⁴ Max yalon Saúl axca ti': —Yaokab oc Dios junok miman yailal wiban ta c'am chach cami, ẍi Saúl bay Jonatán.

⁴⁵ Max tak'wi masanil eb anima: —Tokwal ok co cha cam Jonatán ti', yujtol a yuj, xan max on colchaj ayon israel on ti'. C'am chi yun axca tu'. Yojtak Jehová co Diosal. Wal yel c'am junok xil is jolom Jonatán ti' ok ayc'ay bay sat tx'otx', yujtol a tzet mayal yun tinani', a Dios max colwaj yetok, ẍi masanil anima tu'. Caytu' max yun colchajcan el Jonatán yuj eb yet conob, xan majxa camok.

⁴⁶ Majxa tzakloj Saúl yintak eb filisteo, cax max meltzojcantok eb bay is conob.

⁴⁷ Yettax max occan yikbej Saúl yiban conob Israel, max yak' owal yin masanil conob ajc'ul oyan oc yin conob tu'; yin eb Moab, eb yinatil Amón, eb Edom, c'al yin eb is reyal Soba c'al yin eb filisteo. A jantak bay max ec'c'al yin owal, max ayc'ayc'al eb yuj.

⁴⁸ A yet junel max wajbaj masanil is soldado, max yak'on owal yetok eb Amalec. Axca tu' max yun colon el is conob yul k'ab eb ajc'ul.

⁴⁹ Ay oxwan is c'ajol Saúl tu', a ton Jonatán, Isúi yetokc'al Malquisúa; ay c'apax cawan is cutz'in, jun ix Merab, a ton ix babel, axa ix yet is cab, chi yik Mical.

⁵⁰ Ahinoam is bi yistzil Saúl tu', is cutz'in cham Ahimaas. A pax cham sat yajawil eb is soldado Saúl chi yik Abner c'ajol Ner tol yican Saúl.

⁵¹ A Cis, a ton is mam Saúl, c'al Ner is mam Abner, c'ajol Abiel eb.

⁵² A yet ayoc Saúl yin reyal xol eb yet israelal, ayc'al oc owal yuj eb yetok eb filisteo; yuj tu' xan ta ay wal eb ach'ej tol jelan, c'al ay yip, max oc eb yin soldadoal yuj Saúl.